**ପଖାଳ କଂସା**

ଖୋଜେନି ସିଏ ନଅ ତିଅଣ ଛଅ ଭଜା
ଲଙ୍କା ପିଆଜ ଦେଇ ଖାଇବାରେ ବି ଥାଏ ମଜା

ଘର ଡିହେ ଖାଅ ଅବା ହିଡ ମୁଣ୍ଡ ରେ ବସି
ସବୁଠି ଉଦର ପୁରାଇ ଦିଏ ମନକୁ ଶାନ୍ତି।

(ଆଗକୁ ପଢ଼ି ମତ ଦେବାକୁ ଅନୁରୋଧ🙏)
👇👇👇👇👇👇👇👇👇👇

-

✨✨ତୁମେ ସାଜିଛ ମୋ ଜୀବନ ସାଥୀ✨✨


ସଂସାର ର କୋଳାହଳ ଆଜି ବି ଅଛି,
ଆଉ ...
ଆଜି ବି ସେ ମୋ ପାଇଁ ସେମିତି ଅଚିହ୍ନା,
କିନ୍ତୁ ଏକା ନାହିଁ ମୁଁ,
ଭାଙ୍ଗିଯାଇଛି ନୀରବତା ସହ ମୋର ସେ ବନ୍ଧୁତ୍ୱ,
କାହିଁକି ନା ମୋ ନୀରବତା କୁ ଚିରି
ତୁମେ ସାଜିଛ ମୋ ଜୀବନ ସାଥୀ....🥰

👇👇👇👇👇👇👇👇👇

-

**ମୋ ଜଗନ୍ନାଥ**👏

କରୁଣା ବାରି ତୋ ବରଷାଇ ଦେବୁ 
ହାତ ମୋ ଧରି ବାଟ କଢ଼ାଇ ନେବୁ,
ବାଙ୍କ ଚାହାଣିରେ ଚାହିଁ  ରହିଥିବୁ
ଭକ୍ତି ଅର୍ଘ୍ୟ ମୋର ସାଉଁଟି ନେବୁ ।

ଛଡ଼ାତୁଳସୀ ରୁ ଛିଣ୍ଡାଇ  ଦେବୁ
ସମର୍ପଣ ଭାବ ମୋ ସାଇତି ରଖିବୁ,
ଅବଢ଼ା ଟିକିଏ ବଳାଇ ତୁ ଥିବୁ
ଆନନ୍ଦ ବଜାରେ ଖୁଆଇ ଦେବୁ।

ମନ ରୁ ପାଶୋରି କେବେ ନ ଦେବୁ
ହାତ ଠାରି ମୋତେ ଡାକି ତୁ ନେବୁ,
ମାନ ଅଭିମାନ ଛାଡ଼ି କୋଳେଇ ନେବୁ
ବାଇଶି ପାହାଚେ ଗଡ଼ାଇ ତୁ ଦେବୁ।

ଦଣ୍ଡ ଦେଇ ମୋତେ କ୍ଷମା  କରିବୁ
ତୋ ରଥ ଦଉଡ଼ି ଛୁଆଁ କରାଇବୁ, 
ଜଗତର ନାଥ ତୁ ମୋ ଜଗନ୍ନାଥ
ତୋ ବଡଦାଣ୍ଡରେ ଯାଉ ମୋ ଶେଷ ନିଃଶ୍ୱାସ।

-

ମନ ହୁଏ ଆଜି ପ୍ରକୃତି କୋଳରେ ଟିକେ ମୁଣ୍ଡ ରଖି ଶୋଇଯାଆନ୍ତି,
ନୀରବତା ର ସେଇ ଭାଷା କୁ ଆପଣାଇ
ଶାନ୍ତିର ଲହଡି ଭାଙ୍ଗନ୍ତି....
ଆବଶ୍ୟକ ନାହିଁ କୋଳାହଳ ମୋର,
ଜୀବନଟା ତ ଆଶାନ୍ତ ସାଗର....
ସାଧାରଣ ରହୁ, ସହଜ ରେ ବିତୁ ସବୁଦିନ...
ଘର୍ଘର ଗର୍ଜନ ଛାଡି ନ ଆସୁ ପୂର୍ଣ୍ଣିମାର ଜୁଆର।

-

ସମୟ କେବେ ସକାଳର ତାଜା ଅନୁଭୂତି ତ
କେବେ ଗଭୀର ରାତ୍ରି ଆଗମନ ପୂର୍ବ ଗୋଧୂଳି,
ବାଲି ପରି ହାତ ମୁଠାରୁ ଧୀରେ ଖସି ଯାଏ ,
ସମୟ ବଦଳି ଯାଏ...ଥିରି ଥିରି ବହିଯାଏ...
ମନକୁ ଗୁଦ୍ ଗୁଦାଉ ଥିବା ସେ ଭାବନା ସବୁ
ଆଜି ଛୁଞ୍ଚି ମୁନ ପରି ଫୋଡ଼ି ହୋଇଯାଇ
ମୁହଁରୁ ଇସ୍...ଜାଗାରେ ଆଃ!!ବାହାରି ଆସେ,
ସମୟ ସତରେ ବଦଳିଯାଏ, ଥିରି ଥିରି ବହିଯାଏ...
ଜୀବନର ଅର୍ଥ ଖୋଜୁ ଖୋଜୁ ବୟସ ହାର ମାନିଯାଏ
କାହାର ଶୈଶବ ସଜାଡ଼ିବାରେ ନିଜର ଯୌବନ ହଜିଯାଏ,
ଆଶା ବାଡ଼ିର ଆଶ୍ରୟ ନେଇ ବାର୍ଦ୍ଧକ୍ୟ ପହଞ୍ଚି ଯାଏ,
ସମୟ ସତରେ ବଦଳି ଯାଏ, ଥିରି ଥିରି ବହିଯାଏ...

-

ଶୀର୍ଷକ - ବିଦାୟ ୨୦୨୨
⭐⭐⭐⭐⭐

ଦିନ ପରେ ମାସ ଗଡ଼ି ଗଡି ଦେଖ
ବରଷେ ଗଲା ତ ବିତି,
କେତେ ସୁଖଦୁଃଖ ନେଇ ଆସିଥିଲି
ଯାଉଛି ଆଜି ତ ଚାଲି ।

ଆସିଛେ ମାନେ ଯିବା ତ ଦିନେ
ସମୟ ସୁଅରେ ଯାଉଥିବା ଗଡି,
ଥିବା ଯାଏ ନିଜ କରମ କରିବା
ରାଗ - ଋଷା,ମାନ - ଅଭମାନ ଛାଡ଼ି।

ସଭିଙ୍କ କଲ୍ୟାଣ ସଭିଙ୍କ ମଙ୍ଗଳ
ଆମ ମୂଳ ମନ୍ତ୍ର ସାଜୁ ,
ରୋଗ ଶୋକ ଦୁଃଖ ଦୂରେଇ ରହୁ
ଜଗତ ଉଦ୍ଧାର ହେଉ ।

ହରଷ ଚିତ୍ତ ରେ ଦିଅ ଗୋ ବିଦାୟ
ସାଥେ ଦୋଷ ତ୍ରୁଟି କ୍ଷମା ଥାଉ,
ଖୁସିର ପସରା ମେଲାଇ
ନୂତନ ବରଷର ଆଗମନ ହେଉ।

Suchismita Rout
Bhadrak

-

ଶୀର୍ଷକ - 🌹ନବବର୍ଷ🌹

କିଛି ଦୂରେଇ ଯାଉଥିବା ବର୍ତ୍ତମାନର ସ୍ମୃତି ଅନୁଭୂତି,
ଆଉ କିଛି ଘନେଇ ଆସୁଥିବା ଭବିଷ୍ୟତର ଆଶା ଅଭିଳାଷା,
ଆଦିର ସମାହାର ହୋଇ ଉଭା ହୁଏ ନବବର୍ଷ।

ମନ ଭିତରେ କିଛି ହରାଇବାର ଅବଶୋଷ,କିଛି ପ୍ରାପ୍ତିର ତୃପ୍ତି,
ପୁଣି ତା ସାଙ୍ଗକୁ କିଛି ନୂଆ ମନବାଞ୍ଛା ସହ, ଶୁଭ କାମନା,
ଏ ହେଉଛି ନବବର୍ଷ ଆଗମନର ଶୁଭ ସଂକେତ।

ନବବର୍ଷ ଆସେ ,ନବବର୍ଷ ଆସୁଅଛି ଏବଂ ନବବର୍ଷ ଆସୁଥିବ ମଧ୍ୟ,
କେବଳ ରହୁଥିବ ସମୟ ଚକ୍ରରେ ଘଟୁଥିବା ପରିବର୍ତ୍ତନର ଚିହ୍ନ ଗୁଡ଼ିକ,
ଆଉ ତାହା ଅବସାଦ ଗ୍ରସ୍ତ ହୋଇପାରେ,ଆନନ୍ଦ ମୟ ହୋଇପାରେ ଅବା
ସନ୍ତୋଷ ଜନକ ହୋଇଥାଇପାରେ।

ଗଡିଚାଲେ ଦିନ ପରେ ଦିନ ,ମାସ ପରେ ମାସ,
ଆଉ ଆମେ ଓଲଟାଇ ଚାଲୁ କ୍ୟାଲେଣ୍ଡରରେ ଫର୍ଦ୍ଦ ପରେ ଫର୍ଦ୍ଦ,
ପରିବର୍ତ୍ତନଶୀଳ ଦୁନିଆ ଭିତରେ ଦେଖୁ ଦେଖୁ କେତେବେଳେ ପୁରୁଣାବର୍ଷ ପାଲଟି ଯାଇଥାଏ ଏଇ ନବବର୍ଷ ।

👇👇👇👇👇👇

-

ସମ୍ପର୍କର ମଜବୁତ୍ ବନ୍ଧନ ବାନ୍ଧେ
ହୃଦୟର କୋହ ତଉଲି ଶକ୍ତ ହୁଏ ସେ ଗାଣ୍ଠ,
ଆଃ!ଭାଇ ଭଉଣୀର ସତେ ଅନନ୍ୟ ଭାବ।

-

ରାକ୍ଷୀ ରେ ରାକ୍ଷୀ ତୁ ରହିଲୁ ସାକ୍ଷୀ
ବାନ୍ଧିଲି ବଡ଼ ଶରଧାରେ ତୋତେ
ଭାଇ ମୋର ସଦା ରହିବ ସୁଖୀ
ରାକ୍ଷୀ ରେ ରାକ୍ଷୀ ତୁ ରହିଲୁ ସାକ୍ଷୀ।

-

@ବାପା@

'ବାପା 'ଦରଦୀ ମଣିଷଟିଏ
ଅକୁହା ବେଦନା ସାଉଁଟୁ ଥାଏ,

ଲୁହା ଭଳି ମଜବୁତ୍ କାନ୍ଧ
ଛାତିକୁ ପଥର କରି ରଖିଥାଏ,

ସବୁରି ମୁଖରେ ହସ ଫୁଟେଇ ଥାଏ
ତୁଣ୍ଡ ଖୋଲି କେବେ କିଛି କହେନି ସିଏ,

ଅନ୍ୟର ଆବଶ୍ୟକତାକୁ ପୂରଣ କରୁ କରୁ
ଚିରା ଫଟାରେ ହାଡୁଆ ଦେହ ଲୁଚାଉ ଥାଏ,

କର୍ମରେ ତତ୍ପରତା ଦେଖାଉ ଦେଖାଉ
ଭୋକ ଉପାସରେ ପେଟ ପିଠିରେ ଲାଗେ,

କି ଦିନ , କି ରାତି , କି ଝଡ଼ , କି ତାତି ..
କର୍ତ୍ତବ୍ୟ ଆଗେ ବାଧା ସବୁକୁ ଏଡାଏ ନିତି,

ବୟସ ହାତରେ ଶରୀର ତେଜ ହରାଇ ଥାଏ
ଥକା ମନ କିନ୍ତୁ ଜୀବନ ଯୁଦ୍ଧ ଜାରି ରଖିଥାଏ।

-