બે વ્યકિતઓએ કાયમ બોલવું જ એ જરૂરી નથી,
ક્યારેક સાથે હોવું પણ પૂરતું અને અગત્યનું છે.

ત્યારે સંવાદની જવાબદારી મૌનનાં ભાગે આવે.

મૌન પોતે એક સંવાદ છે.
અને આ મૌનની હાજરીમાં, વ્યક્તિની ફક્ત હાજરી જ પૂરતી છે.

પણ આ મૌનને સમજી શકે એવી વ્યક્તિ પોતાનામાં એક અપવાદ છે!

છેવટે તો બધો ખેલ સંવાદ અને અપવાદનો ખરો.

શું લાગે છે ?...

-

થારી-વાડકાવાળી સ્કૂલ, ગુલમહોર અને શિયાળાનો આઇડેન્ટિટી ક્રાઈસીસ...

-

પવિત્ર શ્રાવણ માસ એટલે મોક્ષનાં દેવ મહાદેવ અને
જેનાં સ્વરૂપનો મોહ થઈ જવા પામે એવા મારા મધુસૂદન શ્રીકૃષ્ણનો જન્મોત્સવ.

શ્રાવણ એટલે તો તાંડવનાં તાનમાં અને મોહનના મોહમાં મસ્ત થવું.

મારે મન શ્રાવણનાં સરવરિયા એટલે
લાલાના જન્મોત્સવની આરતીનાં પ્રસાદમાં અપાતું પંચામૃત અને
વરસાદનાં વિરામથી ઊડતી ધૂળ એટલે પંજીરી.

આવા દિવસોમાં પણ જો કોઈ કૃષ્ણમય અને રુદ્રમય ન થઈ શકતું હોય
તો ભર વરસાદે એના જેટલી શુષ્કતા સૃષ્ટિમાં જડવી મુશ્કેલ...!

-

"સુષુપ્ત અને જાગૃત મનનો સહિયારો ભગીરથ નિર્ધાર"

-

ક્રિકેટ મેચ પછી ચેક લેતાં અંગ્રેજીમાં બોલવું...!

-

"સફળતા નામની કીડીનો પગરવ સાંભળી જતો ભડવીર"

-

" જિંદગીના મોબાઈલનું આત્મનિર્ભર ચાર્જર,

એ પણ વાયરલેસ ! "

-

જીવનમાં નેલ્સન ન બની શકો તો ફીકર નોટ, પણ...

" મંડેલા " અવશ્ય રહેજો !

' યુવા દિવસ ' ની દેશનાં યુવા ' ધન ' તથા યુવા ' દે ધના ધન ' ને આ યુવાન તરફથી યુવાનીનાં કોથળા ભરી ભરીને શુભેચ્છા !

યુવાની અદ્દલ પરપોટા જેવી હોય છે. જિંદગીના એકસપ્રેસ હાઈવે પર આ પરપોટા બિરાદરનું સફરનામા ક્યારે ઓઝલ થઈ જાય છે એનો ખ્યાલ પણ નથી આવતો.

પરપોટાની પેલે પાર જઈને જોઉં તો ખ્યાલ આવે છે કે, આ જ પરપોટાની ક્ષણભંગુરતા નાનાં બાળકોને આખાં આયખા જેટલી મોજ કરાવીને જય શ્રીકૃષ્ણ કરી દે છે.

બસ તો પછી !

મન અને મસ્તિષ્ક, બેમાંથી હજી પણ જે સારું કામ આપતું હોય;
એની સલાહ લઈ કયા ટાઈપનાં પરપોટા સાથે
તમને લાગે વળગે છે એ નક્કી કરી લેવું.

-

આજની તારીખ 11-01-2022 માં જુગાર તો જાણે વરઘોડામાં વાગતાં બેન્ડ જેવું ઘોંઘાટિયું પર્ફોર્મન્સ આપતો લાગે છે બૉસ

" ત્રણ એક્કા ને ત્રણ દુરી "

ગોવા કે ગોઆ (ગમે તે અને ગમે એ રાખજો) અને વેગસમાં તો આજે પબ્લિક ગાંઠવાનું નામ લે એવું લાગતું નથી.

અનિલ કપૂર માધુરી દીક્ષિતની ફિલ્મ
Zindagi Ek Juaa નું ટાઈટલ સોંગ યાદ આવી ગયું


" यह जिंदगी है एक जुआ
कभी जीत भी कभी हार भी
तू खेलताजा खेलताजा
बाजियों पे बाजियां "

-

હું . . . ૨૦૨૨ !

અસ્ખલિત વહેતો હું આજે થંભી ગયો છું, ૨૦૨૧ છું હું
મારી આજથી ગઈકાલને ઓળંગી ગયો છું, ૨૦૨૨ છું હું

સાથે તો કંઈ જ નથી, પણ થોડામાં ઘણું છે
આ જિંદગીનાં ખમીસમાં અનુભવનું એક કાણું છે.

ગઈકાલ પર અચિવમેન્ટ્સની એન્ઝાયટીની ઉધારી બેફામ છે
ભાઈબંધીનાં બેલેન્સ કેરી ફોરવર્ડની સેરેન્ડીપીટીથી એનો હિસાબ ચૂકતે છે.

૩૬૫ નવી ટર્મ્સ એન્ડ કન્ડીશન્સનાં કોરાં લિસ્ટમાં,
એસ્ટરિક સાથે ફૂટનોટનું ડેડલી કોમ્બો અને એરોગન્સ છે !

આજે લિબાસ બદલાયો છે, અંદાઝ તો એ જ ઈંગ્લીશ વેધર જેવો હજી પણ અકબંધ છે ભાઈબંધ!
લાઈફનાં અડધાં ભરેલાં ગ્લાસમાં મિજાજ અને માહોલનો સ્કોચ્ તો ભરી જો, પછી જો !

રાતમાં જુવાન થવું ફિતરત મારી
દિવસ બુઢ્ઢો થવાનું રિહર્સલ માત્ર !

ઓપન ટુ ઓલ ખજાનો છે મારો, લૂંટી શકે તો લૂંટ
ક્યારેક એક ઘા ને બે કટકા, તો ક્યારેક આંટીઘૂંટી
બાકી તો બધો ધુમાડો છે.

યાદ રાખ હું નવું વર્ષ છું, કૃષ્ણ નથી
તું ફક્ત ' તું ' તો થા, કૃષ્ણ જરાં પણ દૂર નથી...

-