തിരിഞ്ഞൊന്നു
നോക്കിയാൽ
ഇന്നും

അതേ ഇടത്തിൽ
ഞാനുണ്ട്...!

നീയത്
അറിയുന്നില്ലെന്ന് മാത്രം !

-

തോർന്നുപോയോരു
മഴക്കാലത്തിന്റെ തുഞ്ചത്ത്
ഞാന്നുകിടപ്പുണ്ടിപ്പോഴും ഞാൻ

ഉള്ളിലൊരു വേനൽ
കത്തിയെരിയുന്നുണ്ട്
എന്നോ വറ്റിപ്പോയ
ദാഹജലത്തിന്റെ കുളിരോർമ്മയിൽ

ദിക്കറിയാതെ
ഊർന്നുപോയ വാക്കുകൾ
മൗനത്തിന്റെ കമ്പിളിയുടുപ്പുകൾ
തുന്നിക്കൂട്ടുന്നു

ഒറ്റപ്പെട്ടുപോയൊന്നൊരു വിഷാദം
കുന്നുകയറാനെന്നെയും
കൂട്ടുവിളിക്കുന്നു

കുന്നിന്റെ നെറുകയിൽ
കാറ്റിന് കൂട്ടുപോയ
ചിരിയൊച്ചകൾ
വറ്റിപ്പോയൊരു പുഞ്ചിരിയുടെ
അങ്ങേ ചില്ലയിൽ
ഊഞ്ഞാലാടി രസിക്കുന്നുണ്ട്
തോരാതൊരു മഴക്കാലം

-

അഞ്ചിതൾപ്പൂവ്

-

അത്രയേറെ പ്രിയമോടെ
വായിച്ചു മതിവരാത്ത
പുസ്തകങ്ങളേറെ
യുണ്ടെങ്കിലും

കട്ടിയുള്ള പുറംചട്ടയുള്ള
അർത്ഥമേറെ ഗഹനമായ
എന്റെ വായനയിൽ
വിഷംപുരട്ടിയ
ആ ഒറ്റപ്പുസ്തകത്തെമാത്രം
ഞാനിന്നും
ഓർത്തുവയ്ക്കുന്നു

-

എന്റെ മുറിവുകളിൽനിന്നു
നിന്നിലേക്കൊഴുകുന്ന
ആനന്ദമാണ് പ്രണയം.

-

ഉറക്കെയുറക്കെ
ഒരു കരച്ചിൽ വന്നെന്റെ
തൊണ്ടക്കുഴിയെ
കാർന്നുതിന്നുന്നു

ചുണ്ടിലെന്നോ
മുത്തിപ്പോയ ചിരികളെ
ഓർമ്മിപ്പിച്ചുകൊണ്ട് !

-

പങ്കുവയ്ക്കാനാകാത്ത നൊമ്പരങ്ങളെ
എഴുതി വറ്റിക്കാനാകാത്ത കവിതകളെ
ഉള്ളിൽ തിരയടിക്കുന്ന
ആത്മസംഘർഷങ്ങളുടെ കടലുകളെ
ഉഷ്ണ മരുഭൂമിയിലേക്ക് ചുഴറ്റിയെറിഞ്ഞ
വാക്കുകളുടെ തീക്കനലുകളെ....

മറക്കാനാണ് ഞാനിന്ന്
ലിപിയറിയാത്ത അക്ഷരങ്ങളിലൂടെ
അർത്ഥം ഗ്രഹിക്കാത്ത വാക്കുകളിലൂടെ
എന്റെ ഹൃദയമെഴുതി നിറക്കുന്നത്

-

ഇനിയുമെന്നെ
പൊള്ളിച്ച്
മടങ്ങുക നീ...
ഉരുകുന്ന
താപങ്ങളിലിടനെഞ്ച്
പിടയുമ്പോഴും
വെയിൽ വീണ
വഴികളിലൊരു
തണൽ തരാതെ
പോക നീ...

-

അതിരുകളില്ലാത്തതാണ്
അതിൽ നിറയുന്നതോ
സ്നേഹത്തിന്റെ ലിപിയും

ഒരു കരസ്പർശത്താൽ
അന്യന്റെ ചുണ്ടിൽ
വിരിയിക്കാൻ കഴിയുന്ന
ഏറ്റവും ഹൃദ്യമായ
ഒന്നാണ് പുഞ്ചിരി

ഹൃദയത്തിൽ നന്മയുടെ
വെളിച്ചമുള്ളവർക്ക് മാത്രമേ
മറ്റൊരാളിൽ പുഞ്ചിരി
കൊളുത്തി വയ്ക്കാൻ കഴിയു

-

നിന്നുതിർന്ന് വീഴും
കുങ്കുമ രേണുക്കൾ
ശോണിമയേറ്റും
വിണ്ണിൻ കവിൾത്തടങ്ങൾ
അകലെ മറയുമ്പോൾ
അനുരാഗമോടെ
പകലിലെഴുതി മായ്ക്കുന്നു
പരിഭവമൊഴികൾ...

-