वर्ष उलटते बघता बघता मागे सरते तारीख वार
डगमगल्या डबडबल्या देही जरी यातना थोड्या फार,
तेंव्हा सोडायाचा असतो काळासोबत मागे ताण
जगणे होते फुलासारखे जगण्याचे मग होते रान...

-

तुझा तुझा हा तुझाच केवळ मला भुलवतो साज सखे,
मोरपिसाच्या स्पर्शाइतका तुझा गोड अंदाज सखे.

तुला भेटल्यानंतर मजला इतके कर्ज मिळाले की,
कशी तुझी मी मुद्दल फेडू कसे भरू मी व्याज सखे..

-

मार तू जोरात ठोकर पण तुझे तू कर मला
जीवना आता नको रे तू करू बेघर मला.

हा तुझ्यावाचून माझा जीव का व्याकुळतो
एक तर तू सोड किंवा एक तर तू धर मला..

-

कुंपणाच्या आत जैसा मोगरा बागेत आहे,
सोड तू साऱ्या कुशंका मी तुझ्या कैदेत आहे.

मी कुण्या चिंतेत आता यापुढे असणार नाही,
काळजी माझ्या मनाची कृष्ण माझा घेत आहे..

-

वेग थबकतो वाऱ्याचा दारावर दस्तक होते
नाजूक वयाचे तोरण का उगाच सळसळ करते
सगळे असते जागेवर का तरी रितेपण येते
भय इथले संपत नाही मज तुझी आठवण येते...

-

किती जीवाला त्रास तुझा हा
सांग सावळ्या कृष्णा
डोळ्यामध्ये तुझेच गोकुळ
वाट पाहते आहे...

-

तुझे उनाड केस तू उगाच सावरू नको
अशात तू मला तुझ्या जवळ बिवळ करू नको.

खळाळतो समुद्र हा तिच्या मनात रोजचा
बुडून जा तिच्यामध्ये उगाच तू तरू नको..

-

बसस्टॉप वरचं रेंगाळलेपण
जिवंत असतंच की आत.
भावनांची रेलचेल जरी सुरु असली तरी
काही आठवणी स्थितप्रज्ञ असतात,
पुतळ्यासारख्या..
ती जागा, तो आवार आणि
त्या भोवतालचा वावर
फार फार तर आठवू शकतो आपण.
पावसानं छत्रीवर निरंतर बरसत राहावं
आणि छत्रीनं मात्र आतली उब राखून ठेवावी.
काही माणसाचंही तसंच...

-

कुण्या जिवावर जडतो आपण
खोल तळाशी पडतो आपण.

किती शहाणे वय असूनही
वेड्यापरी बिघडतो आपण..

-

तुला पाहताना असे वाटते की
जणू मोगऱ्याची खरी बाग तू,
तुझ्या काळजीला उभा देह माझा
तुला जे हवे ते सखे माग तू..

कधी सोनचाफा कधी रातराणी
किती गंध येतो तुझ्या कुंतली,
किती बारकावे तुझ्या चेहऱ्यावर
तुला ईश्वरानेच रेखाटली..

-