जय हरी विठ्ठल
बोल तो बोलावा
कोरड्या देहातही
विठ्ठलच ओलावा.

-

नजरेत नाही भाव
इतकं कोरडं गाव
हाती सारं तुझ्याच
कुठेही वसाहत लाव

-

न्याहाळणं संपूच नये
तुझं पावसाला ,माझं तुला
बाधेची परिसीमा अशी की
बोलू लागतोच अबोला..

-

आयुष्य ही एक कथा आहे
अनपेक्षित वळणांनी भरलेली
अंदाज इथले बेभरवशाचे
कित्येक गणितं चुकतात आपली

-

कष्टाची भाकर जड
परी लागते रुचकर
चव आत्मियतेची
समाधानाचा ढेकर...

-

गरज आहे म्हणून
फक्त ओरबाडू नये
सुख दुसऱ्याचं पाहून
विनाकारण रडू नये..

-

एक कवडसा हक्काचा
आशेवरती नाव कोरतो
एक कवडसा एकांताचा
जागृतीचेही भान पेरतो..

-

फरक फक्त समजूतीचा
मांडाल ते ते व्यथा होते
मर्म जाणले अस्तित्वाचे
अक्षरही मग गाथा होते...

-

शेवटचा शब्द...
शेवटी,
सगळ्यांच्याच
कुठे नशिबात असतो.
हल्ली,
नात्याची सुरुवात
होण्याआधीच बरेचदा,
शेवट होतो.

-

चुकीचं आहे त्याचंच
स्तोम आहे माजलेलं
कुरघोडीच्या जगात..
सत्य मात्र लाजलेलं

-