ಪ್ರೀತಿ-ನಂಬಿಕೆಗಳು;
ಅನರ್ಘ್ಯ ಮತ್ತು ಅಮೂಲ್ಯವಾದಂತವಾದ್ದರಿಂದ,
ಕೆಲವರಿಗೆ ಅರ್ಥೈಸುವ ಸಲುವಾದರೂ
ಸುಮ್ಮನೆ ತಿರಸ್ಕರಿಸುವುದು ಒಳಿತು;
ನೈಜತೆ ಇದ್ದರೆ ಮತ್ತಷ್ಟು ಗಟ್ಟಿಯಾಗಲಿ,ಜಳ್ಳಾಗಿ ನಟಿಸುವಂತದ್ದಾಗಿದ್ದರೆ ಗಾಳಿಗೆ ತೂರಿಹೋಗಲಿ.
ಸಾರವೇ ಸಾಮರಸ್ಯ.!

-

ದೈವ.!

ಕೆಲ ವ್ಯಕ್ತಿ ಚಿಂತನೆಗಳು,
ಯಾವುದು ಸತ್ಯ ಯಾವುದು
ಮಿಥ್ಯ ಎಂಬ ಗೊಂದಲಕ್ಕೆ ಬಿದ್ದಿವೆ.!

ಕೆಲ ಅಪೇಕ್ಷೆ ತುಂಬಿದ ಮನಗಳು
ಬೇಡಿಕೆಯ ಮುಂದಿಟ್ಟು ಲಾಭ
ನಷ್ಟದಲ್ಲಿ ಭಕ್ತಿಯನ್ನ ಅಳೆಯುತ್ತಲಿವೆ.!

-

ಸವಿನುಡಿ.

ಶ್ರಮಕ್ಕೆ ಉತ್ತೇಜನ ಮನಸ್ಸು,
ಮನಸ್ಸಿಗೆ ಉತ್ತೇಜನ ದೃಷ್ಠಿ,
ದೃಷ್ಠಿಗೆ ಉತ್ತೇಜನ ಹೃದಯ,
ಆ ಹೃದಯವೊಂದು ಪರಿಶುದ್ಧವಾಗಿರಲಿ
ಯಶಸ್ಸಿನ ಮಾರ್ಗ ಸುಲಭವಾಗ್ತದೆ.

-

ಮಾತು ಬಂದರೂ ಭಾವನೆಗಳೇ ನಶಿಸಿಹೋಗಿರುವವರನ್ನ ಮೂಗರೆನ್ನದೆ;
ಭಾವನೆಗಳ ಜೀವಂತವಾಗಿರಿಸಿ ಮಾತುಬಾರದವರನ್ನ ಮೂಗರೆನ್ನಲಾದೀತೆ.!?

-

ವಿದಾಯವನ್ನ
ವಿಸ್ತೃತವಾಗಿ
ವಿವರಿಸುವುದಕ್ಕಾದರೂ
ವಿಷದವಾಗಿದ್ದರೆ;
ವಿಷಾದವೆಲ್ಲ
ವಿಷವಿಲ್ಲದಂತೆ
ವಿಸರ್ಜಿತವಾಗಿ
ವಿರಮಿಸಬಹುದು.

-

ಯಾವುದೋ ಕ್ಷುಲ್ಲಕ ಕಾರಣದಿಂದ ವೈಮನಸ್ಯಬೆಳೆಸಿಕೊಂಡು ತನ್ನವರನ್ನೇ ತೊರೆದುಕೊಂಡು,
ಅನ್ಯ ವ್ಯಕ್ತಿಗೆ ಸಹಾಯ ಹಸ್ತ ಚಾಚಿ ಬರಸೆಳೆದರೆ,
ಬಂದವರು ಬಿಡುವರೆ ತಮ್ಮ ಸ್ವಾರ್ಥದ ಲಾಲಸೆಯ.!?

-

ಮನ ಮತ್ತು ಮನೆಯ ವಾತಾವರಣವನ್ನ
ಎಷ್ಟರಮಟ್ಟಿಗೆ ಸಾಧ್ಯವೋ ಅಷ್ಟು ಶುಭ್ರವಾಗಿಡಲು ಯತ್ನಿಸುತ್ತಲೇ ಇರಬೇಕು;
ನೈರ್ಮಲ್ಯ ಯಾವತ್ತಿಗೂ ಆಹ್ಲಾದವೇ.!

-

ಅರಿಕೆ.

ನನ್ನ ಬೇಡಿಕೆಗಳೇನಿಲ್ಲ ದೇವ,
ಅಪ್ಪನ ಕನವರಿಕೆಯ ಮನಕೆ,
ಕನಸಿನಲ್ಲಿ ಸಂಭಾಷಿಸುವಂತಹ
ವರವೊಂದನ್ನಿತ್ತುಬಿಡು ಸಾಕು.

-

ಸೇಡು
ಜನ್ಮತಾಳಿದ
ಮರುಘಳಿಗೆಯೆ
ಮನುಷ್ಯತ್ವಕ್ಕೆ
ಸಾವು.

-

ಅಪ್ಪ.

ಹುಟ್ಟಿಗೆ ಕಾರಣನಾಗಿ
ಒಲವಿನ ಕಡಲಾದವನು.
ಜ್ಞಾನದ ಬುತ್ತಿಯಾಗಿ
ಅಜ್ಞಾನವ ತೊಳೆದಾಕಿದ
ಜ್ಞಾನಿಯವನು.
ಬೆರಳ ತುದಿಯನಿಡಿದು
ಜಗವ ಪರಿಚಯಿಸಿದವನು.
ಅಂಜಿಕೆಗೆ ತಿಲಾಂಜಲಿ
ಹಾಡಿ ಹೆಜ್ಜೆಹೆಜ್ಜೆಗೂ
ಧೈರ್ಯತುಂಬುತ
ಜೊತೆನಡೆದ ಕೆಚ್ಚೆದೆ
ಧೈರ್ಯಶಾಲಿಯವನು.
ಬದುಕಿನ ಬವಣೆಗೆ
ಬೆನ್ನಮೇಲಿನರಿವೆಹರಿದರು
ಎಲ್ಲರೆದುರು ತಿಳಿನಗುವನ್ನ
ಹರವುವ ಸಮಚಿತ್ತನವನು.

-