నన్ను మలచిన గురువులకు వందనం...
మీరు విడిచిన గురుతులకు వందనం...

-

పూల అందాలు మీకు కనిపిస్తున్నాయి...
ముళ్ళ నొప్పి నాకు తెలుస్తున్నది....

-

నిదుర రాని రాతిరిలో...కుదురులేని జ్ఞాపకాలు...
మదిని నవ్విస్తూ కొన్ని...
మనసు నలిపేస్తూ కొన్ని...
నవ్వినా నీ వలనే...నలిగినా నీ వలనే...

అలసి ఉన్న కన్నులలో...నిలిచి ఉన్న నమ్మకాలు...
కథను నిలిపేస్తూ కొన్ని...
కళను నడిపిస్తూ కొన్ని...
నిలిచినా నీ వలనే...నడిచినా నీ వలనే...

మధురమైన హృదయంలో...శిథిలమైన ఆనవాళ్లు...
బాధ కలిగిస్తూ కొన్ని...
బరువు తొలగిస్తూ కొన్ని...
కలిగినా నీ వలనే...తొలగినా నీ వలనే....

-

గతి చెదిరిన గుండెకొనను
అతి సులువుగ అర్థమవను...
ప్రతి హృదయపు చిరు రవమును
మతి నిలిపిన భారమవను...

కళలకున్న కొసమెరుపును
కలలలోన ఉండలేను...
కథలలోన తుద మలుపును
కదలకుండ నిలువలేను...

కటిక రాతి కఠిన శిలను
కన్నీటికి కరుగలేను...
ఇసుకమేట వేయు అలను
ఇష్టమున్న ఆగలేను...

మొదలెరుగని తుదను నేను
మలి మలుపుకి కానరాను...
బదులెరుగని పొడుపు కథను
మది బరువును తెలుపలేను....

-

నిదురపోని కన్నుల్లో కుదురులేని నీ రూపం...
కలలను రానివ్వదు కలతను పోనివ్వదు....

-

మదిలోన భావాలు కదిలితే జ్ఞాపకం...
మనసైన రూపాలు కరిగితే జ్ఞాపకం...

కడవరకు తోడుగా నిలిచేది గురుతులే...
మనప్రేమ సౌధాలు మిగిలితే జ్ఞాపకం...

వినలేని కర్ణముకు ఎనలేని శబ్దాలు
మధురాల రాగాలు పలికితే జ్ఞాపకం...

నాకేమి మిగిలింది నిండైన ప్రేమలో...
మరుగవని గాయాలు రగిలితే జ్ఞాపకం...

ప్రతి తలపు ఒక శరము రవివర్మ మనసులో...
మృదువైన బాణాలు తగిలితే జ్ఞాపకం....

-

హృదయంలో చోటివ్వలేను... క్షమించు...
ఇదివరకటి వారు విడిచిన శిథిలాల శకలాలు
ఎక్కడ గుచ్చుకుంటాయో అని భయం....

-

రక్తపు మరకలు చెరిగిపోతాయి...
గాయపు గురుతులు అరిగిపోతాయి...
మనుషులు మసలిన తేలిక తీరుకు
మృదువగు గుండెలు విరిగిపోతాయి....

-

కొందరికి చంపేశాక కూడా
సంతృప్తి ఉండదు...
గుర్తొచ్చినప్పుడల్లా వచ్చి
సమాధి తొలిచి శవాన్ని
పొడుస్తూ ఆనందిస్తుంటారు....

-

భరతమాత నుదుటిపైన మురిసినదీ సింధూరం...
కఠినాత్ముల సంహరించి విరిసినదీ సింధూరం...
ప్రతీకార జ్వాలలతో రగులుతున్న దేశమందు
ఉగ్ర రోదనలను చూపి మెరిసినదీ సింధూరం....

-