जय जय जय जय गणराजा तूं , गणाधीश तूं , गणपती बाप्पा
मारता उलो तुका कर तूं भक्तांचेर कृपा ।। धृ।।

भाद्रपदाचे चवथीक तुजे आगमन भक्तांगेर
दुडदुडदुड दुड बसोन तूं येता उदंराचेर ।। १।।

पंचपक्वानाचो नैवेद्य तुका अर्पण करता
थोडो प्रसाद दि रे देवा तूं म्हाका ।। २।।

संकट आनी कष्टा वेळार तूच राखता
रूप तुझे पळोवन देवा भुक भागता ।। ३।।

आतूरतेन आमी तुजी वाट पळयता
परतून वतना तूं आमी तुकां गळयता ।। ४।।

दास तुजो पंत हो पडटा रे पाया
इत्सापुरती कर तूं म्हजी बाप्पा गणराया ।। ५।|

-

म्हजे म्हाका खरें
तुजें तुका खरें.
हांवे केल्यार वायट
तुवें केल्यार मात बरें.

-

आतां म्हाका पावस आवडना...
कारण.. आतां पावसांत.
बेब्यांची गाणी आयकना.
व्हाळांत कागदाच्यो होड्यो दिसना.
आंगणांत गड्ड्याचे खेळ आसना.
उदकांत उडक्यो मारतना भुरगीं हासना.
आजी पणसाची भिकणां भाजना.
आजो नांगर घेवन कोसपाक वसना.
बायलो शेतांत कोंगे पुंजायना.
लोक तेरो, तायकिळो, किल्ल खायना.
बाय, बाबू योरे योरे पावसा गायना.
हालीं कोणच पावसाक तोखेना.
पावसूय पयलीं सारखो पडना.
म्हणून म्हाका आतां पावस आवडना....

-

म्हाका अशें कितें जातलें
हें हांवे केन्ना चितूना.
कारण आयज मेरेन तुज्या सारखे
कोण केन्ना दिसूना.

पूण आयज घडले
एक व्हडलें अप्रुप.
जेन्ना नदरेक पडलें
तुजें सोबीत रूप.

तुज्या रूपांत जालो हांव गुंग
आनी विचित्र प्रसंग घडलो.
लोक पडटात मोगांत बी
पूण हांव...
चलता चलता शेणांत पडलो.

-

मोगा...
अशें म्हणटात की मनांत आसल्यार सगळे मेळटा.
पूण तूं तर म्हज्या ध्यानात, मनांत खंयच नासलें.
तरी एक दिस तूं आयले.
म्हजे मनांत कातकुल्यो जाल्यो.
तूं आवडूंक लागले.
तुजें रूप, तुजो आवाज, तूं जाय शें दिसूंक लागले.
करता करता मोग जालो.
हांव तुजो जालो...
सासणाचो.

-

म्हजो भुरगो बिघडलो, वायट व्यसनाक लागलो.
ताका संगत बरीं मेळूना, इश्टानी वाट लायलीं.
आरे सभाग्यानो......
सर्पान वेटाळो मारलो म्हण चंदन विखारी जायना.
कितलीय भूक लागली म्हण संत चोर जायना.
जबरदस्तीन तोंडांत घातलें म्हण कोण शेण खायना.
तशेंच.....
म्हज्या मनांत नासत जाल्यार कोण म्हजी वाट लायना.

-

जेन्ना धर्माखातीर उलोवपाचे आसता,
तेन्ना म्हणटात, देश व्हड.
जेन्ना देशाखातीर उलोवपाचे आसता,
तेन्ना म्हणटात, मनीसपण व्हड.
जेन्ना मनीसपणाखातीर उलोवपाचे आसता,
तेन्ना म्हणटात, वैयक्तीक स्वतंत्रताय व्हड.
जेन्ना वैयक्तीक स्वतंत्रतायेखातीर उलोवपाचे आसता,
तेन्ना म्हणटात, पैसो व्हड.
आतां म्हाका प्रस्न पडलां....
खरोच कोण व्हड????

-

चोरा.....
तूं आयलें
तूं बसलें
तूं हांसलें
तूं गेलें.
वांगडा म्हजें काळीजूय व्हेलें.

-

राक्षस

हालीं मनीस स्वताक देवापरस व्हड समजता.
ना ना, मनीस तर देवाचे अस्तित्वच न्हयकारता.
आपल्या मनांत येता तें करता.
गिरेस्त गरीबांक पिडटा, राजकारणी जनतेक नाडटा
भाव भावाकडेन लडटा, जाणट्यांक आश्रमांत धाडटा
वायट वायट ट्रेंड हाडटा, मॉडर्न जावंक घराबे मोडटा
वायट मार्गान पैशे जोडटा, वचत थंय फक्त अधर्म घडटा.
बस्........ आतां खूब जालें
आयज सावन हांवूय दया माया विसरून निर्दयी राक्षस जाता.
आनी ह्या धर्तरेक मनीसपण नाशिल्ल्या मनशाच्या अत्याचारात्यान मुक्त करता.

-

अंतातल्यान अनंताकडेन
वाटचाल हांवें सुरू केल्या.
ना आशा, ना इत्सा, ना अपेक्षा
हांवें आत्मो, परमात्म्याच्या स्वाधीन केल्या.

-