పాలపుంత దాటి పాకగలడు నరుడు
జన్యు మార్చి కూర్చె జ్ఞాన బలుడు
కుప్పకూలి కూడ కులము నొదలలేడు
కులము లోన యేమి గుణము గలదు!

-

*** ఆటవెలది ***

నీదుయున్న విద్య నిక్కముగన్ జూపు
వినుడువారి వరస విడిచిపెట్టు
కోయిలమ్మ కూత కోరునా శ్రోతనే
చెప్పెను రవివర్మ ఒప్పు వినుమ

-

ఆ.వె:
చిటికెనేలి మీద శిఖరమంతటినెత్తి
తులసి దళము వేయ తూగినావు
నీదు లీలలెంత నిత్య నికరమయ్య
జీవకోటి శ్వాస శ్రీనివాస

-

సీతనగ్నికంపె శీల పరీక్షకన్
జనుల మాట చేత జానకిపతి
మనసునెంత నొచ్చె మనషులకెరుగునా.!?
చెప్పెను రవివర్మ ఒప్పు వినుమ...

-

ఆ.వె:
అమ్మతనము నందు నాదిశక్తి నిలుచు
జనని లేక నీకు జన్మ యేది?
అమ్మ నిదుర లేవ యవనికిర్లు విడుచు
జననిలేని వేళ జగతియేది?

-

సొమ్ము కొరకు చాటు గమ్ముకొనిరిమందు
చావు బ్రతుకు లన్న జాలి లేక
పంట దాచి రైతు పస్తులుంచ గలడె
నీతిగల్గిమనుజ ఖ్యాతి గెలువు

-

తనకు నచ్చు తిండి తాను తినగనునూ
పక్కవానిదెంచు తిక్క నరుడు
అన్నమందు గాదు ఆత్మనుండున్ బుద్ధి
చెప్పెను రవివర్మ ఒప్పు వినుమ

-

మిత్రుడైన వాన్కి మిక్కిలిగిచ్చె సిరి
మామయైన గాని మట్టుబెట్టె
ఎన్ని వింతలుగద కన్నయ్య మాయలన్
చెప్పెను రవివర్మ ఒప్పు వినుమ

-

చుక్కలంటుచు మరి లెక్క తప్పుచు నేడు
బయట కొచ్చి కరొన భయము నింపె
నవ్వి పోదురయిన నాకేటి సిగ్గంటు
జడలు విప్పి ఉరికె జాఢ్య కణము

-

ఆటవెలది
కఠిన రాతి గుండె కర్రొనా రక్కసి
బయట తిరిగి దాని బారి పడకు
మందు మాకు లేదు మందలించినపోదు
మాట వినక మనకు మనుగడేది?
సుమనప్రణవ్

-