ଏଠି ରାତି କାହାର
କଳଙ୍କିତ ଜହ୍ନର
ନା
ତୁମ ପ୍ରତାରିତ ପ୍ରେମର ?

-

ସବୁ ଫଗୁଣ ଫେରେନା
କିଛି ଲୁଚି ଯାଏ,
ହୃଦୟରେ ହସ୍ତାକ୍ଷର ହେଇ
ଶ୍ରାବଣ ବାଟ ଚାହିଁ ।

-

ପେପର୍ ନୋଟ୍ ଟି ହାତେ ଦେଇଥିଲ
"ୱିଲ୍ ମିସ୍ ୟୁ" କହି

କେତେ ଶୀତ ଯାଇ,
ପୁଣି
ଏପ୍ରିଲ୍ ଫେରିଛି,
ଖରା ଦିନ ଛୁଟି ନେଇ ।।

-

ସ୍ପନ୍ଦନ କେବେ ସରେନା,

କିଛି ଛାତିରେ ଲୁଚେ
କେଇ ଟୋପା ମାଟିରେ ମିସେ ।

-

ଝରକା ସେପାଖେ ଝରୁଥିଲା
ଅଦିନ ମେଘ,

ଏପାଖେ
ଅତୀତର ପାଣି ପାଗ
ତୁମେ,
ଆଉ କଲେଜ୍ ଛକ !

-

ତୁମେ ଓ ସେ ଜହ୍ନ
ସରି ସରି ଆସୁଥିବା
ଏକ ଅପରିଚିତ ଅପରାହ୍ନ !

-

କିଛି ପ୍ରତୀକ୍ଷାର
ନାହିଁ ଠିକଣା

ଠିକ୍ ସେ,
ଗାଁ ମୁଣ୍ଡ ଶେଷ କୋଠାଘର
ଝରା ଶେଫାଳିର ବାସ୍ନା ।

-

ଅତୀତର ଦୁଷ୍ଟାମି
କିଛି ଲୁଚି ରହିଛି
ଧୂସୁରିଆ ରଫ୍ ଖାତା ପୃଷ୍ଠାରେ ..

ଯୌବନର ସନ୍ଧ୍ୟା
ଆଜି ଏକାକି ହଜିଛି
ମାଇଲ୍ ଖୁଣ୍ଟ ,
ଷ୍ଟ୍ରୀଟ୍ ଲାଇଟ୍ ରାସ୍ତାରେ ...

-

ଅମାନିଆ
ଏ ବର୍ଷା ଛିଟା

କେବେ ଭିଜାଏ , କେବେ ଜଳାଏ
ତୋ ପରି
ଅଢେ଼ଇ ଦିନିଆ !

-

ସିଗାରେଟ ଧୂଆଁ ବି
ଠିକ୍ ତୁମ ପ୍ରେମ ପରି ଲାଗେ ନିଜର

କୁହୁଳି କୁହୁଳି ହୁଏ ଅଙ୍ଗାର !

-