#तूच #दिननिशी

कातरवेळी संध्यासमयी,
धरतीवरती भूल सावळी...
क्षितिजावरती दाटुन येई,
तुझी निरागस कृष्ण सावली...!
घनतिमिरातुन निशा झरतसे,
मिटून घेशी जणू लोचने...
विश्वाची मग रात्र सरतसे,
जीव विसावे सुखनिद्रेने...!
ढळे नभी शुक्राचा तारा,
गोड हसू ओठांवर उमटे...
गार वाहतो पश्चिम वारा,
प्रभातकाली तांबडे फुटे...!
तू संध्या अन् उष:कालही,
जळे प्रहर जो माध्यान्हीचा
तुझीच रूपे ऋतूकालही....
नायक तू या रंगपिठाचा...!
(वृत्त-पादाकुलक)
डॉ.सौ.वैशाली गोस्वामी-कुलकर्णी
#गोदातीर्थ

-