ಚೌಳಿಕಾಯಿ ಸೋಸಿ, ಹುರದ, ಪಲ್ಲೆ ಮಾಡಾಕರ ನೀ ಇರ್ಬೇಕಿತ್ತ ಸಖಿ,
ಚಪಾತಿ ಮಾಡ್ತಿದ್ದ. ಒಬ್ಬಂಟಿಗ್ಯಾರ ಬಾಳೆ ಶ್ಯಾಮ್ಯಾಂದು. ರಂಪ್ ರಾಡಿ.
ಚಂಜೀದ ಮಾಡಿ, ಉಂಡ, ತೊಳದ ಬಾಂಡೆ ಡಬಾಕ್ಕೊಡದ
ಚಂದಪ್ಪಂದ ಒಂದ್ ಜಂಪ್ ನಿದ್ದಿ ಆಗಿರ್ತತಿ ನೋಡ!

-

ದಿನಾ ಬರೆಯುವುದು ಶ್ಯಾಮನಿಗೆ
ಅಂಥಾ ಕಷ್ಟದ ಕೆಲಸವೇನಲ್ಲ ಸಖಿ
ಅವ ಪೂರ್ತಿಯಾಗಿ ಬದುಕಬೇಕಷ್ಟೇ;
ಸಂಜೆ- ಮುಂಜಾನೆಗಳ ಲೆಕ್ಕವಿಲ್ಲದೆ.

-

ಅದು ಬಂದಾಗಲೆಲ್ಲ ನೀ ಹೊತ್ತಿಸಿದ
ವಿರಹದುರಿಯಲ್ಲಿ ಅವ ಸುಡುವುದು ನಿಶ್ಚಿತ ಸಖಿ
ಆದರೂ, ಮತ್ತೆ ನಾಳೆಯೂ ಬಾ ಎಂದು ಶ್ಯಾಮ
ಗಟ್ಟಿಯಾಗಿ ಆಮಂತ್ರಿಸುವ ಸಾವು ಸಂಜೆ!

-

ತನ್ನದಲ್ಲದ ಸಾವಿರ ಉ'ಜ್ಜ್ವಲ' 'ಹಣ್ಣು'ಗಳನ್ನು
ಮಾಂಸಭಕ್ಷಕ 'ರಾಜ'ಹದ್ದೊಂದು ಮುಟ್ಟಿತಂತೆ, ಕಚ್ಚಿತಂತೆ
ರೆಕ್ಕೆಗಳಿವೆಯಲ್ಲಾ, ಹಾರಿಯೂ ಹೋಯಿತಂತೆ!
ಸಂಜೆ ಬೆಳಕಾಗುವಷ್ಟರಲ್ಲಿ 'ವಿರೋಧಿ' ಹದ್ದು
ಸುದ್ದಿಯನ್ನು ಲಕ್ಷ 'ಪ್ರಜಾಹಕ್ಕಿ'ಗಳಿಗೆ ಹಂಚಿತಂತೆ
ಶ್ಯಾಮಸಖಿ, ಹೊಸ 'ಸುದ್ದಿ'ಯ ಕ್ರಯ- ವಿಕ್ರಯಕ್ಕೆ ಕಾಯುವ, ಸಾಯುವ ಹರಟೆ ಸಂತೆಯಲ್ಲಿ ಬೆತ್ತಲಾಗಿದ್ದು ಮಾತ್ರ
ತಣ್ಣದೇನೂ ತಪ್ಪಿಲ್ಲದ, 'ಹಸನಾ'ದ "ಎಂಜಲು" 'ಹಣ್ಣು'

-

ಗೆಳೆಯನೊಬ್ಬನ ಗೆಳತಿಯೊಬ್ಬಳು ವಧುವಾಗಿದ್ದಾಳೆ ಇಂದು
ಕುಟುಂಬದ ಖಾಸಗಿ ಪ್ರೀತಿಗೆ, ಸಾರ್ವಜನಿಕ ಧನ್ಯವಾದ ಅರ್ಪಣೆ
ಸಖಿ! ಅವನ ಜವಾಬ್ದಾರಿ ಶ್ಯಾಮನಿಗೆ ಬಂತು - ಒಳಗುತ್ತಿಗೆ
ಕ್ಷಣಿಕ ಶ್ಯಾಮಲೆಯಾಗಬೇಕಾಯ್ತು ನೋಡು, ಭಾಷಣ ಬರೆಯಲು

-

ಕನ್ನಡಾ ಅಂದ್ರ ಮೋತಿ ಕಿಂಗರ ಮಾಡ್ತಾಳ, ಹಿಂದ್ಬಿದ್ದ ಸಖಿ ಅನ್ನಾಕಿ
"ನೀ ಹಂಗ ನೀ ಹಿಂಗ...", ಅರ್ಥಾಗುವಂಗ ಬರದದ್ದಕ್ಕ ನೆತ್ತಿ ಮ್ಯಾಲ ಕುಂತಿದ್ಲ
ಎಷ್ಟಂತ ತಡ್ಕೋಬೇಕ? ಇನ್ನಾಗುದುಲ್ಲ. ತೆಲಿ ಹಾಪ್ ಆಗೇತಿ ಹುಲೀದ.
ಶ್ಯಾಮ, ದಿನs ಚಂಜಿ ಆದ್ರ ಸಾಕ,  ಮುದ್ದಾಂ ಕನ್ನಡದಾಗ ಬರದ ಮಾರಿಗಿಡ್ತಾನ

-

ಇಂದೇ ಕೊಂಡ ಹೊಸ ಲೆಕ್ಕಣಿಯೊಂದು ಬರೆಯುವುದೋ?
ತನ್ನ ಸಂಜೆಯ ಚಹಾದೊಟ್ಟಿಗೆ ಶ್ಯಾಮ ಬಿಡಿಸುವ
ಸುಡೊಕು ಡಬ್ಬಿಯ ಪಕ್ಕದ ಬಿಳಿ ಪಟ್ಟಿಯ ಮೇಲೆ
ಗೀಚಿ ನೋಡಿ, ನಗುವ ಹೆಸರು ನಿನ್ನದೇ ಸಖಿ!

-

ಇನ್ಯಾರ ಹೆಸರಿಗೋ ಎರಡೇ ಎರಡಕ್ಷರ ಅರ್ಪಿಸಿದ್ದಕ್ಕೆ
ಎಂದೋ ವರ್ಷದ ಹಿಂದಿನ ಶ್ಯಾಮನ ಪ್ರೇಮ ವಿಲಾಪಕ್ಕೆ
ಇಂದು ಸಂಜೆ ಏಕಾಏಕಿ ಓಗೊಟ್ಟು, ಉತ್ತರವೂ ಬಂತಲ್ಲಾ!
ಹಳೇ ಪ್ರೀತಿಗೆ ಹೊಸ ಹೊಟ್ಟೆಕಿಚ್ಚೆ ಸಖಿ? ಹ್ಞ! ಇರಬಹುದು.

-

Would it speak about
How it wanders everywhere
Yet, reaches nowhere?
How it has a relative in just about every thing
Yet, is mostly alone and lonely?
How it leads, follows, and accompanies
Yet, not counted as part of?
How it is just present, silently, always
Yet, not seen unless forcibly shone upon?

Or

Would it just stay quiet?
Quite quiet?
Die quiet?
In the lap of darkness?
In the shadows?

-

ಬೆಲ್ಲದಚ್ಚಿಗೆ ಬರುವ ನೊಣ, ಸಕ್ಕರೆ ಡಬ್ಬಿಯೇರುವ ಕಪ್ಪಿರುವೆ
ನಿದ್ದೆಯೇರುವಷ್ಟರಲ್ಲಿ ಸೊಳ್ಳೆ ಹೇಳುವುದು "ನಾ ರಕ್ತ ಹೀರುವೆ"
ಸಂಜೆ ಹಾವು, ರಾತ್ರಿ ಚೇಳು, ದಿನವಿಡೀ ಜೇಡ, ಹಲ್ಲಿ,
ಸಖಿ! ಶ್ಯಾಮಗೆ ಮೂರು ಹೊತ್ತು ಹುಳ-ಪುಳಕ, ಝಳಿ-ಜಳಕ ಶುರುವೇ.

-