#शून्यच #होऊन #उरते!
रेंगाळत ही स्मृतीशृंखला..तुझ्याभोवती अविरत फिरते,
गतकाळांतील जुने-पुराणे मधुर..तराणे मी गुणगुणते...!
क्षितिजावरती मावळतीला..चांदणे-चंद्रिका खुणावते,
कैवल्याच्या प्राप्तीसाठी.. अद्वैताची वाट पाहते...!
किती गुंफिल्या मौक्तिकमाला..स्वप्नांचे किती रंग उधळले,
ओघळले ते मोती आणिक..स्वप्नरंग ते विरून गेले...!
सागरतीरी वाळूवरती..मिळुन रेखिली अक्षरलेणी,
खोल तळाशी ने वाहून त्यां..लाटांचे ते कराल पाणी...!
गूढ अनामिक नाद अनाहत..अजून मजला ऐकू येतो,
अजून सखया व्याकुळ करतो.. सहवासाचा स्मरणगंध तो...!
भूल सुखाची अवती भवती.. काळ तरीही ओढून नेतो,
चुकला नाही कधी कुणाला..असीम त्याचा मरणबंध तो...!
आयुष्याची वाट हरवली..दिशाहीन परि शोधत फिरते,
शोध कुणाचा वाट कुणाची..नकळत माझ्या; मी भिरभिरते...!
जीव वाहतो देहभार तो.. विकल मानसी सखया झुरते,
पंचभुतांचा शून्य पसारा..शून्यच होऊन उरांत उरते.....!
#वृत्त #वनहरिणी #गोदातीर्थ
डॉ.सौ.वैशाली गोस्वामी-कुलकर्णी

-