తల్లికేమొ చిక్కడు
మగువలకూ దొరకడు
మునులకే దక్కాడు
ఓ కూనలమ్మ!

-

అసురులపై కోపం
అవనిలోన పాపం
తొలగించిన రూపం
ఓ కూనలమ్మ!

-

నిను చూడ నా కళ్లు
కోరింది మది ఇల్లు
నీ రాక హరివిల్లు
ఓ వన్నెలమ్మ!

-

నిన్న దాక అణువును
నేటి మొదలు తనువును
మరునాడు వేణువును
ఓ వన్నెలమ్మ!



నిన్న మొన్నటి అణువు
నేటి మొదలున తనువు
ఇకముందు వేణువు
ఓ వన్నెలమ్మ!

-

కన్ను ఆమె కొట్టే
పెన్ను అతడు పట్టే
చిన్ను..! కవిత పుట్టే
ఓ వన్నెలమ్మ!

-

ముందు పూజల రేడు
స్థూల కాయము వాడు
సూక్ష్మ బోధలు చూడు
ఓ కూనలమ్మ.!

-

నోటు వేసె గాలము
ఓటరిడిచె శీలము
ఐదేళ్ళకు తాళము
ఓ వన్నెలమ్మ!

-

భవ జలధికి మందులు
నాదు హృదికి విందులు
చిన్ని కృష్ణ చిందులు
ఓ వన్నెలమ్మ!

-

ఆకుపై నీటిబొట్టు
క్షణాన ఆటకట్టు
తెలుసుకో లోగుట్టు
ఓ కూనలమ్మ!

-

మూడు కన్నుల వాడు
ఆడు నర్తన చూడు
పాడు పాదము వేడు
ఓ కూనలమ్మ!

-