ಅವನೊಂದು ನನಸಾಗದ ಸುಂದರ ಕನಸು!
ನಾನು ಎಂದೆಂದಿಗೂ ಮುಗಿಯದ ಮುನಿಸು!

-

ಪೆಟ್ಟು ಬಿದ್ದ ತಕ್ಷಣ ಒಡೆದು ಹೋಗುವ ಗಾಜು
ನೀನಾಗಬೇಡ ಅರಸಿ!
ಪ್ರತಿ ಪೆಟ್ಟಿಗೂ ಸುಂದರ ಆಕಾರ ಪಡೆವ
ಜೇಡಿ ಮಣ್ಣಿನಂತಾಗು ತವಸಿ!

-

ನಿನ್ನ ಗೌರವ ನಿನ್ನ ಹಣ, ಅಧಿಕಾರ,ಸಿರಿ, ಸುಪ್ಪತ್ತಿಗೆಯಲ್ಲಿಲ್ಲ ಅರಸಿ
ಅದು ನಿನ್ನ ನಾಲಗೆಯಲ್ಲಿದೆ
ನಿನ್ನ ನಡತೆಯಲ್ಲಿದೆ ತವಸಿ!

-

ಬಡತನ ಬಂದಾಗ ಬಂಧುಗಳ ಬೆಲೆ
ಸಿರಿತನ ಬಂದಾಗ ನಿನ್ನತನದ ಬೆಲೆ
ಲೋಕಕ್ಕೆ ತಿಳಿಯುವುದು ಅರಸಿ!

-

ಸಿಲುಕಬಾರದು ಎಂದುಕೊಂಡರೆ
ಸೆಳೆತಕ್ಕೆ ಸಿಲುಕಬೇಡ ಅರಸಿ!
ಸಿಲುಕಲೇಬೇಕೆಂದುಕೊಂಡರೆ
ಸತ್ಯವಂತರ ಸಂಗದಲ್ಲಿ ಸಿಲುಕಿಕೋ ತವಸಿ!

-

ದೂರ ಮಾಡಿಕೊಳ್ಳುವುದಾದರೆ
ದುರಿತಗಳ ದೂರ ಮಾಡಿಕೋ ಅರಸಿ!
ಹತ್ತಿರ ಆಗುವುದಾದರೆ
ಪುಣ್ಯಕ್ಕೆ ಹತ್ತಿರವಾಗು ತವಸಿ!

-

ಮುನ್ನಡೆವುದೇ ಆದರೆ
ಒಳಿತಿನೆಡೆಗೆ ಮುನ್ನಡೆ....
ಹಿಂದಿರುಗುವುದಾದರೆ
ಕೆಡುಕುನಿಂದ ಹಿನ್ನಡೆ ಅರಸಿ!

-

ಏರುವುದಾದರೆ ಔನ್ನತ್ಯಕ್ಕೆ ಏರು
ಇಳಿಯುವುದಾದರೆ ಅನಂತದ ಆಳಕ್ಕೆ ಇಳಿ ಅರಸಿ!

-

ಸತ್ಯ ಭಗವಂತನಿಗೆ ಪ್ರಿಯವಾದುದು ಅರಸಿ
ಮಾನವರ ಮೆಚ್ಚುಗೆಯ ಅಗತ್ಯವಿಲ್ಲ ತವಸಿ

-

ಎಲ್ಲಾ ಕಾಲಕ್ಕೂ ಸತ್ಯವೇ ಸುಖ
ಮಿಥ್ಯವೇ ನರಕ ಶೂನ್ಯದರಸಿ!

-