ಕಾಲವು ವಿಸ್ಮಿತ,
ಇರಲಿ ಮನವು ಮಂದಸ್ಮಿತ
ಇಂದಿರುವುದ ನಾಳಿಲ್ಲ,
ನಾಳೆಯದು ಕಂಡಿಲ್ಲ
ಕನಸೊಂದು ಎಳೆದೊಯ್ಯುವುದು
ನಾಳೆಯ ನಗುವಿಗೆಂದು,
ಆ ಕನಸಿಗಾಗಿ ಮಾಸದಿರಲಿ
ಇಂದಿನ ಮಗು-ನಗುವು.
ನಾಳೆಯು ನಮ್ಮದಲ್ಲ,
ಕನಸು ನಮ್ಮದಾಗುವುದೋ ಗೊತ್ತಿಲ್ಲ
ಕಳೆಯುವ ಈ ಕ್ಷಣವೊಂದೇ ನಮ್ಮದು
ನಾವು ಅನುಭವಿಸುವುದು.
ಕಾಲವು ವಿಸ್ಮಿತ, ಇರಲಿ ಮನವು ಮಂದಸ್ಮಿತ.

-

ಬದುಕು ಹಳೆಯದಾದರೂ ಭಾವ ಹೊಸತೇನೊ
ಹೊಸತಿನಲ್ಲಷ್ಟೊಂದು ತೊಡಕೇನೊ, ತೊಡರೇನೊ, ತಳುಕಿನೊಳು ಬಂಧಿಯೇನೊ, ಬೆಸುಗೆಯೇನು!
ಮಿತವಾಗುತಿದೆ ಉಮೇದಿನ ನಡೆ
ಮತಿಯಾಗುತಿದೆ ಹಿನ್ನಡೆಯ ಕಡೆ
ನಿಲುವೇನು, ನಿಟ್ಟೇನು?
ಹಿತವಿಲ್ಲದ ನುಡಿಯೀಗ ನೆಗೆಯುತಿದೆ
ಭಾರವೆನಿಸೊ ಮನಕೆ ಭಾವವೇ 
ಮಾಸುವ ಮದ್ದಾಗಬೇಕಿದೆ.

-

ಹುಸಿಯಾದ ಮಾತಿಗೆ ಮುನಿಸಾದ ಮನಸ್ಸು
ತಿಳಿಯದೇ ಹುಸಿಗೆ ಕಾರಣವ
ಖುಷಿಯಿಂದ ಬಿಳ್ಕೊಟ್ಟ ಮಂದಸ್ಮಿತ ಹೃದಯ
ಅರಿಯದೇ ಅವಸ್ಥೆಗೆ ಮೂಲವ
ಕಣ್ಣೆದುರೇ ಪರಿಸ್ಥಿತಿಯ ಕಂಡರೂ
ಸಮಯೋಚಿತ ನುಡಿಗಳಾಡದೇ
ಎಲ್ಲೆ ಮೀರಿದ ಪದಗಳುರುಳಿದರೆ
ಪರಿಣಾಮಕೆ ಹೊಣೆಯಾರು?
ಹೊಗಳುವವರಾರು!

ಕೋಪದೊಡೆ ಶಾಮಿಲಾಗಿ ಮುನ್ನುಗ್ಗಿದರೆ
ವಿರೋಧದ, ನಿರಾಶೆಗಳ ನಷ್ಟವೇ ದಾರಿ
ಸಹನೆಗೂ ಜಾಗ ಮೀಸಲಿರಿಸಿದ್ದರೆ
ಅಪೇಕ್ಷಿಸದ, ಅನುರೂಪದ ಆನಂದದ ಸೆರೆ

ಹೊಂದಾಣಿಕೆಯ ಬದುಕು
‌ಹಸುನಾದ ಬೆಳಕು.

-

ಮಾತುಗಳು ಸುಳ್ಳೆನಿಸಿ
ನಂಬಿಕೆಯು ಕುಸಿಯಲೆನಿಸಲು
ಎದುರಲಿ ಕಾಣುವ ಭಾವನೆಯು ಹಂಬಲವ ತೋರದೇ?
ಜೊತೆಗಿರುವ ಮನವು ಸತ್ಯವ ಕಾಣದೇ!
ಮೌನದ ಮನ, ಮುನಿಯಲು ಏನಿಲ್ಲ
ಮುನಿಸಿನ ಅಪೇಕ್ಷೆಯು ಬೇಕಿಲ್ಲ.
ಎಲ್ಲದರ ಹೊಂದಾಣಿಕೆಯಲಿ ಏರುಪೇರಿನ ಸವಾಲಿನಲಿ
ತಾಳ್ಮೆಯೊಂದೆ ಸಕಾರಾತ್ಮಕವಾಗಿರಿಸಲು ಜೊತೆಗಿರುವ ಬಲ.
ಒಂಟಿ ನಡೆಯ ಕಾಲುದಾರಿಗಿಂತ ಜಂಟಿ ನಡೆಯ ಹೆದ್ದಾರಿಗೆ ಸಮಯಕೆ ಮಿತ್ರನಾಗಿ ಕಾಯಲೇಬೇಕು.

-

ವಿಚಾರದ ದುನಿಯಾವಲ್ಲ,
ವ್ಯಕ್ತಿಯ ದುನಿಯಾ
ಧನ, ಸಂಪತ್ತಿನ ಗಳಿಕೆಗಿಲ್ಲಿ ಗೌರವ, ಪ್ರಾಧಾನ್ಯತೆ
ವಿನಯ, ವಿನೋದತೆಗೆ ಎಂದೊಲಿಯುವುದೋ ಆ ಪೂಜ್ಯತೆ.
ಒಬ್ಬೊಬ್ಬರೊಂದೊಂದು ಜೀವನ ಬಾಳು
ತಿಳಿಯರ್ಯಾರೂ ಏಳುಬೀಳಿನ ಗೋಳು
ಸಲ್ಲದ ಹೋಲಿಕೆ ಹೃದಯಕ್ಕೆ ಘಾಸಿ
ನಗುವಿದ್ದೊಡೆ ಗುಡಿಸಲ ಸೂರು ವಾಸಿ.
ನಿಗದಿತವಲ್ಲದ ಜೀವನ ಪತಂಗ.
ಬೆರೆತಿರಲಿ ಬದುಕಿದಷ್ಟು ಆ ನಗುವಿನ ರಂಗಿತರಂಗ.

-

ಹೆಕ್ಕಿ ತೆಗೆದ ಪದಗಳಲಿ
ಒಲುಮೆ, ನಲುಮೆ
ಕುಕ್ಕಿಕುಕ್ಕಿ ಜೀವ ತಿಂದು
ಭಾವಗಳಾದ ಪದಗಳು‌.

-

ಅದರಲ್ಲೊಂದು ನಕ್ಷತ್ರ ತುಂಬಾ ಹತ್ತಿರದಂತೆ ಗೋಚರಿಸುತ್ತ ಮಿನುಗುತ್ತಿರಲು ದಿಟ್ಟಿಸಿ ನೋಡುತಿರುವಾಗ ಆಪ್ತ ಗೆಳೆಯ ಏನೋ ಹೇಳುತ್ತಿರಬಹುದೆನಿಸಿತು. ಎನ್ನ ಕರೆದ ಹಾಗೆ, ಮನಸ್ಸನ್ನು ತಟ್ಟಿದ ಹಾಗೆ, ಅರ್ಧಕ್ಕೆ ನಿಂತ ತನ್ನ ಕನಸುಗಳ ಮುನ್ನಡೆಸುವ ಹಾಗೆ ತಿಳಿಸಿ ಮಾಯವಾಯಿತು‌. ಕಣ್ತುಂಬಿ ಬಂದು ಕಳೆದುಹೋದ ಗೆಳೆಯನ ನೆನೆದು ಆ ಗಳಿಗೆ ಕಣ್ಣೀರಮಯವಾಯಿತು.

-

ಸರಿ ತಪ್ಪುಗಳ ಅರಿತು ಸಂದರ್ಭಕ್ಕನುಸಾರ ಹೊಂದಿರುವ ಸಾಮಾನ್ಯ ಜ್ಞಾನವೇ ಪರಿಜ್ಞಾನ.

-

ಅವನಿಗಾಗಿ ಮಿಡಿವ ಹೃದಯ,
ಸಮಾಧಾತನಿಗೆ ಗಡಿಬಿಡಿಯ
ಸಂಗಾತಿಯವಳು

-

ಪದಗಳ ಗೀಚಲು ಹೊರಟೆ
ಅವಳದೇ ನೆನಪುಗಳು
ಬೆಂಬಿಡದೆ

-