இப்பொழுதெல்லாம்
சற்றும் யோசிக்காமால்
முட்டாள்களை ஒதுக்கி
வைத்துவிடுகிறேன்,
மேலும் முட்டாளாக
துளியும்
விருப்பமில்லாததால்..!

-

இரவு, இன்னும் கருமையேற,
அதில் இருளோடு இருளாக
நான் காணாமல் போகவேண்டும்,
சுயநல மானுடம் தூங்கும்
இந்த இரவை
ஆந்தை பார்வை
வரம் வாங்கி ஆளவேண்டும்...!

-

ஒவ்வொரு இரவிலும்
கருவறை வாசம்,
இரவோடு
தொலைவதில்
பெருஞ்சுகம்தான் ..!

-

இந்த இரவு,
எனக்கு தேவையான
அமைதியை கொடுக்க
அத்தனை மெனக்கெடுகிறது..!

-

இருள் படர
கரம் கொடுக்கிறேன்,
இரவின்
பெரும்நிசப்தத்தை ஆள..!

-

செய்யும் துரோகங்களுக்கு,
சூழ்நிலை என்று
காரணங்காட்டித்
தப்பிக்கொள்கிறது மானுடம்..!

-

கடைசியாக எங்கு வைத்தேன்
என்று தெரியவில்லை,
இந்த நிம்மதியை..!

-

ஒருவேளை
என் வேஷங்கள்
கலைந்தாலும்,
எனை நானே சிலுவையில்
அறைந்து கொண்டாவது
உங்களை நம்ப வைத்துவிடுவேன்!

-

காரிருள் கருமையில்
கலந்து தொலைவதே
பெருஞ்சுகம்,
பிரபஞ்சத்தின்
பெரும்மௌனமான
இந்த இரவே, நீ நீளாயோ?

-

விடிவதற்குள்
தூங்கிக்கொள்ள
போராடிப் போராடி
இரவை தொலைப்பதே
வாடிக்கையாகிவிட்டது..!

-