காற்றே!

கொஞ்சமாவது
நாங்கள்
இளைப்பாறிக் கொள்கிறோமே...

இப்படிக்கு மரங்கள்

-

சிறகடித்து பறக்கும்
பறவைகளை
பார்க்கிறேன்!

சிறகொடிந்த நான்
செல்போன்
திரைக்குள்!

-

மனிதனை மனிதன்
அடிக்குறாண்டா..!

சாதியைச் சொல்லி
மிதிக்குறாண்டா..!

மலத்தையும் மதத்தையும்
குடிக்குறாண்டா..!

சிறுமியைப் பார்த்தே
எச்சில்
வடிக்குறாண்டா..!

எங்கள் நாடு நல்ல நாடு..!
நாகரீகம் உள்ள நாடு..!

-

...
என்னைச்சுற்றி
வரும்
உலக வங்கி;
அம்மாவின்
முந்தானை முடிச்சு!
...

-

சாதி சண்டை
நடப்பதை ஒளிந்திருந்து பார்த்துக்கொண்டிருக்கின்றன
காட்டு விலங்குகள்!
...

-

சாக்கடையில்
தவறி
விழுந்து விட்டேன்!

சுற்றி
இருந்த அனைவருமே
சிரித்தார்கள்!

~நாட்டு நிலைமை

-

"திரையரங்கில் நடிகர்களின்
பதாதைகளுக்கு பால்
ஊற்றுவதையும்"

"கோவிலில்
கடவுளின் சிலைக்கு பால்
ஊற்றுவதையும்"

பார்த்து வெடித்துத் தான் போனாள்
பச்சிளம் குழந்தைக்கு
பால் வாங்க முடியாத
அந்த தாய்!

-

கடவுள்
அனைத்தையும் பார்த்துக்
கொள்வார் என்று
சொல்வார்கள்;

ஆம்!

நான் கற்பழிக்கப்பட்டு
என் உடல்
துண்டாடப்படும் போதும்
பார்த்துக்
கொண்டே தான் இருந்தார்.

~இப்படிக்கு
(கோவிலில்
கற்பழிக்கப்பட்ட பெண்கள்)

-

பூ ஒன்று
தானே முன்வந்து தற்கொலை
செய்து கொண்டது!
பூச்செடி
நட்டவனின் மரணத்தினால்!
...

-

திருட வந்த
திருடன் கூட
திகைத்துப் போய் தான்
நின்றான்!
#வறுமை

-