കർഷക സമരം
.........................................
ഓർമ്മകൾ ഉഴുതുമറിച്ച ചിന്തപാടത്ത്
സ്വപ്‌നങ്ങൾ വളമിട്ട് ഞാൻവിതച്ച
അക്ഷരവിത്തുകളുടെ വരികതിരുകൾ
കൊത്തിയകലുന്ന അഴൽകിളികളെ
എനിക്ക് ജീവനേകുന്ന ഓർമകൾക്ക്
ഒപ്പീസുചൊല്ലുവാൻ ഒരുപിടി അക്ഷരങ്ങൾ അവശേഷിപ്പിക്കുവാൻ അപേക്ഷ.....

-

പ്രണയപരിണാമങ്ങൾ
.....................................
പ്രണയം അമൃതാണ്
മരണത്തെ സ്വപ്നംകണ്ടവന്
അത് ജീവിതമേകിയേക്കാം
പ്രണയം വിഷമാണ്
ജീവിതം സ്വപ്നംകണ്ടവനെ
അത് മരണത്തിലേക്ക് നയിച്ചേക്കാം
പക്ഷെ ഇന്ന് ചിലപ്രണയങ്ങൾ കോടതിയും
പ്രണയിക്കുന്നവർ ആരാച്ചാരുമായിരിക്കുന്നു തിരസ്കരിക്കുന്നവരെ അവർ
വധശിക്ഷക്ക് വിധിച്ചേക്കാം.....

-

ഉണ്ടായിരുന്നു
.......................
പ്രണയമുണ്ടായിരുന്നു
ഹൃദയത്തിൽ വേരിറങ്ങാത്തതിനാൽ
അവിശ്വാസകാറ്റിൽ കടപുഴകിപ്പോയി
വിരഹമുണ്ടായിരുന്നു
വയറിനെ വിശപ്പ്‌ പ്രണയിച്ചപ്പോൾ മറവിമഴയിൽ ഒലിച്ചുപോയി
സ്വപ്നങ്ങളുണ്ടായിരുന്നു
വിരിയാത്ത മൊട്ടുപോൽ
യാഥാർത്യവേനലിൽ കരിഞ്ഞുപോയി
എന്നെ അറിയുന്നൊരു ഞാനുണ്ടായിരുന്നു
സ്വയം കള്ളംപറഞ്ഞതിൽ മനംനൊന്ത്
ഹൃദയംപൊട്ടി മരിച്ചുപോയി.....

-

ഓർമകളിൽ ജീവിച്ച ഞാൻ
ഓർമയാകുന്ന ഒരുനാൾ
മാറിടത്തിൽ ആറടിപകുത്തുതന്ന
ഭൂമിദേവിക്ക് നന്ദിയായ്
അവിടെ ഓർമകളുടെ
മൂളിപാട്ട് കേട്ടേക്കാം
നിങ്ങൾ അവിടം
ഖബർ എന്നുവിളിച്ചാലും
കല്ലറ എന്നുവിളിച്ചാലും
പട്ടട എന്നുവിളിച്ചാലും
മതമില്ലാത്ത ഓർമകളിൽ ഒരുമനുഷ്യനായ്
മരിക്കാത്തമനസ്സുകളിൽ ഒരു നല്ലഓർമയായ്
ഇനിയും ഈഭൂമിയിൽ ജീവിക്കാൻ
ഞാൻ ആഗ്രഹിക്കുന്നു എന്ന്
ഉറക്കെ വിളിച്ചു പറയുന്ന
എന്റെ ഓർമകളുടെ മൂളിപാട്ട് ......

-

പരിണാമാവസാനം ഇരുകാലിൽനിന്ന മനുഷ്യൻ
കാട് വീടാക്കാൻ മലകയറിയപ്പോൾ
നാൽക്കാലി മൃഗങ്ങളായിരുന്നു ശത്രു
മൃഗങ്ങളൊഴിഞ്ഞ കോൺക്രീറ്റ് കാട്ടിൽ
അവന്റെ ശത്രുവിന് രണ്ടുകാലു കുറഞ്ഞു
അപരന്റെ മതം അവനു ശത്രുവായി
ജാതിയും നിറവും അവനു ശത്രുവായി
മനുഷ്യനും മനുഷ്യനുമിടയിൽ മതിലുയർന്നു
മഹാപ്രളയത്തിലും മാറാവ്യാധിയിലും
മാറാത്ത മനസ്സാണ് മനുഷ്യനിന്ന് ശത്രു......

-

ജനനം എന്ന സത്യത്തിൽനിന്ന്
മരണം എന്ന സത്യത്തിലേക്ക്
മനസ്സാവുന്ന ഗർഭപാത്രത്തിൽ 'സ്വപ്നം'എന്ന ഭ്രൂണവും പേറിയുള്ള യാത്ര?

-

'വെളിച്ചം'ഇരുട്ട് ഭയക്കുന്ന 'വെളിച്ചം'
.........................................................
മനുഷ്യരൂപം പേറുന്ന വെറിമൂത്തപിശാചുക്കൾ
ജീവന്റെ പാലൂട്ടേണ്ട മാറിടം മുറിച്ചു
രക്തം കുടിച്ചു ദാഹമകറ്റുന്ന ഭൂമിയിൽ
കണ്ണ് മൂടിക്കെട്ടിയ നീതിദേവതേ
നീയാണ് ഭാഗ്യവതി
കല്ലിലായാലും മരത്തിലായാലും
കൊത്തിവച്ചത് മനുഷ്യരൂപമാണെങ്കിൽ
കരളലിയും കണ്ണുനിറയും
കട്ടപിടിച്ച രക്തത്താൽ കറുത്ത
മഹത്തായ നീതികരിമ്പടത്താൽ
കണ്ണുകൾ ഇനിയും ഭദ്രമായി മൂടികെട്ടുക
ജ്യോതിയിൽ നിറയുന്ന തിമിരകാഴ്ചകളിൽ നിന്ന്
ഉണ്ടെന്ന് വിശ്വസിക്കുന്ന നീതിയുടെ
തമസ്സിലേക്ക് ഗമിച്ചാലും..........

-

.....

-

....

-

In
Caption

-