অধিকাৰ
(Read the caption)

-

আকৌ লগ পাম দিয়া,
জীৱনৰ কোনোবাটি কেকুৰিত;
তেতিয়া হয়তো সন্ধিয়া হ'ব!
ঘৰমুৱা পক্ষীজাকৰ কৰিলিত
অস্তমিত সুৰুযৰ ৰাঙলী আভা
জিলিকি ৰ'ব দুচকুত।
এতিয়াৰ দৰে সেই সন্ধিয়া
চঞ্চলা নহ'বও পাৰে,
তথাপি, তোমাৰ উপস্থিতিত
ঠেহ লগা সপোনবোৰেও
খিলখিলাই হাঁহিব!

-

বৰ বেইমান হে
এই হৃদয়খন,
যেতিয়াই তেতিয়াই
যাৰে তাৰে
প্ৰেমত পৰি যায়!
কেতিয়াবা আকাশৰ,
কেতিয়াবা সাগৰৰ,
কেতিয়াবা বৰষুণৰ;
এতিয়া অৱশ্যে
ফুলৰ প্ৰেমত পৰিছে,
শেৱালী ফুলৰ...!!!

-

কি ভাবেনো কওঁ
নিজকে জীৱ শ্ৰেষ্ঠ মানৱ বুলি??
নাই নাই
মানৱতা তিলমানো নাই,
নাই মমতাময়ী স্নেহ,
কিম্বা সহানুভূতি...
আছে মাথোঁ, পাষাণ হৃদয়;
যি কেৱল হিংসা, ভেদাভেদ
আৰু প্ৰতিশোধৰ থল...
শূলে বিন্ধাদি বিন্ধিছে
বুকুখন আজি,
শগুন চকুৱা শৃগাল জাকৰ কিৰিলিত
কলিতেই মৰহিল ফুলপাহি...
কিয়?
কিহৰ বাবে??
লাজ নালাগে নে ?
নিজকে জীৱ শ্ৰেষ্ঠ বুলিবলৈ!!

-

ৰুগ্ন সময়,
স্তব্ধ জীৱন,
চৌদিশৰ
মৃত্যুৰ কিৰিলিত
কম্পিত মন....
উফ!
আৰু কিমান দিন???
😞😞😞

-

হঠাতে আজি,
তুমি নামৰ অনুভূতিয়ে
টুকুৰিয়াই গ'ল হৃদয়ৰ দুৱাৰত;
এৰাহ!
আজি কত বসন্ত পাৰ হ'ল,
তুমি যেন হেৰাই গ'লা ক'ৰবাত..
মাথোঁ আঁকি থৈ গ'লা মোৰ হৃদয়ত,
এখনি আধৰুৱা প্ৰণয়ৰ ছবি!
আজিও আমনি কৰে জানা,
তোমাৰ সেই স্বপ্নাসিক্ত নীলাভ নয়ন জুৰি;
আস! ইমান গভীৰ..…
মন যায় কেতিয়াবা,
জ্যোতিৰ্ময়ী জোনাকী নিশা
মুক্তাকাশৰ তলত বহি
প্ৰণয়ৰ গীত গাবলৈ..!
মন যায় ,
তোমাৰ স'তে
বাৰিষাৰ বৰষুণজাকত তিঁতিবলে..!
আৰু তোমাৰ হাতত ধৰি ,
খোজ দিব মন যায়
জোনাকৰ দিশে....
কিন্তু,
কিন্তু এই ক্ষণ-ভংগুৰ নিষ্ঠুৰ সময়ে,
বাৰে বাৰে তোমাৰ অনুপস্থিতিৰ কথাকে সুৱৰাই..
তুমি হীনতাত দগ্ধিত হৃদয়টিক কিদৰেনো বুজাও ,
তুমি যে এতিয়া বহু দূৰত.....!

-

মোৰ বাবে ফুল চিঙি নানিলেওঁ হ'ব তুমি,
পাৰা যদি এজোপা শেৱালী ৰুই দিয়া..
সুগন্ধিয়ে আমোল-মোলাই তুলিব
তোমাৰ মনৰ পদুলি...!

-

তেওঁ বৰষুণ বেয়া পায়,
বৰষুণ মোৰ বৰ প্ৰিয়..
তেওঁ কবিতা বেয়া পায়,
কিন্তু কবিতা মোৰ প্ৰথম প্ৰেম!
তেওঁ জীৱন গঢ়িব বিচাৰে,
মই বিচাৰোঁ জীৱনটো উপভোগ কৰিবলৈ..
এৰাঃ আমি দুয়ো এখন নদীৰ দুটি পাৰ..!!

-

নিজৰ দুৰ্বলতা কেতিয়াও আনৰ আগত প্ৰকাশ নকৰিবা..
কিয়নো, এই পৃথিৱীত সুবিধাবাদীৰ অভাৱ নাই..!!

-

বিনিদ্ৰ ৰজনী..
পোৱা নোপোৱাৰ লেখ-জোখ,
ক্লান্ত মনটিক ক্ষান্ত কৰাৰ চেষ্টা,
নাই ক্ষান্ত হোৱাৰ কোনো উম-ঘামেই নাই;
স্বপ্নাতুৰ দুচকুত সূৰ্যোদয়ৰ অপেক্ষা..
তাৰপাছতেই আৰম্ভ হ'ব জীৱন-যুঁজৰ নতুন আখৰা!!

-