કોડિયું... ✍️
------------

આ કોડિયું કિંમતી ત્યાં સુધી,
શ્વાસરૂપી દીપ જલે ત્યાં સુધી.

શ્વાસરૂપી દીપ છોડશે સાથ ,
કોડિયું કરશે માટીનો સંગાથ .

એ માટીથી બને નવું કોડિયું,
ફરી જીવ મેળવે નવું ઘોડિયું.

-

અમારું ઝૂંપડુંય નથી
સરનામું અમારું તમે..

અમારું તુંબડુંય નથી
તરણ અમારું તમે..

અમારું કોડીયુંય નથી
અજવાળું અમારું તમે..

અમારું મુખડુંય નથી
સ્મિત અમારું તમે..

અમારું કશુંયે નથી
સઘળું અમારું તમે..

-

બહુ ખુશ થાશે દુનિયાભરનું અંધારું
ખંખેરો અજવાળા પરનું અંધારું

સિંહણટોળું ઊતર્યું જાણે ઘૂનામાં
ધરતી પર ઊતર્યું અધ્ધરનું અંધારું

ભાઈ, કુંભારી ! એક કોડિયું આપી દે
ઓછું કરવું છે પથ્થરનું અંધારું

તેં ફાનસનો કાચ કર્યો છે ઊંચો, ત્યાં
મેં ઊડતું ભાળ્યું રીતસરનું અંધારું

પાછો ના કાઢીશ, કોઈ માગણ આવે તો
લઈ જાશે એ તારા ઘરનું અંધારું

મારામાંથી જન્મ્યાં છે કંઈ મહાકાવ્યો
સ્નેહી ! હું તો છું શાયરનું અંધારું

- સ્નેહી પરમાર

-

દીવો કરી આકાશને ધર્યું હતું મેં કોડિયું, નવને નવ થઈ ત્યાં સુધી!
આકાશના સુંદર ઝરૂખે જનમતા દેખાય! કૈંક ટમટમતા તારલા.

-