ഭ്രാന്തവത്ക്കരിക്കപ്പെടുന്ന അന്തർമുഖത്വം നിഷേധാത്മകമായ പ്രവണതയാണെന്നുള്ള വസ്തുത വിവേകപൂർവ്വ ചിന്താതലങ്ങളിൽ നിന്ന് അന്യമാകപ്പെടുമ്പോൾ മനസും,ശരീരവും, വ്യക്തിത്വവും തങ്ങൾക്കന്യമായ ഏതോ ഭ്രമത്തിന്റെ കാൽക്കലടിയറവ് വെയ്ച്ച് ഭ്രാന്തരായി ജീവിക്കുന്ന അന്തർമുഖരുണ്ട്.
ഭയാനകമായ,ഭീതിജനകമായ,മാനസികമായി തികച്ചും സംഘർഷഭരിതമായൊരവസ്ഥയാണത്.
യുക്തിവിരുദ്ധമായ മുദ്രകുത്തലുകളുടെയും,ശാസനകളുടെയും,ഉപദേശങ്ങളുടെയും,പരിഹാസങ്ങളുടെയും ചുഴികളിലകപ്പെട്ട് ഭ്രാന്തിന്റെ ചങ്ങലകൾ
സ്വയമണിയേണ്ടി വന്നവർ...!
സ്വചിന്തകൾക്കും,ശരികൾക്കും ചിതയൊരുക്കി മറ്റാരുടെയൊക്കെയോ ചരടുവലിക്ക് വശംവദരായി
ഭ്രാന്തിന്റെ ചിതയിലേയ്ക്ക് തള്ളിയെറിയപ്പെട്ടവർ...!!
സാമൂഹ്യപ്രതിബദ്ധതയുള്ള സമൂഹത്തിന്റെ നിർദ്ദയമായ സംഭാവനയായ് തീറെഴുതിക്കിട്ടിയ ജീവിതം അർദ്ധമൃതമായി ജീവിച്ചു തീർത്തവർ...!!
അന്തർമുഖത്വം ഭ്രമത്തിന്റെ അടയാളമല്ല..
സ്വത്വവീക്ഷണത്തിനായുള്ള അവകാശമാണ്.
-