அலகு தெறித்துவிட்ட நெல்லின் உமியில்
வேறொரு குருவியின் ரேகை பதியப்பட்டிருந்தது
வண்ணங்களைத் தூவுவதாய்ப் பாசாங்கு செய்த பட்டாம்பூச்சியின்
உதிர்ந்த சிறகை ஏந்திய எறும்புகளின் கரங்களில்
கொஞ்சூண்டு ஈரம் பிசுப்பிசுத்தது
தீபாவளிக்குக் காலி செய்யப்படும் ஒட்டடையில்
கூடுதலாக ஒருநாள் தங்கிய சிலந்தியிடம்
வாடகை வாங்க வழியொன்று சொல்லுங்களேன்
மேலும்
ஒருநாளை ஒட்டிக்கொண்டு வந்த பிப்ரவரி
எதார்த்தத்தை மென்று
மெல்லச் சிரித்து
அடக்கமான கல்லறையில்
தோற்றம் - 29.02.2024 - மறைவு செதுக்கப்பட்டிருந்தது
எழுப்ப வழி சொல்லுங்களேன்
-