ഏവർക്കും എന്റെ ഹൃദയം നിറഞ്ഞ ഓണാശംസകൾ ❤️🫂

-

പെണ്ണെ നീ തീയാകുക
എന്നൊരിക്കൽ
പറഞ്ഞയാളെ
ഞാനിന്നു വീണ്ടും കണ്ടു

അയാളിന്ന് തെരുവിലൂടെ
ഇങ്ക്വിലാബ് വിളിച്ചു
മുന്നേറുന്നു

കേട്ടാലറക്കുന്ന
രീതിയിൽ
ഒരു പെണ്ണിനെ
കീറി മുറിക്കുന്നുണ്ട്

നഗ്നത കൊണ്ടു
അവളുടെ
ചിത്രങ്ങളെ
വികലമാക്കിയിട്ടുണ്ട്

അവളുടെ വാക്കുകൾ
പാർട്ടിയെ
പ്രതിരോധത്തിലാക്കിയത്രേ

-

ജനാലക്കരികിലിരുന്നയാൾ
ആരുടെയോ കാലടയാളങ്ങൾക്ക്
കാതോർത്തിരുന്നു ,
ആ നിമിഷം
ദൂരെ നിന്നേതോ ഒരു
കാറ്റയാളെ തൊട്ടിട്ടുപോയി ,
അരികിലിരുന്ന
ഒരു പുസ്തകം
ഒറ്റയിരുപ്പിൽ
അയാൾ മോന്തിക്കുടിച്ചു
കാത്തിരുന്നയാൾ വന്നില്ല
എങ്കിലും ആ വായനയിൽ
അയാളുടെ ദാഹം മാറിയിരുന്നു

-

മരിച്ചുപോകണമെന്ന് ആഗ്രഹിച്ച
മനുഷ്യനെ ഞാനിന്ന് കണ്ടു
ആ പഴയ കളിയും ചിരിയും നിറഞ്ഞ
അതേ മനുഷ്യൻ
കണ്ടപ്പോൾ പതിവിലും
വിപരീതമായി ഒന്ന് പുഞ്ചിരിച്ചു
മാറ്റത്തിനുള്ള കാരണമൊന്നും
ഞാൻ ചോദിച്ചില്ല
അല്ലെങ്കിൽ തന്നെ മനുഷ്യന്റെ
ഒരവസ്ഥയും സ്ഥായിയല്ലെന്നറിയുന്ന
ഞാനെന്തിനു
അങ്ങനൊരു ചോദ്യമെറിയണം

-

കടലുപോലൊരുത്തി (തീ)

നിഗൂഢമാം കടലിന്റെ
ഉൾനിരയിൽ
അവളൊരു മതിൽക്കെട്ട്

പുറമേ ശാന്തസ്വരൂപിണിയാം
ജലനിരപ്പിന്റെ നീർക്കെട്ട്

അപകടമാം മനുഷ്യർക്ക്
അവളൊരു ജെല്ലിക്കെട്ട്

മനുഷ്യരുടെ കൂട്ടുകെട്ടിൽ
അവളൊരു പഞ്ഞിക്കെട്ട്

-

നഷ്ടപ്പെടലുകൾ മനുഷ്യന്റെ
ജീവിതത്തെ തന്നെ മാറ്റിയെടുക്കും

ഒരുപാട് സംസാരിച്ചയാൾ
പിന്നീട് നിശ്ശബ്ദനാകും

കാരുണ്യത്തിന്റെ സ്നേഹസ്പർശങ്ങൾ
അവരെ തലോടാതെയാകും

മറ്റൊരാളുടെ ആശ്വാസവാക്കിൽ
പ്രതികരിക്കാനാവാതെ വന്നെന്നും വരും

അതുകൊണ്ട്
നഷ്ടങ്ങളുടെ വഴിയിൽ
നഷ്ടപ്പെടാനായിമാത്രം
ആരും തമ്മിൽ കണ്ടുമുട്ടാതിരിക്കട്ടെ

-

ഏറ്റവും മനോഹരമായത്
നഷ്ടപ്പെട്ടു അല്ലേ

അതെ

അതിൽ പരിഭവം വല്ലതുമുണ്ടോ

ഹേയ് എന്തിന്
ചുരുങ്ങിയ ജീവിതത്തിൽ
എന്തൊക്കെ നഷ്ടമാകുന്നു
എന്നുവെച്ചു ജീവിതത്തോട്
അനിഷ്ടം തോന്നാൻ തുടങ്ങിയാൽ
ഞാനീ ജീവിതത്തെ പ്രണയിച്ചിട്ടില്ലെന്നർത്ഥം

അപ്പോൾ ജീവിതത്തോട് പ്രണയമുണ്ടോ

ഉണ്ട് , നഷ്ടങ്ങളേക്കാൾ ജീവിതം
നേട്ടങ്ങൾ സമ്മാനിച്ചിട്ടുണ്ട്
ഞാനത് നേട്ടങ്ങളെ നോക്കി ജീവിക്കാൻ
തുടങ്ങിയത് മുതലാണ് മനസ്സിലായിത്തുടങ്ങിയത്

-

നിനക്കയാളെ പിടിച്ചുവെക്കാൻ
കഴിയുമായിരുന്നു അല്ലെ

അതെ ...!

പിന്നെന്തേ തടഞ്ഞില്ല

പിടിച്ചുവെക്കുന്നതിലൊന്നും
സ്നേഹം കാണില്ലെടോ
അവർ അവർക്ക് ഇഷ്ടമുള്ളവരോടൊപ്പം
ഇഷ്ടത്തോടെ ജീവിക്കട്ടെ

അപ്പൊ വിഷമമില്ലേ

ചിലതൊക്കെ ഉത്തരമില്ലാതെ
കിടക്കുന്നതാ അതിന്റെ ഭംഗി ..!

-

സ്നേഹം കൊണ്ടു
പരിചരിച്ച മനുഷ്യരെല്ലാം
പരിഹരിക്കാനാവാത്ത
മുറിവുകൾ കൊണ്ട് സമ്പന്നരാകുന്നു

-

മനോഹരമായത് മാത്രമേ
ഓർക്കുന്നുള്ളോ

അല്ല '

പിന്നെ

മനോഹരമാക്കാൻ
ഇനിയെന്താണുള്ളതെന്നുകൂടി
ചിന്തിക്കാറുണ്ട്

-