धुंदीत गंधित होऊनी सजणा
प्रीतीच्या वसंती न्हाऊनी सजणा

धन्य धन्य जाहले जीवन माझे
तुझ्या नावाचे कुंकू लावूनी सजणा

यावेळचा श्रावण वेगळाच भासतो
ये त्वरे बिगी बिगी धावूनी सजणा

कशास करू मी वारी पंढरीची
आठवतो विठ्ठल तुज पाहूनी सजणा

नजरेत माझ्या तू ठरलास ईश्वर
स्वर्ग मज धरतीवरी दावूनी सजणा
श्रीपद्मा

-

धुंद मधुमती रात रे
पेटव प्रणय वात रे

शब्द मुके, स्पर्श बोलके
शिरशिरी कसली आत रे

वरले आहे तुला मनाने
गैर ना काही यात रे

सांभाळ जीवापाड नात्याला
सोसणार नाही घात रे

मन जुळले आणि नको काही
नको विचारू आता जात रे

सहजासहजी मी भाळत नाही
पर न्यारीच तुझी बात रे
श्रीपद्मा

-

धुंद आज डोळे देशी फार झाली
त्या देशीपायी किती बेजार नार झाली

पुरंना पैका उपासमार लेकरांची
ठोठावलेली सगळी बंद दार झाली

अंगावरती नाही कपडे शिक्षणाची बोंबाबोंब
जिंदगानी चिमुकल्यांची पार तार तार झाली

ढोसून आल्यावरती लाथा बुक्क्या ठरलेल्या
श्वासापेक्षा दुप्पट तर आजवर वार झाली

ना माहेरी...ना समाजात कुणीच नाही ऐकले
कुठेच नाही हो नोंद तिची तक्रार झाली
श्रीपद्मा

-

धागा धागा अखंड विणू
माणूसकीलाच धर्म मानू

कशास हवे जातीपातीचे दंगे
स्वकेंद्री सारे राजकारणी भुंगे

हाक येता द्यावा हात
माणूसपण खरे यात

भेदाभेद अन् उच्चनीचता
लोप यानेच आमुची अखंडता

पेरूया आज उद्या नक्की उगवेल
बहरले माणसा माणूसकीची वेल

कसला विचार आता थांबू नको
हातात हात दे काठी,बांबू नको
श्रीपद्मा

-

देहाची तिजोरी सांभाळ माणसा
नाही तर जीवाची आबाळ माणसा

खा खा खाशील इकडचे तिकडचे
दरोडा रोगांचा तात्काळ माणसा

साधे जेवण अन् हवा व्यायाम जोडीला
हे तिजोरीचे रक्षक चारीकाळ माणसा

धन दौलत आपुले नीटनीटके अवयव
तयांची निष्काळजी वंगाळ माणसा

देहाच्या तिजोरीत आरोग्याचे धन
नको नको ते व्यसनाचे जंजाळ माणसा
श्रीपद्मा

-

नव्याने कळला मैत्रीचा अर्थ
कुणी कसं असू शकतं इतकं निस्वार्थ

सहवासात तुझ्या जगण्यावर प्रेम जडते
रोज नव्या आनंदाकडे पाऊल अलगद पडते

तुझ्या बाता, तुझ्या गप्पा ऐकत रहावं वाटते
किती आपलेपणाने तू समोरच्याचे दुःख छाटते

तुझ्या मैत्रीपुढे सारी धनदौलत फिकी
दिसते तुझ्यात नेहमीच आपुलकीची झाकी

तुझ्या वाढदिवशी दुजी ना आस कसली
बस...भगवंता आमुची पुष्पू प्रत्येक क्षणी पाहिजे हसली

घे एवढीच काळजी ईश्वरा माझा पुण्याचा साठा रिता कर
पुष्पूच्या आयुष्यात रोज आनंदाचे वेगवेगळे रंग भर
पुष्पू.... love you so much ❤️❤️
अखंड सोबत हवी मला तू....
लय लय जग.....ते ही अगदी आनंदात.....
वाढदिवसाच्या खूप खूप शुभेच्छा पुष्पू.....🎂🎂🍫🍫❤️❤️
श्रीपद्मा

-

देव जरी मज कधी भेटला तर काय मी मागू
जन्ममरणातून सुटका कि पैशाच्या मागे लागू

जमीन जुमला...दाग दागिने आणि आलिशान बंगला
चार दोन गाड्या अन् एक आयफोन चांगला

सज्जनाची संगत मागावी कि फक्त ऐशोआराम
खितपत पडावे याच फुफाट्यात कि स्वर्गात हवा विश्राम

तुझे नाव मुखी येऊ दे म्हणू कि जगाने माझ्या तालावर डोलावे
मोक्षप्राप्तीचा उपाय विचारू कि ऐहीक सुखास मी भुलावे

इतूके माझे पुण्य नाही देव मला भेटणार नाही
पण आहेत अशी काही माणसं जी देवापेक्षा कमी वाटणार नाही
श्रीपद्मा

-

दिवस तुझे हे फुलायचे...रूबाबावरी गं भुलायचे
जरा हो सक्षम आधी हे भुलणे ना तुला पेलायचे

नको पडूस बळी...राख आब त्या मायबापाच्या प्रेमाची
ते शोना अन् बाबू असं म्हणून गं कसे चालायचे

कर्तृत्व हवं...बाकी सगळं येतं मग आपोआप चालत
घे शिकून आधी नसत्या प्रसंगास कसे गं कोलायचे

आखतील ते डावपेच तू नेहमी सचेत रहा पोरी
नसतात गं सगळ्यांचे सगळेच शब्द झेलायचे

ते रचतील कुभांड...करतील कट कारस्थाने वारंवार
तू तुझ्या लक्षापासून मात्र अजिबातच नाही हलायचे
श्रीपद्मा

-

दिसला गं बाई दिसला
चोरी केलेला कोट दिसला
किती सांगू मी सांगू कुणाला
हा आजार तुला गं कसला

कल्पना घे पण शब्द तर सोड
लाव जरासं डोकं काही
याच्या दोन ओळी...त्याच्या दोन ओळी
घेऊन कुणी कवी होतं का बाई

किती प्रेमाने समजावले तरी
जित्याची खोड मेल्याशिवाय जाणार नाही
हे चांगलंच ठाऊक मले बी तरी
आम्ही आवाज उठवल्याशिवाय राहणार नाही

तुझं मात्र कुणी निंदा कुणी वंदा
चालूच ओळी चोरण्याचा धंदा
एवढी शिकली सवरलेली तू
अन् अकलेत भरलाय नुसताच कांदा
श्रीपद्मा

-

त्या फुलांच्या गंधकोषी अन् नजरेच्या वेशी
प्रीत प्रीत सांडते कधी समजून घेशी

त्या नयनांच्या अंबरी अन् अधराच्या देशी
तूच तू अन् तुझ्यासाठी उतावीळ साऱ्या पेशी

त्या रोम रोमाच्या गावी अन् कुरळ्या केशी
तुझीच बात,तुझीच याद सांग कधी येशी

त्या भाळावरच्या प्राक्तनी अन् हाताच्या रेषी
दुजी ना काही गोष्ट आता माझ्या भाषी
श्रीपद्मा

-