நீக்கமற நிறைந்திருக்கும்

நீலமாய்

என் நெஞ்சில்

நீ கண்மணி

-

ஒரு
சண்டைக்குப் பின்னான
மெளனத்தின் இடைவெளியில்

என்னில்
மெதுவாக படர்கிறது
முதல் முத்தத்தின் ருசி!

அனிச்சையாய்
உன் உதடுகளை
வருடுகிறது நின் நாக்கு!

வா கண்மணி!
மீதி சண்டையை இனி
முத்தத்தினால் தொடங்குவோம்!

-

அமாவாசை இரவின்

தனிமைக்கு

தாயின் கருவறை

வாசம்

-

எனக்கு நானே
எத்தனை முறை ஆறுதல் சொல்லியும்
நிற்காது மீண்டும் எட்டிப்பார்க்கிறது
விழியின் ஓரம் ஓர் நீர்த்துளி

இனி வேண்டுவதெல்லாம்
கண்ணீர் துடைக்க கரம் நீட்டும்
ஒரு உறவு மட்டுமே

-

இதுவரை உன்னிடம் பேசியதில்லை நான்
புன்னகை ஏதும் பரிமாறிக் கொண்டதில்லை

அட அதற்கும் மேலாக
உனக்கு என்னை தெரியாமல் கூட இருக்கலாம்

இருந்தும்
என் கண் நிறைந்து
வழிந்தோட காத்திருக்கும் நீர்த்துளி
உன் ஒற்றை நினைவினால்
வறண்டு போகிறது என்றால்
உனக்கும் எனக்குமான பந்தம் என்ன?

-

அகரமும் னகரமும் அறியா

இந்த உறவின் பெயர் தான்

காதலோ?!

-

சோகத்தை சிரித்து மறைக்காதே
என்றாள் சிறு கண்டிப்புடன்

தோள் சாய்ந்து கதறி அழுது
கடந்து வா என்று அணைத்து கொண்டாள்

சரி என்று கூறி
மீண்டும் சிரிக்கிறான் அவன்

-

நிராகரிப்புக்கு
பழக்கப்பட்ட நெஞ்சம்
அரவணைப்புக்கு
அஞ்சி நடுங்குகிறது

கல்லடி பட்டு
பிட்டத்தில் வாலை சுருட்டி
ஓடும் நாய்
உணவளிக்க கை நீட்டினும்
விலகி ஓடுவது போல

-

எத்தனை முறை
கேட்டாலும்
முடியாது என்ற
பிடிவாதம் தான்
அதற்கு அடுத்தான
சம்மதத்திற்கு
அழகூட்டுகிறது

-

நிராகரிக்கப்பட்ட முத்தம் ஒன்று

வழிமறந்த ஆட்டுக்குட்டியாய்

என் இதழின் வாசல் வந்து நிற்கிறது

-