ಅಪ್ಪಾ..

ಮಕ್ಕಳ ಮುಗ್ಧಪ್ರೀತಿಗೆ ಅಪ್ಪ ಮೊದಲಿಗೆ ಸೋತ..
ಮಕ್ಕಳ ವಿಶ್ವಾಸಘಾತಕ್ಕೆ ಅಪ್ಪ ಕೊನೆಯದಾಗಿ ಸೋತುಹೋದ.!

-

#ರೈತ

ಮಳೆಗಾಗಿ ಪರದಾಡುವವರು ರೈತರೇ..
ಮಳೆ ಬಂದು ಬೆಳೆ ಕೊಚ್ಚಿಕೊಂಡು ಹೋದಾಗ,
ಮರುಗುವವರು ರೈತರೆ!

-

#ಸ್ವಾರ್ಥ ;
ಆಹಾರಸಿಗದ ಇರುವೆಯೊಂದು ಯೋಚಿಸಿತು..

ನಾನೊಮ್ಮೆ ಮನುಷ್ಯನಾದರೆ ಎಲ್ಲ ಆಹಾರ ನನಗಾಗಿ
ಸಂಗ್ರಹಿಸಿಬಿಡುವೆ!

-

ನಿನ್ನೊಂದಿಗಿನ ಮುನಿಸು ಮನಸ್ತಾಪಗಳೊಳಗೆ ನಾನಿರುವಾಗ..
ಮುಗುಳ್ನಕ್ಕು ತನ್ನೆದೆಗೆ ನೀ ನನ್ನೆರಗಿಸಿದ ಮರುಕ್ಷಣವೇ
ನಾ ಸೋತುಬಿಡುವೆ!

-

ಕಣ್ಣಲ್ಲಿ ಭಯ ಆವರಿಸಿ ಇರಿತಕ್ಕೊಳಗಾಗಿದೆ ಮನ,
ಹೊಟ್ಟೆಯೊಳಗಿನ ಕರುಳು ಹಿಂಡಿದಂತೆ ಸಂಕಟವಾಗಿದೆ.

-

ಭಾವಕಲ್ಪನೆಗಳು ಮಸಣದ ಹಾದಿಯಲ್ಲಿವೆ...
ನೆನಪುಗಳು ಸಹ ಮೊರೆಹೋಗಿವೆ ಚರಮಗೀತೆಗೆ...!

-

ಆಸೆಗಳು ಅತಿರೇಕಕ್ಕೇರಿವೆ,
ಕಾಮ-ಕ್ರೋಧವು ಅತಲವಾಗಿವೆ,
ಮನಗಳು ಕಠಾರಿಯಂತೆ ಹರಿತವಾಗಿವೆ,
ಆದರೂ ಕಲಿಯುಗದ ಕೊನೆ ಹೇಳುವ ವಿದಗ್ಧರಿಲ್ಲ..

-

ಯಾರೂ ಶಾಶ್ವತವಲ್ಲ ಬದುಕಲ್ಲಿ;
ನಂಬಿಕೆ ವಿಶ್ವಾಸ ಗಳಿಸುವ ನೆಪವಷ್ಟೇ ಎಲ್ಲರಲ್ಲಿ!

ಗಳಿಸಿರುವುದನ್ನು ಉಳಿಸುತ್ತಿರುವರು ಭಯದಲ್ಲಿ;
ತೊರೆದು ಬಿಡುವರು ಕೊನೆಗೆ ಅವರವರ ಪಾಲಿನ ನೆನಪಿನ ಬುತ್ತಿಯಲ್ಲಿ!

-

ಪ್ರತಿ ಹಂತದಲ್ಲೂ
ಸೋಲುತ್ತಿರುವೆ ಮೊದಲಿಗಳಾಗಿ,
ಸೋಲುಂಡ ನೋವು ತಿಳಿದಿರಲೆಂದು!

ಎಂದೋ ಗೆದ್ದಾಗಲೂ
ಸಂಭ್ರಮಪಡದವರಲ್ಲಿ ನಾನೇ ಮೊದಲಿಗಳು,
ಯಾಕೆಂದರೆ ಸೋತವರ ಪಾಡು ಅರಿತವಳು ನಾನು!

-

ಈಜುಬಾರದ ಸಮುದ್ರದ ಮತ್ಸ್ಯಕನ್ಯೆ ಅವಳು..
ಈಜಿದರೆ ತನ್ನವರ ನಾಶದ ಶಾಪಕ್ಕೆ ಬಲಿಯಾಗಿರುವಾಕೆ!

ತನ್ನಾಶಯಕ್ಕೆ ಈಜಬೇಕೋ?
ತನ್ನಾಶಯ ಮರೆತು ತನ್ನವರ ಉಳಿಸಬೇಕೋ?

-