ਦਿਲ ਨਹੀਂ ਲੱਗਦਾ ਤੋਰ ਜਿਗਰ ਦੇ ਟੋਟਿਆਂ ਨੂੰ
ਤਰਸਦੀਆਂ ਅੱਖੀਆਂ ਮੇਲ ਫਿਰ ਛੇਤੀ ਹੁੰਦੇ ਨਾਂ।
ਜੇ ਕੀਤੀ ਮਿਹਨਤ ਦਾ ਮੁੱਲ ਦੇ ਦੇਵੇ ਵਤਨ ਮੇਰਾ
ਗਿੰਦਰਾ ਅੱਜ ਮਾਵਾਂ ਦੇ ਪੁੱਤ ਪਰਦੇਸੀ ਹੁੰਦੇ ਨਾਂ।

-

ਮੈਂ ਨਹੀਂ ਚਾਹਿਆ ਕਿਸੇ ਦਾ ਦਿਲ ਦੁਖਾਵਾਂਗਾ
ਹੋ ਸਕਦੈ ਤੇਰੇ ਤੋਂ ਛੋਟੀ ਮੇਰੀ ਸੋਚ ਹੋਵੇ।
ਜੇ ਸੱਜਣਾਂ ਤੇਰੇ ਅੱਜ ਮੈ ਹਾਸੇ ਖੋਹ ਲਏ ਨੇਂ
ਅਰਜ ਹੈ ਇਸਦੀ ਸਜਾ ਵੀ ਮੇਰੀ ਮੋਤ ਹੋਵੇ।
ਖੈਰ ਮੰਗੀ ਮੈ ਤੇਰੀ ਤੂੰ ਵੀ ਅਰਦਾਸ ਕਰੀਂ
ਮੰਨਿਆਂ ਗੁਸਤਾਖੀ ਮੇਰੀ ਸੱਜਣਾਂ ਮਾਫ ਕਰੀਂ।

-

ਤੈਨੂੰ ਲੱਗਦੈ ਵਕਤ ਗੁਜਾਰ ਰਿਹਾ ਹਾਂ
ਬੜੇ ਔਖੇ ਜਿੰਦਗੀ ਦੇ ਰਾਹ ਵੇ ਸੱਜਣਾਂ।
ਅਸੀਂ ਤਾਂ ਫਿਰ ਵੀ ਫਿਕਰ ਹਾਂ ਕਰਦੇ
ਪਰ ਤੂੰ ਹੋਇਆ ਬੇਪਰਵਾਹ ਵੇ ਸੱਜਣਾਂ।
ਮੇਰੇ ਹੰਝੂਆਂ ਦੀ ਤੈਨੂੰ ਕਦਰ ਨਹੀਂ ਕੋਈ
ਹੁਣ ਪਿਆਰ ਵੀ ਲੱਗੇ ਅਫਵਾਹ ਵੇ ਸੱਜਣਾਂ।

-

ਸੱਜਣਾਂ ਰਿਸ਼ਤੇ ਤਾਂ ਜੁੜ ਜਾਂਦੇ ਨੇ ਸਾਹਾਂ ਦੇ
ਸਹਿਣੇ ਔਖੇ ਦਰਦ ਇਹਨਾਂ ਸਜਾਵਾਂ ਦੇ।
ਖਾਬ ਜੋ ਦੇਖੇ ਯਾਦ ਹੀ ਬਣਕੇ ਰਹਿ ਜਾਂਦੇ
ਸੁਪਨੇ ਖਾਕ ਨੇਂ ਬਣ ਜਾਂਦੇ ਸਭ ਚਾਵਾਂ ਦੇ।
ਧਰਮਾਂ ਕਰਮਾਂ ਬਣੀਆਂ ਜਾਤਾਂ ਪਾਤਾਂ ਦੇ
ਖਤਮ ਹੁੰਦੇ ਅਫ਼ਸਾਨੇ ਮੁਹੱਬਤ ਦੇ ਰਾਹਾਂ ਦੇ।

-

ਗਲਤੀ ਤੇਰੀ ਮੁਆਫੀਆਂ ਮੇਰੀਆਂ
ਮੈਂ ਤਾਂ ਫਿਰ ਵੀ ਜਰਦਾ ਰਿਹਾ।
ਇੱਕ ਗੱਲ ਤੂੰ ਵੀ ਸੋਚੀ ਸੱਜਣਾਂ
ਨਜ਼ਰਅੰਦਾਜ਼ ਕੋਣ ਕਰਦਾ ਰਿਹਾ।

-

ਅਲਵਿਦਾ ਕਹਿ ਦਿੱਤਾ ਮੈਂ ਇਸ਼ਕੇ ਦੇ ਰਾਹਾਂ ਨੂੰ

ਆਪਣਾ ਬਣਾਕੇ ਸੱਜਣ ਰੋਕ ਦੇਂਦੇ ਸਾਹਾਂ ਨੂੰ।

ਦਿਲੋਂ ਕੁੱਝ ਹੋਰ ਮਿੱਠੇ ਹੁੰਦੇ ਨੇਂ ਜੁਬਾਨ ਤੋਂ

ਨਫਰਤ ਹੈ ਜੀ ਮੈਨੂੰ ਮੁਹੱਬਤ ਦੇ ਨਾਮ ਤੋਂ।

-

ਅਣਖਾਂ ਦੇ ਆਸ਼ਿਕ ਮੋਤ ਤੋਂ ਕਦੇ ਡਰਦੇ ਨਹੀਂ ਹੁੰਦੇ

ਮਾਰ ਜਾਂਦੀ ਏ ਸਿਆਸਤ ਸੂਰਮੇ ਮਰਦੇ ਨਹੀਂ ਹੁੰਦੇ।

ਕੋਈ ਵਿਰਲਾ ਹੀ ਹੁੰਦੈ ਜੋ ਸੱਚ ਦੇ ਰਾਹ ਤੇ ਅੜ ਜਾਂਦੈ।

ਅਮਰ ਹੋ ਜਾਵੇ ਜਦ ਕੋਈ ਛਾਤੀ ਡਾਹ ਕੇ ਖੜ ਜਾਂਦੈ।

-

ਜਦੋਂ ਇਹ ਕਲਮਾਂ ਅਜਾਦੀ ਦੇ ਵੱਲ ਪੈਰ ਧਰਦੀਆਂ ਨੇਂ

ਕਿਤੇ ਹੋ ਨਾਂ ਜਾਵਣ ਬਾਗੀ ਹਕੂਮਤਾਂ ਵੀ ਡਰਦੀਆਂ ਨੇ।

ਫਿਰ ਚਲਦਾ ਨਾਂ ਕੋਈ ਜੋਰ ਵਿਉਂਤ ਬਣਾਉਂਦੀਆਂ ਨੇਂ

ਇਹ ਮਾੜੀਆਂ ਨੇਂ ਸਿਆਸਤਾਂ ਜੋ ਪੁੱਤ ਮਰਵਾਉਂਦੀਆਂ ਨੇ।

-

ਮੈਂ ਕੌਮ ਦੀ ਖਾਤਿਰ ਲੜਦਾ ਰਿਹਾ
ਕਈ ਕਹਿੰਦੇ ਰਹੇ ਗਦਾਰ ਮੈਂਨੂੰ।
ਮੰਜਿਲ ਦੇ ਰਾਹ ਤੇ ਤੁਰ ਪਿਆ ਸੀ
ਸਭ ਭੁੱਲ ਗਿਆ ਸੀ ਪਰਿਵਾਰ ਮੈਂਨੂੰ।
ਕਿੰਝ ਲੜਨਾਂ ਆਪਣੀ ਹੋਂਦ ਲਈ
ਹੱਥ ਜੋੜ ਕੇ ਮੈਂ ਸਮਝਾ ਚੱਲਿਆ।
ਮਾਂ ਤੇਰਾ ਦੀਪ ਬੁਝਾਉਣ ਨੂੰ ਫਿਰਦੇ ਸੀ
ਮੈਂ ਲੱਖਾਂ ਹੀ ਦੀਪ ਜਗਾ ਚੱਲਿਆ।

-

ਇੱਕ ਇੱਕ ਕਰਕੇ ਖਤਮ ਕਰ ਦਿੱਤਾ
ਕੌਮ ਮੇਰੀ ਦੀ ਵਿਰਾਸਤ ਨੂੰ।
ਪੁੱਤ ਪੰਜਾਬ ਦਾ ਭੇਟ ਹੋ ਗਿਆ
ਮਾੜੀ ਏਸ ਸਿਆਸਤ ਨੂੰ।
ਤੈਨੂੰ ਖਾ ਗਈਆਂ ਨਜਰਾਂ ਪੰਜਾਬ ਸਿਆਂ
ਤੂੰ ਜਦੋਂ ਵੀ ਜਾਗਣ ਲੱਗਿਆ ਏਂ।
ਹਜੇ ਜਖਮ ਚੁਰਾਸੀ ਦੇ ਭੁੱਲੇ ਨਹੀਂ
ਫੱਟ ਫਿਰ ਸੀਨੇ ਤੇ ਵੱਜਿਆ ਏ।

-