வெயிலோடு பெய்து
கொண்டிருந்த
மழையிலிருந்து,
வானவில் திருடி.,

சட்டை பைக்குள்
மறைத்து.,

யாருக்கும்
தெரியாமல் எனக்கு
தின்ன கொடுத்தான்.,

தெரியுமா, அதன்
ஒவ்வொரு
வண்ணத்திலும்
ஒவ்வொரு சுவை..!!

-

சாப்பிட்டு பின் கை துடைக்க
புடவையை நீட்டுகிறாய்.,
சலிப்பு தட்டி நான் படுத்துறங்க,
விபூதி பூசி, ஊதி விடுகிறாய்.,
வேலையில்லா
வேளையிலெல்லாம், என்
சட்டைபையில் உன்னிடம்
இருப்பதை திணித்து செல்கிறாய்.,

ஏதுமற்ற வாழ்வென்றாலும்.,
மிகையற்ற பேரன்பில்
எல்லாமுமாய் இருக்கின்றாய் நீ..!!

-

பால்யத்தில், அம்மா
சோறு ஊட்டும்
காலத்திலிருந்தே
நிலவு பரிச்சயம் தான்.,

உன் வருகைக்கு
பின்பான நிலவுக்கு
தான்.,

வயதிற்கு
வந்து விட்டபின்.,
முதன் முதலாய்
பார்த்த அத்தை
மகளின் சாயல்..!!

-

முழு நிலவு
நாளொன்றில்
தான்.,

தொடாத
தூரங்களையும்.,

அலைகள்
தொட்டு
விடுகின்றது..!!

-

சகி, இப்படி அண்ணாந்து,
அண்ணாந்து பார்த்து
வானில் நீ தேடி
கொண்டிருப்பது நிலவையா..?

உனக்கு பிடிக்குமென
அந்த நிலவை நூல் கட்டி
இழுத்து.,

உன் படுக்கை அறையின்
ஜன்னல் கம்பியில் கட்டி
வைத்திருக்கிறேனே,
கவனிக்கவில்லையா நீ..!!

-

அவளின்
கோபத்திற்குள்
ஒளிந்திருக்கும்
காதல் பேரழகானது.,

கடை வீதியின்
சண்டைகளுக்கு
மத்தியிலும்.,

ரோட்டை கடக்க,
கை பிடித்து
கூட்டிப் போவாள்..!!

-

எனக்கு
பெண்ணின்
கண் பார்த்து
பேசத்தெரியும்.,

என்னை,
கண் கொட்டாமல்
பார்க்கும் உன்னிடம்
மட்டும் தான்.,

அது ஏனோ,
அத்தனை
கடினமானதாய்
இருக்கின்றது..!!

-

கடிக்காத கருப்பு
சிற்றெரும்புகளை
தெரியுமா.?

கோவில் தூணின்
மூலையில், அவள்
வைத்து போகும்
பொங்கலுக்காய்
அவை காத்திருக்கும்.,

அந்த கருப்பு எறும்புகளை
உங்களுக்கு பிடிக்குமென்றால்.,

அவளை காண, ஏதோ
ஒரு தூணின் மூலையில்
ஒளிந்திருக்கும், என்னையும்
உங்களுக்கு நிச்சயமாய்
பிடிக்கும்..!!

-

இன்னும்
நினைவிருக்கிறது.,

நீயற்ற
அவ்வீட்டின்
முகவரி..!!

-

உதட்டை கடித்து
விட்டதாய் கோபம்
கொள்கிறான்.,

தேனீக்களிடம் கடி
வாங்கித்தானே
தேன் குடிக்க
முடியும்..!!

-