तुझ्या माझ्या गोष्टीला, सुरूवात नाही
तुझ्या माझ्या वेदनेला, अंत नाही...

-

सावली सारखा पाठीशी राहीन,
असं तो नेहमी म्हणायचा
अंधाराची भिती वाटते मला,
नेमका तिथेच तो हरवला

-

नको आठवणींचे हळुवार वारे
नको स्पंदनांचे अलवार हिंदोळे
पुन्हा पाटीवरचे शब्द झाले कोरे
जेव्हा नजरेला भिडले डोळे ओले

-

अनोळखी होऊन पुन्हा
ओळखीचे नको ओरखडे
केलाय मी असा काय गुन्हा
तुझ्याच मागे धावे मन वेडे

-

जे सुरू झालंच नाही
ते संपायची भिती कशाला
जे स्विकारलंच नाही
ते गमवायची खंत कशाला

-

डोळ्यांचं एक बरं असतं
मनाचे घाव त्याला दिसत नाही
वेदना लपवताना मग ...
आसवांची मैफिल बसत नाही

-

मनाच्या हिंदोळ्यावर
शब्दा़ंची पाखरं बसतात
भावनांच्या तारा छेडत
गगनभरारी घेतात...

-

वादाचं काय
ते होतच असतात
संवादानंही रूसावं
एवढी खंत आहे...

-

आपल्यात कुठलाच आता
वाद राहिला नाही
तितकंच खरं की
आता साथ राहिली नाही

-

रोज जाणिव होते,
तू दूर गेल्याची....
मनात गोठलेलं असलं तरी
आपल्यातलं सगळं संपल्याची

-