வெட்டி முடிக்கும் வரை
அவனுக்கும் ஆக்சிஜன் தந்தது
அந்த மரம்!

-

எவ்வளவு பருகினாலும்
தணிவதில்லை இந்தத் தாகம்
இதழ் முத்தம்!!

-

கனவுகள் இல்லாத வாழ்க்கை
தேங்கி நிற்கும் நீர் போல
பாசி படிந்து பாழாகும்!!

-

பூத்துவிட்டாள் மகள்
தாயால் முகர முடியவில்லை
வறுமையில் குடும்பம்!!

-

நூறு முறை கொடுத்தாலும்
டிஜிட்டல் முத்தங்களில்
ஈரமும் இல்லை,
லிப்ஸ்டிக் கறையும் இல்லை!!

-

புதிதாக கட்டிய வீட்டில்
தூக்கம் வரவில்லை
விடிந்தால் தவணை நாள்!

-

காற்றடிக்கும் திசையில்‌‌
தலை சாயும் ஒரு புல்லைப் போல,
நீ நடக்கும் பாதச்சுவட்டில் பயணிக்கிறேன்
நானும் உந்தன் காதல் திசையிலே..

-

யாருமற்ற நாட்களில்
அமைதியின் சப்தம்
காதைக் கிழிக்கும்,
மார்கழிப் பனி
வெந்நீராய்ச் சுடும்,
பன்னீர் ரோஜாக்கள்
மணம் வீசுவதில்லை..

இதயம் மட்டும்
வெறுமையில் துடிக்கும்..

-

கவலைகள் கழுத்தை நெரிக்கும்
இரவுகளில் எல்லாம்
உருமாறிக் கொள்ளும் ஒரு சக்தியை
வரமாக‌ எனக்கு அந்தக் கடவுள்
தந்திருக்கிறார் போல!!

ஏனென்றால்,
தூக்கம் தொலைத்த ஆந்தையாக
இரவு முழுவதும்
கட்டிலில் உருளுகிறேனே!!

-

கருங்கல்லாக இறுகிய மனதும்
இனிப்பான கற்கண்டாகச் சிதறிவிடும்
அவள் ஒற்றைச் சிரிப்பினிலே!

-