ಕ್ಷಮಿಸಿ,
ಅಡಿ ಬರಹದಲ್ಲೊಂದು ತಪ್ಪಾಗಿದೆ.
ಅದು ಮುನ್ನುಡಿಯನ್ನೇ ಮರೆತನ್ತಿದೆ.

-

ನಿರೀಕ್ಷೆಯ ಪರೀಕ್ಷೆಯಲ್ಲಿ
ಗೆದ್ದು ಬಂದವರಿಗಿಂತ,
ಸಹನೆಯಿಂದ ಗುದ್ದಾಡದೆ
ಅರ್ಧಕ್ಕೆ ಎದ್ದು ಬಂದವರೇ
ಹೆಚ್ಚು ,

-

ಜಿಹಾದ್ ನ ಶಹರ್ ನಲ್ಲಿ ಬಂಧಿಯಾದ
ಮೊಹಬ್ಬತನ್ನು ತಬ್ಬಿದ ಕಬರಸ್ತಾನದ
ಮಣ್ಣಿನಲ್ಲೂ ಯುದ್ಧದ ಅಲೆಯೊಂದು
ಎದ್ದಂತಿದೆ. ಉಸಿರನ್ನು ಉಳಿಸಲು
ತುಫಾನ್ ಗುದ್ದಾಡುತಿದೆ.

-

ಎದೆಮೂಲೆಯಲ್ಲಿ ಗೆದ್ದಲಿಡಿದಿದ್ದ
ಕಾಪಾಟಿನಲ್ಲಿ ನಿನ್ನ ನೆನಪಿನ
ಘಮಲೊಂದೆ ಹಸಿಯಾದ
ಸ್ವಚ್ಛ ಅಲೆಯ ಹೊದ್ದು ಮಲಗಿದ್ದು,
ಈಗಲೂ ಆಘ್ರಾಣಿಯ ಅಮಲೇರಿಸುವ
ನಶೆಯಂತವನು ನೀನು,

-

ಕಣ್ರೆಪ್ಪೆಯಿಂದ ಮುಗ್ಗರಿಸಿ ಕದಪಿನಂಚಿನಲ್ಲಿ
ಜೋತು ಬಿದ್ದ ಹನಿಗಳೆಲ್ಲವೂ ,
ಮಧುತುಂಬಿದ ಅಧರವ ನೋಡುತ್ತ
ನಗುತಿವೆ ಸಾಕಿ,
ಮಧುಹೀರಿದ ಮನ್ಮಥರೇಲ್ಲಾ
ತುಂಬಿಸಿಕೊಂಡರಷ್ಟೇ,
ಹೆಪ್ಪುಗಟ್ಟಿದ ಅಧರದ ಬಿರುಕಿನೆಡೆಗೆ
ಕಿರುನೋಟವನ್ನು ಬೀರದೆ ,
ಮತ್ತೇರಿಸಿಕೊಂಡ ಮಗ್ಗುಲಿಗೆ.
ಉಪ್ಪಿನ ಋಣಭಾರವಿರಿಸಿಹೋದರಂತೆ.

-

ಇನ್ನಾದರು
ತುಸು ಧಾರಾಳವಾಗಿಬಿಡು
ಗೆಳೆಯ,
ಮೌನಗಟ್ಟಿದ ಕಡುಗೆಂಪು
ಲಜ್ಜೆಯನ್ನೂ ಬಿಡದೆ
ಬಾಚಿತಬ್ಬಿಬಿಡು,
ನಿನ್ನೋಳಗಿನ ಮಾತಿಗೆ ಮರುಜನ್ಮ
ನೀಡಲಿಕ್ಕಾದರೂ,,

-

ನಿನ್ನ ಕಣ್ಣೀರಿನ ಗೋಳನ್ನು ಅನ್ಯರಲ್ಲಿ
ಹೇಳಿಕೊಳ್ಳದಿರು ಸಖೀ,
ಹುಳಿಹೆಂಡದ ದಾಸರಿವರು,
ನಾಲಿಗೆಯ ಚಪಲಕ್ಕೆ ಉಪ್ಪು
ಕಣ್ಣೀರನ್ನೂ ಉಪ್ಪಿನಕಾಯಿಯಂತೆ
ನೆಂಚಿ ತಿನ್ನುವರು.

ನಿನ್ನ ಸ್ವಾಭಿಮಾನವ ಅಡವಿಟ್ಟು ಅನ್ಯರಲ್ಲಿ
ಅಂಗಲಾಚದಿರು ಸಖೀ ,
ಜೂಜುಕೋರ ಕಾಮಾಂಧರಿವರು,
ನಿನ್ನನೇ ಪಗಡೆಯಾಗಿಸಿ,
ದಾಳದ ದಾಸಿಯೊಡನೆ
ಬೆತ್ತಲೆಯಾಟವಾಡುವರು.

-

ಶಬ್ಧ ಗಳೆಲ್ಲ ಶಿಕಾರಿಗೆ ಹೋರಟಗಲೆಲ್ಲಾ
ಭಾರಿ ಬೇಟೆಯದ್ದೆ ಭೋಜನ,
ಕೆಲವು ಕಲ್ಲು ಹೃದಯಗಳಿಗೆ
ಊಳಿಪೆಟ್ಟು ಕೊಟ್ಟು,
ಮರಳುವವು ಬಲೆಯಲ್ಲಿ
ಹಲವು ಮನಸ್ಸುಗಳ ಹೊತ್ತು.

-

ಹೇ , ಹುಡುಗ .
ಈ ಸಮಯದಂತವನ್ನಲ್ಲವೇ
ನೀನು ,
ಇಂದು ನಾಳೆಗಳ
ಸಂರ್ಘಷದಲ್ಲಿ
ಇದ್ದು ಇಲ್ಲದಂತೆ ,
ಸದ್ದೆಮಾಡದಂತೆ ಎದ್ದು
ಹೋದವನು, ?

-

ನನ್ನದೆ ಸೀಸ್ಗಡಿಯ ಪ್ರತಿ ತಪ್ಪಿಗೂ
ನಿನ್ನದೆ ಜಾಮಿಟ್ರಿಯೊಳಗಿನ
ರಬ್ಬರೇ ಬೇಕಿತ್ತು , ಮತ್ತೆ ಮತ್ತೆ ಅಕ್ಷರಗಳ
ಜೋಡಿಸುವಾಟಕ್ಕೆ ಬಳಕೆಯಾಗಲು,
ತಪ್ಪುಗಳ ಅಳಿಸಿ ಹೊಸಪದಗಳ ಬಳಸಲು,
ನಿನ್ನ ಜಾಮಿಟ್ರಿಯ ಕತ್ತಲೊದ್ದು
ಮಲಗಿದ್ದಕ್ಕಿಂತ , ನನ್ನಂಗೈ ಎದೆಮುಷ್ಟಿಯ
ಬೆವರನಿಯ ಅದ್ದಿ ಒದ್ದೆಯಾಗಿದ್ದೆ ಹೆಚ್ಚು ,
ತಿಳಿಯದ ವಯಸ್ಸಿನಲ್ಲಿ ತಪ್ಪಾಗಿ ಬರೆದ
ರಬ್ಬರ್ ಎದೆಯ ಮೇಲಿನ ನನ್ನ ನಿನ್ನ
ಇನ್ಷಿಲಾಕ್ಷರವ ಅಳಿಸಲಾಗದೆ ತುಕ್ಕಿಡಿದ
ಜಾಮಿಟ್ರಿ ಮೂಲೆ ಹೊಕ್ಕಿ ಕಣ್ಣಿರೊಂದನ್ನು
ಮಗ್ಗುಲಲಿರಿಸಿದೆ,
ಹಳೆಹನಿಯ ಹಾಳೆಗಿರಿಸಲಾಗದೆ.

-