ਨਿੱਤ ਭਰਦੇ ਆ ਦਰਜਾਂ ਨੂੰ, ਫਿਰ ਵੀ ਇਹ ਤਰੇੜ ਈ ਨੀ ਮੁੱਕਦੇ
ਸਿਰ ਮੱਥੇ ਰੱਖੇ ਇਹ ਵੀ, ਜ਼ਿੰਦਗੀ ਦੇ ਗਧੀ ਗੇੜ ਈ ਨੀ ਮੁੱਕਦੇ
ਚੜ੍ਹਦੇ ਦਾ ਹੋਵੇ ਭਾਵੇਂ ਲਹਿੰਦੇ ਦਾ, ਹਰ ਰੰਗ ਭਰ ਲਈਏ
ਜ਼ਿੰਦਗੀ ਦੇ ਹਰ ਪਹਿਰ ਨੂੰ, ਖਿੜੇ ਮੱਥੇ ਕਬੂਲ ਕਰ ਲਈਏ
ਅੱਖਾਂ ਵਿੱਚ ਚੁੱਭ ਹੀ ਜਾਂਦੇ, ਇਹ ਰੰਗਾ ਦੇ ਹੇਰ-ਫੇਰ ਈ ਨੀ ਮੁੱਕਦੇ
ਸਿਰ ਮੱਥੇ ਰੱਖੇ ਇਹ ਵੀ, ਜ਼ਿੰਦਗੀ ਦੇ ਗਧੀ ਗੇੜ ਈ ਨੀ ਮੁੱਕਦੇ
ਜ਼ਿੰਦਗੀ ਦੀਆਂ ਤੰਗੀਆਂ ਤੁਰਸ਼ੀਆਂ, ਉਥਲ ਪੁਥਲ ਖਿਆਲਾਂ ਦੀ
ਉਲਝਣ ਜਿਹੀ ਚੱਲਦੀ ਰਹਿੰਦੀ, ਜ਼ਿੰਦਗੀ ਦੇ ਸਵਾਲਾਂ ਦੀ
ਖੁਆਬਾਂ ਦੇ ਲੱਖਾਂ ਜੁਗਨੂੰ ਛੱਡੇ, ਪਰ ਇਹ ਹਨੇਰ ਈ ਨੀ ਮੁੱਕਦੇ
ਸਿਰ ਮੱਥੇ ਰੱਖੇ ਇਹ ਵੀ, ਜ਼ਿੰਦਗੀ ਦੇ ਗਧੀ ਗੇੜ ਈ ਨੀ ਮੁੱਕਦੇ
ਕਦੇ ਉੱਤੇ ਕਦੇ ਥੱਲੇ, ਕਦੇ ਪਾਣੀ ਵਾਂਗਰ ਚੱਲਦੀ ਆ
ਅੱਜ ਥੋੜੇ ਜਿਹੇ ਗ਼ਮ ਨੇ, ਖੁਸ਼ੀਆਂ ਦੀ ਗੱਲ ਵੀ ਕੱਲ੍ਹ ਦੀ ਆ
ਪਤਾ ਨਹੀਂ ਕਿਉਂ ਇਹ ਬੁਣਨ-ਉਧੇੜ ਈ ਨੀ ਮੁੱਕਦੇ
ਸਿਰ ਮੱਥੇ ਰੱਖੇ ਇਹ ਵੀ, ਜ਼ਿੰਦਗੀ ਦੇ ਗਧੀ ਗੇੜ ਈ ਨੀ ਮੁੱਕਦੇ
ਪਲ ਦੋ ਪਲ ਠਹਿਰ ਜਾਵਾਂ, ਜ਼ਿੰਦਗੀ ਨੂੰ ਵੀ ਮਿਲ ਲਵਾਂ
ਕੁਝ ਘੜੀਆਂ ਲੈ ਵਿਰਾਮ ਦੀਆਂ, ਉਧੜੇ ਖ਼ੁਆਬਾਂ ਨੂੰ ਸਿਲ ਲਵਾਂ
ਘੜੀ ਦੀਆਂ ਸੂਈਆਂ ਦੇ, ਇਹ ਨਿਰੰਤਰ ਖੇਡ ਈ ਨੀ ਮੁੱਕਦੇ
ਸਿਰ ਮੱਥੇ ਰੱਖੇ ਇਹ ਵੀ, ਜ਼ਿੰਦਗੀ ਦੇ ਗਧੀ ਗੇੜ ਈ ਨੀ ਮੁੱਕਦੇ
-