वैचारिक डोक्यावर पडलेला दगड बाजूला करून ,
मी आग लागलेल्या निर्जीव गाड्यांची संख्या मोजत होतो.
माझ्या देशभक्ती वर कुणी शंका नका घेऊ
या दंगलीत सुद्धा मी "विकास" शोधत होतो....
फेकणारे हात, झेलणारी माथी जिवंत होती
मेंदू चितेवर झोपला होता आणि विचारांची रद्दी जळत होती
तरीही दंगल धुरातून धुरकट दिसणाऱ्या "हिरव्या" निसर्गाला डोळ्यात साठवत "लाल भगव्या" मातीवर पडलेल्या काचांवर उभा राहून
मी आकाशात "निळा" रंग शोधत होतो.
धर्मांध नजरेने बघत माझ्या "माणुसकीवर" कुणी शंका नका घेऊ
या दंगलीत सुद्धा मी "माणूस" शोधत होतो ...
श्रमेश बेटकर .- SHRAAMESH BETKAR
29 FEB 2020 AT 10:39