हातात हात
स्वप्न की घात
जुनाच धोका
नियतीचा..

मनाची खोड
प्रेमाची ओढ
जुनाच झोका
फसण्याचा...

स्वप्न हजार
ठिगळं चिकार
जुनाच मुलामा
हसण्याचा..

मरण यातना
इच्छा कामना
जुनाच विषय
जगण्याचा..!

-

शाळेआधी तिने खूप कांही शिकवले
जीवनाचे धडे अलवार हृदयी गिरवले
फार शिकाया न लागले मग मला नंतर
जगण्याचे गुपित आईने होते उलगडले.

वाचत गेलो माणूस समोर येईल तसा
कुणाचे घर लख्ख कुणाला वळविणे गाठलेले
आठवली शिकवण क्षणभरात मायची
कुणाला शब्दाने कुणाला अस्तित्वाने सावरले..!

-

आजकाल जगताला गुरू हवाच कोठे
साऱ्याच अंतरामध्ये उजेड पुष्कळ आहे.

जो भेटतो तो तो दीपस्तंभ भासतो
आपल्याच वाटेला भरकटण्याची खंत आहे.

साऱ्याच माणसांचे सोसणे अमाप झाले
आपल्याच कथेला आरंभीच अंत आहे.

"असे व्हायला होते" घडल्यावर बोले जो तो
आपल्याच व्यथेचे जगणे अनंत आहे.

उपदेशाचे अमृत पाजतो माणूस स्वस्त दराने
आपल्याच कर्मगतीचा तो तर निव्वळ रवंथ आहे..

-