രണ്ടക്ഷരങ്ങൾക്കിടയിലെ
അനന്തതയിലേക്ക്
ഇറങ്ങി ചെല്ലുവോളം
നിങ്ങൾ അക്ഷരങ്ങളെ
ചേർത്തു പിടിച്ചു നോക്കൂ....

ആ അക്ഷരക്കൂട്ടങ്ങളെ രണ്ട്
പുറംചട്ടകൾക്കുള്ളിലടുക്കിയ
ലോകങ്ങളേയും...

-

നിന്നോളം ഭ്രാന്ത് പിടിപ്പിക്കുന്ന
ലഹരി ഇന്നേവരെയാരും
കണ്ടുപിടിച്ചു കാണില്ല...

-

ഭരണഘടനയുടെ
അനുഷാസനങ്ങൾക്ക്
മേൽ അന്ധതയുടെ
ദംഷ്ട്രകളൊരിക്കലും
അമരാതിരിക്കട്ടെ...

സ്വാതന്ത്ര്യവും സ്വാരാജും
അർത്ഥശൂന്യമാവാതിരിക്കട്ടെ..
മനുഷ്യൻ മനുഷ്യനായിരിക്കട്ടെ..

-

മണ്ണേ.....
മാലോകർക്ക് മുഴുവനും
അനന്തമായി നീ
നിന്നെ പകർന്നിട്ടും,
എൻ ലോകമെങ്ങനെ
ആ ഒരാൾ മാത്രമായ്.

ശ്വാസമേ.....
ഓരോ അണുവിലും
നീ നിറഞ്ഞു നിന്നിട്ടും,
ചില നിമിഷങ്ങളിലെന്തേ
അപ്പാടെ ഉള്ളിലങ്ങ്
ചത്തു മലച്ചു പൊങ്ങുന്നു.

ചിന്തകളെ.....
പാനവും പശിയുമില്ലാതെ,
മൗനത്തിൻ വിഷം
കുടിച്ചിനിയുമെന്തേ
ആ ഒരൊറ്റ പേരിന്നു മാത്ര
ഓർമകളുടെ നനവൂട്ടിടുന്നു.

-

ഈ ഹൃദയത്തിന്റെ
അവസാന കഷ്ണവും
അയാൾ
കൊള്ളയടിച്ചിരിക്കുന്നു ...

ബാക്കിയായ ഓരോ
തുള്ളി രക്തവും
ഊറ്റി കുടിച്ചിരിക്കുന്നു ...

പ്രണയത്തിന്റെ
മറ്റൊരു മുഖവും
ഇനിയുമാ ഉടലിലേക്ക്
കയറാനാവാത്ത
വിധമാ ഉടലിനെ
കൊലചെയ്തിരിക്കുന്നു ...

-

നന്ദുമാ ......
നിനക്ക് വേണ്ടി ഞാൻ
വീണ്ടും ഇതുവഴിയെ ....

-

ഇനിയുമൊരു വെള്ളിയാഴ്ചയുടെ
രാപകുതിയിലെന്നെ നീ
കൊണ്ടു പോണം ..,
ഉഷസ്സ് തേടിയാ മേടിന്റമരത്തേക്ക്

ആ കൈകളിലെന്റെ വിരലുകൾ
ഭദ്രമായിരുന്നത് കൊണ്ടു മാത്രം
മറ്റൊരടയാളവും വരച്ചിടാൻ
മറന്നു പോയൊരാ കാട്ടുവഴികളിലൂടെ

അവിടെ വെച്ച് ഞാൻ
ഖനനം ചെയ്തിടാം ...
എന്റെ വരികളെ മരവിപ്പിച്ച
പ്രണയത്തെ ...
നീ മാത്രമായിപ്പോയെന്നിലെ
കരിങ്കൽ ചുവരിനെ ...
അസാമിപ്യത്തിൻ ചൂടിൽ
ദ്രവീകരിക്കപ്പെട്ട ചുടുനീരിനെ...
'നീ പാകം ചെയ്ത എന്നെ '

-

ഇനിയും എനിക്കെഴുതണം
എന്നിലെ അവസാന ശ്വാസവും
കുത്തിനിറച്ചൊരു കവിത .

നിന്റെ ചുടു ചുംബനങ്ങളാലും
നഖക്ഷതങ്ങളാലും കുഴിഞ്ഞു പോയ
പാടുകളിൽ മഷി നിറച്ചൊരു കവിത .

-

ഇരട്ട കൊലപാതകമാണ്
അയാൾ അറസ്റ്റ് ചെയ്യപ്പെടട്ടെ ...,
വിയർപ്പിന് നാലണ വാങ്ങിച്ചു
ഇരുമ്പഴിക്കകമെ
പട്ടിണിയറിയാതെ
ഒരു വയർ ഇരട്ട -
ജീവപര്യന്തമനുഭവിക്കട്ടെ

-

ഒരു ഭ്രാന്തനെഴുതും
കവിതയ്ക്ക്
അവസാന കുത്തിടും
മുമ്പൊരിക്കൽ ,
അതിലൊരു വരിയുടെ
ബീജമാവണം ..
ഒരായിരം ശ്രോതാവിന്റെ
ഹൃത്തിലും ഞാനെന്ന
കാമുകി പിറക്കണം ....

ഭ്രാന്തിന്റെ ഉച്ചിയിൽ
ഉടുതുണിയും പിഴച്ച്
ജഡ പിടിച്ചോടുമ്പോഴുമാ
ഭ്രാന്തൻ പുലമ്പികൊണ്ടിരിക്കും
അത്യപൂർവ്വമായ വാക്കുകളിൽ
ഒന്നാവണം ....,
'താളം തെറ്റിയ തലച്ചോറിലും
നിര തെറ്റാതെഴുതിയൊരക്ഷരം'

-