भेटलो जर पुन्हा नव्याने
भेट कोरून ठेवशील का
गंधाळलेली भेट एक वेडी
तुझ्या मनी लपवशिल का

-

दोन ओळीत लिहते जगण्याचा सार
शब्द तिचे भेदतात हृदयास आरपार

कोत्या मनावर करते लेखणीने प्रहार
बोथट समाजावर शब्दांनी करते वार

शब्दांवर राहावी अशीच माया अपार
जीवनात राहो नेहमी आनंदाचा बहार

सुखचांदण्यांची बरसात व्हावी वारंवार
समाधानाने भरलेलं असावं मन भांडार

Happy birthday dear Kajal
🎂🍫💐🌹🥳🎉🥰

-

ऊन पावसाचा खेळ श्रावण
हर मनातला हिरवळ श्रावण
डोळ्यातला खळखळ श्रावण
मनी भिनलेला दरवळ श्रावण

-

लेखणी गहिवरलेली
शब्दांत वेदना मांडता
शाई थोडी पसरलेली
वाचताना थेंब सांडता

-

आयुष्य जगले साऱ्यांसाठी
जगले नाही फक्त स्वतःसाठी
किती काही केले कोणासाठी
तरी उकलल्या नाहीत गाठी

-

प्रिय स्नेहू....

अर्थपूर्ण आणि भावपूर्ण तुझी लेखणी
गोड आणि निर्मळ मनाची तू ग राणी

गोबऱ्या गालावर,स्मितहास्य हलकेसे
तुझ्या जीवनी येवो आनंदाचे कवडसे

तुझी छोटीशी भेट,नेहमीच आठवते
कधी भेटशील पुन्हा हेच मला वाटते

तुझा चेहऱ्यावरचे मौन फार बोलके
हळवे शब्द तुझे वेचक आणि शेलके

गजल तुझी गाजत राहो ही प्रार्थना
वाढदिवसाच्या तुला मंगल कामना

Wish you a very happy birthday dear 🥰🍫 🎂

-

प्रिय पुष्पा ताई.....

नजर प्रेमळ नी स्वभाव हळवा
बोलण्यात तिच्या किती गोडवा

शब्दांना जणू करते ती जिवंत
देते सूर्यास शब्दांचे अर्घ्य अनंत

जीवनात तिच्या राहो हिरवळ
शब्दबागेत वाहो तिचा परिमळ

वाढदिवस व्हावा असाच खास
आनंदाची व्हावी नित्य आरास

जीवन हर्षात न्हावो ही सदिच्छा
ताई वाढदिवसाच्या खूप शुभेच्छा

-

तुझ्या गळा माझ्या गळा
हवी एक घट्ट चांदणमिठी
आपल्या हातांचे हार गुंफू
मनाच्या घेऊ गाठीभेटी

तुझ्या गळा माझ्या गळा
सप्तसुरांचा लागू दे लळा
एक होऊ दे स्वर आपुले
नकोच विरहाच्या झळा

तुझ्या गळा माझ्या गळा
नको शपथांचा केकाट
प्रेमाचा एकच शब्द असो
मंजुळ घंटेचा किनकिनाट

तुझ्या गळा माझ्या गळा
सत्य शब्दांचा सडा पडो
विश्वास नांदो एकमेकांत
प्रेम कलेकलेने सदा वाढो

तुझ्या गळा माझ्या गळा
आनंदाचे बांधू कंठबंध
वचन न घेताही आपण
राहू वचनास कटीबद्ध

-

तुझ्या गळा,माझ्या गळा
आज दाटला का उमाळा

पुरल्या कडू आठवणी त्या
नकोशा आठवांना उजाळा

किती बोचते शल्य काळजा
दाटून हुंदका,वाहते काजळा

खपली उगाच तू काढू नको
वेदनांचा आवेग भळाभळा

भरून आले आभाळ माझे
थोपव तू ही तुझ्या आभाळा

शब्द अडकले रे सख्या
तुझ्या गळा माझ्या गळा

-

तुझे गीत गाण्यासाठी
तूच हो मेघमल्हार
गीतात तू बरसून जा
भिजून जरा अलवार

तुझे गीत गाण्यासाठी
होऊन ये रानवारा
बेधुंद हो,बेभान हो
पिऊन ये तू पारा

तुझे गीत गाण्यासाठी
येशील का रे पाखरा
मंद मंद शीळ घालत
साद घाल फुलपाखरा

तुझे गीत गाण्यासाठी
विनवू आपण सागरा
हात हाती घेऊन किनारी
गीतात भिजू आज जरा

तुझे गीत गाण्यासाठी
घेऊन ये तूच शब्द
रुणझुणतील तुझ्या ओठी
मी ऐकत राहीन स्तब्ध

-