வாழ்வின் நிதர்சனங்களை,
சற்றுக் கடினமாகவே கற்றுக்கொடுக்கின்றன
ஒருசில கசப்பான உண்மைகள்..

-

தனிமையில் நான் சோர்ந்திருக்கும் போதெல்லாம்,
உற்சாகமாய் உன்னோடு பயணிக்க வைக்கிறாய்..
அழகான ஒர் புது உலகை என் கண்முன்னே விரித்திடுகிறாய்..
அவ்வுலகையும், மனிதர்களையும், இயற்கையையும்
உன் கரம் கோர்த்து ரசிக்க வைக்கிறாய்..
அவ்வப்போது அவர்களைப் பற்றி புறம் பேசவும் செய்கிறாய்..
சில சமயம், நீ கவலை கொள்ளும் போது
எனக்கும் அழுகை வருகிறது..
நீ சிரித்திடும் போது நானும் சிரிக்கிறேன்..
நீ சினம் கொள்ளும் போது நானும் கோபம் கொள்கிறேன்..
உன் அத்தனை உணர்ச்சிகளையும், எனக்கே தெரியாமல் நான் உள்வாங்கிக் கொள்கிறேன்..
மனிதர்களைப் போல சுயநலமாக ஏமாற்றி
விலகிச் செல்லாமல், எப்போதும் என்னோடு இணைந்திருக்கிறாய் ஓர் காதலனை போல..
என்னோடு நீ இல்லாத நேரங்களில் மட்டுமே,
நான் உணர்ந்திடுகிறேன்
நீ ஓர் புத்தகம் என்கின்ற உண்மையை..

-

அளவில்லா மகிழ்ச்சியையும்,
அளவற்ற சோகத்தையும்,
கட்டுக்கடங்கா கோபத்தையும் சுமந்திருந்த நாட்களெல்லாம் அடுத்தடுத்த வருடங்களில் எச்சலனமும் இல்லாமல் இயல்பாக கடந்து செல்கின்றன,
'எதுவும் கடந்து போகும்' என்பதை உணர்த்தியவாறு..

-

இமைகள் மூட மறுக்கின்றன - உன் நினைவுகள் என்று,
இரக்கமின்றி நீ அளித்திடும் இம்சைகளினால்..

-

உன் நினைவுகளே
எனைக் கரை சேர்க்கின்றன
வாழ்வின் துயரங்களிலிருந்து..

-

சாத்தியமில்லாதது,
உன் நினைவுகளில்லாத
என் வாழ்க்கையைப் போல..

-

உன்னைச் சந்திக்காமலேயே இருந்திருந்தால்
மகிழ்ச்சியான நாட்கள் எப்படியிருக்கும் என்பதை உணராமலேயே இருந்திருப்பேன்..

-

உனக்கென நான் எழுதிய கவிதைகள் அனைவராலும் ரசிக்கப்படுகின்றன, உன்னைத்தவிர..
கவிதைகளுக்குத் தன்னைத் தானே ரசிக்கத் தெரிவதில்லை போலும்..

-

செல்லப்பெயர் வைத்து, உனைக் கொஞ்சிடவெல்லாம் ஆசையில்லை - ஒரு நாளைக்கு நூறுமுறை உன் பெயர் சொல்லிச் சிலிர்த்திடும் இவளுக்கு..

-

உன் இதழில் சத்தமின்றி அழுத்தமாக முத்தமிட வேண்டும் நான்..
அவ்வழுத்தம் மூலம் என் காதலின் ஆழத்தை உணர வேண்டும்
நீ..

-