ಪ್ರೀತಿಯೊಂದಿಗೆ
ಹೊಂದಾಣಿಕೆ ;  ವೇದನೆ
ರಾಜಿಯೊಂದಿಗೆ

-

ತಪ್ಪು ತನ್ನಿಂದಾದರೆ ಆಕಸ್ಮಿಕ
ತಪ್ಪು ಅನ್ಯರಿಂದಾದರೆ ಉದ್ದೇಶಪೂರ್ವಕ
ತಪ್ಪುಮಾಡಿದವರು ಅನ್ಯರಾದರೆ ಗಲ್ಲಿಗೆ ಅರ್ಹರು
ತಪ್ಪುಮಾಡಿದವರು ನಮ್ಮವರಾದರೆ ಕ್ಷಮೆಗೆ ಅರ್ಹರು

-

ಒಲವ ನುಡಿಗೆ
ನೋವು ಮರೆತ ನಡಿಗೆ
ಉತ್ತೇಜನ ನಾಡಿಗೆ
ಪೋಗುತಿರೆ ಪ್ರೀತಿ ನಾಡಿಗೆ

-

ನಿನ್ನ ಪ್ರೀತಿಸುವ ಕಾರಣ ನೀ ಯಾರೆಂದಲ್ಲ
ನಿನ್ನ ಜೊತೆ ನಾ ಯಾರಾಗಿಹೆನೆಂದು
ನಿನ್ನೊಂದಿಗಿನ ಒಲವ ಜೀವನ
ಕನಸಿಗಿಂತ ನನಸಲಿ ಸಂತಸವಿಂದು

-

ಕನಸಿಗೂ
ಕರ ತೆರಬೇಕಂತೆ
ನಲ್ಲನೊಂದಿಗೆ ಏಕಾಂತ ಕ್ಷಣಕೆ

-

ಅವನೆಂದ ನಾಳೆಯೇ ಮದುವೆಯ ಹೋಳಿಗೆ
ನೋಡುತ ನಿಂತ ಬೇರೊಬ್ಬ ತೊಡಿಸುವುದು ಉಂಗುರ ಕಾಲಿಗೆ

-

ಒಲವ ಮಳೆಯಲಿ
ನೆನಸಿ ಮುದದಲಿ
ನಲ್ಮೆಯ ನಶೆ ನವಿರೇಳಿಸಿ
ಬೆಳದಿಂಗಳ ಹಾಲ್ಬೆಳಕಂತೆ
ಬರಡು ಮನವ ಬೆಳಗಿಸಿ
ಕಾಮನಬಿಲ್ಲನು ಕೈಗೆಟುಕಿಸಿ
ಮಧುವನದ ಮಧುಪಾನದ
ಸವಿಯುಣಿಸಿದ'ನಲ್ಲ'.

-

ನೀತಿವಂತನವನು ನಯನದಲೆ ನಲ್ಮೆಯ್ಹರಿಸಿದ
ನೆನಪುಗಳಲ್ಲಿ ನಿತ್ಯಾರಾಧನೆ
ನಿಯತಿಯಲ್ಲಿಷ್ಟೇ

-

ನೆನಪುಗಳು ನರಳಿಸಿ ಕವಿದಿದೆ ಮಂಕು
ಸಂತಸವ ಕೊಂದು ಅಟ್ಟುವಂತಿದೆ ಕಾಡಿಗೆ

ಮೆಚ್ಚಿ ಅಪ್ಪಿದ್ದ ನೆನಪುಗಳು ಹೃದಯ ಕಲ್ಲಾಗಿಸಿ
ಕಂಗಳಲಿ ಕರಗಿ ಕೆಡಿಸುತಿದೆ ಕಾಡಿಗೆ.

-

ಅವನೊಲವಾಗಿದೆ ಮದಿರೆ
ಮೈಮನವರಳಿ ಕಾದಿರೆ
ಬಾರದಾಗಿದೆ ನಿದಿರೆ

ಅವನಾಲಿಂಗನಕಿಂತ
ಬೇರೆ ಬೇಕೇ ಉಡುಗೊರೆ,
ಕೋಪವ ಮರೆಸಿ
ಮುದ್ದಾಡುವ ಮನಸಾರೆ,
ಮೆಲ್ಲನೆ ಸುರಿಸುವ
ಅಮೃತಧಾರೆ,

ನಾಚಿ ಸರಿದಿದೆ ತಾರೆ
ಅವಳವನ ಕೈ ಸೆರೆ
ಸ್ವರ್ಗವಾಯಿತಲ್ಲೆ ಈ ಧರೆ.

-