ಅವಳ ಶಿರದಲಿರುವುದು ಮುಕುಟ-ಕಿರೀಟ,
ಅವಳ ಹಿಂದಿರುವುದು ಕರುನಾಡ ಬಾವುಟ
ಅವಳ ಹಣೆಯಲಿರುವುದು ಅರಿಶಿಣ-ಕುಂಕುಮದ ಬೊಟ್ಟು,
ಅವಳು ಸಲಹುವಳು ತನ್ನ ನೆಲದ ಕಂದಮ್ಮಗಳ ಪಣತೊಟ್ಟು
ಅವಳ ಮೂಗಿನಲ್ಲಿ ಹೊಳೆಯುವುದು ಕೆಂಪಾದ ಮೂಗುತಿ,
ಅವಳ ಕಂಡರೆ ಸಾಕು ಉಕ್ಕುವುದು ಮನದಲಿ ಭಕುತಿ
ಅವಳ ಕೆನ್ನೆಗಳ ಮೇಲೆ ರಾರಾಜಿಸುವುದು ಹಳದಿ ಅರಿಶಿಣ,
ಅವಳು ನೀಡಿರುವಳು ಕನ್ನಡ ಸಾಹಿತ್ಯ ಗ್ರಂಥಗಳ ಹೂರಣ
ಅವಳು ನುಡಿಯುವ ಅಧರಗಳು ಕೆಂಪು ಸೂಸುವ ಕಂಪು,
ಅವಳ ನಾಡಿನ ಹಾಡು ಹಾಡಲು-ಕೇಳಲು ಬಲು ಇಂಪು
ಅವಳ ಕತ್ತಿನಲ್ಲಿರುವುದು ಸೂರ್ಯರಶ್ಮಿಯಂತೆ ಕಂಗೋಳಿಸುವ ಚಿನ್ನದ ಆಭರಣ,
ಅವಳ ನೋಟದೊಳಗೆ ಸಂಚಲಿಸುತಿರುವುದು ಹೊನ್ನಕಿರಣ
ಅವಳು ಉಟ್ಟಿಹಳು ನಿಸರ್ಗದ ಹಸಿರು ಬಣ್ಣದ ಸೀರೆ,
ಅವಳೇ ನಮ್ಮ ವೀರ ವನಿತೆಯರಲ್ಲಿ ಕಾಣುವ ನೀರೆ
-
ಜೀವನದೊಂದಿಗೆ ಕಲಿಕೆಯು ನಿರಂತರ....
-✍️🌄 ಸೂರ್ಯರಶ್ಮಿ🌅👸🪄