பூஞ்சோலை














பட்டு இங்கே பாரம்மா
வண்ணமலர் சிரிக்குது இங்கே பாரம்மா
பூனையாரின் குண்டு கண்ணை பாரம்மா
வம்பளக்கும் பாப்பா பாட்டு கேளம்மா

-

ஐஸ்வர்யா..

முத்துமணி முத்தாரமே
முல்லைப்பூ மலர்சரமே
முத்தமிழ் இசையகமே
முக்கனிச் சுவையகமே
முப்பட்டகம் ஒளியகமே

முதற்கொடி தளிரகமே
முதுஅறிவு பெட்டகமே
முப்பால் பொருளகமே
முண்டாசுக் கவியகமே
மும்மாரி பொழிலகமே

முக்கடலின் முத்தகமே
முகரிமை தலையகமே
முகிலாடும் வானகமே
முதுமொழி அறிவகமே
முழுமுதல் ஐசுவர்யமே!

-

வாணி..

வானாகும் விண்மணி
வாக்காகும் சூடாமணி
வாகாகும் சிந்தாமணி
வாள்வீசும் ருக்குமணி

நிம்மதிதரும் நீலமணி
நித்தத்தும் அழகுமணி
நிழலாகும் சின்னமணி
நிலைக்கும் வைரமணி

வாழ்த்திடும் கண்மணி
வாயாடும் ரெங்கமணி
வாலாட்டும் தங்கமணி
வாசமாகும் பவளமணி

நின்றாடும் அருள்மணி
நிறைவாகும் நேசமணி
நிசமாகும் முத்துமணி
நிறமாகும் ரத்தினமணி

வாதாடும் பொன்மணி
வாண்டாகும் கலாமணி
வாரிசாகும் அறிவுமணி
வாழ்வாகும் கலைமணி

-

முழக்கமிடும் பறையிசை..

மூத்தக்குடியின் அடையாளம்
மூச்சுக்காற்றும் அனல்பறக்க
மூட்டும்நெருப்பு பகைமுடிக்க
மூண்டபகையில் வென்றநீதி
மூக்கம்கொண்ட உணர்விது
டகர... டகர... டண்... டண்...

ஆர்ப்பரிக்கும் அலையோசை
ஆட்டுவிக்கும் கேட்பவரையும்
ஆவேசம்கொண்ட புரட்சியிது
ஆட்டங்காணும் அதிகாரமும்
ஆதிப்பறையின் முழக்கமிது
டகர... டகர... டண்... டண்...

தீக்கொழுந்தும் திடம்வார்க்க
தீயைக்குடித்து விறைத்திடும்
தீண்டாமையை சிதைத்திடும்
தீண்டிப்பார்க்க அதிர்ந்திடும்
தீயவையகற்றும் எழுச்சியிது
டகர... டகர... டண்... டண்...

காய்ந்தநிலவுக் கையிலேந்தி
காய்ச்சுந்தணலில் உயிரூட்டி
காலமகளின் சந்தங்கள்கூட்டி
காட்டாறாக பொங்கியெழுந்து
காடையரை ஒடுக்குமிசையிது
டகர... டகர... டண்... டண்...👇

-

மிதுன்...

மிட்டாய் நிறத்தழகா
மிரட்டும் நடையழகா

மிளிரும் முழுமதியா
மின்னும் தாரகையா

மிதமான போக்கழகா
மிகையான பேரழகா

மிக்காரின் அன்பனா
மின்னாரின் காதலனா

மிடுக்கான குரலழகா
மிருதுவான மனசழகா

மிழற்றும் வசியக்காரா
மிஞ்சிடும் வம்புக்காரா

மின்சாரக் கண்ணழகா
மிராசுதார் கலையழகா

மித்திரரின் நேசக்காரா
மித்தியமற்ற பாசக்காரா

மிகுகொடை அறத்தழகா
மிச்சமாக்கும் பண்பழகா

மிரளும் குறும்புக்காரா
மினுக்கும் பேச்சுக்காரா

மிகுமகிழ்ச்சி அளிக்கும்
மிதுபாலனுக்கு ஆசிகள்!

-

சுட்டிகள் நாங்கள் தேவதை
கட்டிதங்கம் எங்கள் தந்தை

குட்டிக் கதைகள் சொல்வார்
கிட்டிப்புள்ளு ஆடிட வருவார்

ஏட்டிக்கு போட்டி செய்வோம்
நெட்டித் தள்ளி பகைப்போம்

சுட்டிக் காட்டி உணர்த்துவார்
தட்டி கொடுத்து திருத்துவார்

ஊட்டி வளர்ப்பார் பேரறிவை
கட்டி கொள்வார் பேரன்புடன்

பட்டு அப்பாவின் பிறந்தநாள்
வட்டு தட்டில் தின்பண்டங்கள்

சிட்டுச் சிட்டுப் புள்ளினங்கள்
சிட்டாய் விரைந்து வாருங்கள்

பட்டுப் பட்டுப் பட்டாம்பூச்சிகள்
பட்டெனக் கிளம்பி வாருங்கள்

பூக்கள் கொண்டு வாருங்கள்
பாக்கள் இசைக்க வாருங்கள்

பறந்து விரைந்து வாருங்கள்
பிறந்தநாளிற்கு வாழ்த்துங்கள்!

-

விருதுபட்டி மண்ணுக்காரா
விருதாகும் மகராசன்நீயே

விளையாட்டு மனசுக்காரா
வில்லேந்திய மன்மதனே

விழிபேசும் சிமிட்டாங்காரா
விசையீர்க்கும் சிங்காரனே

வினையாற்றும் பாசக்காரா
விதிவிலக்கிடும் பாங்கனே

விகடமானக் குறும்புக்காரா
விருப்பமானக் குணசீலனே

வியப்பளிக்கும் மாயக்காரா
வித்திடும் மாதொருபாகனே

விரல்பேசும் வித்தைக்காரா
விறல்சேர்க்கும் விசாலனே

விண்ணாளும் உயிர்க்காரா
விந்தையாகும் உன்னதனே

விலாசமாகும் நட்புக்காரா
விளைவிக்கும் நம்பிரானே

விட்டுத்தரும் பேரன்புக்காரா
விடையாகும் பேரானந்தனே!

-

தனஞ்..

தங்கமக இரத்தினமே
தகப்பனுக்கு சித்திரமே
தமயனுக்கு வலகரமே

தண்சுடரின் மதியழகே
தருணியின் கதிரழகே
தரங்கரின் அதியழகே

தன்னறிவுப் பெட்டகமே
தன்னிறைவுச் சட்டகமே
தன்னுண்மை அட்டகமே

தமிழமுது மொழியழகே
தண்நிறை விழியழகே
தலைப்பண்பு சுழியழகே

தலைகோதும் வசந்தமே
தகைபாடிடும் சாந்தமே
தலையாட்டும் பாந்தமே

தலையலின் முத்தழகே
தத்துவார்த்த சித்தழகே
தசநாதத்தின் வித்தழகே

தன்னிகரற்ற ஓவியமே
தலைசிறந்த காவியமே
தலையன்பு திவ்வியமே

தடங்கல்களைத் தகர்த்து
தனித்துவமாய் விளங்கி
தடம்பதிக்க வாழ்த்துகள்!

-

நெனப்பும் நீயடி கொன்றையே..

நெய்தல்நிலத்து முருகியலே
நெடுந்தெருவின் செம்மயிலே

நெடுஞ்சாலையின் புகலிடமே
நெடியோனின் அலங்காரமே

நெட்டாயமாய் வளர்ந்தோங்கி
நெட்டித்தள்ளி கிளையோங்கி

நெடுக்குச்சுவரின் குடையாகி
நெடுங்கடைநெடுக நிழலாகி

நெடுங்கதையான எழிலகமே
நெக்குவிட்டது உவர்நிலமுமே

நெடுஞ்சாண் கிடையாய்விழ
நெஞ்சாங் குலைநடுங்கியழ

நெட்டுயிரைத் துறந்ததேனோ
நெடுந்துயிற்க் கண்டதேனோ

நெருஞ்சிமுள்ளாய் நெருடுது
நெடுவீடுமுனை அழைத்தது

நெறிப்படுத்த மறந்துவிட்டேன்
நெற்றெடுத்துச் சேர்த்திட்டேன்

நெக்குருகி வேண்டிநிக்கேன்
நெகிழ்ந்து துளிர்த்துவிடேன்!!

-

தோழர்அருண் மே17 இயக்கம்

தோள்சுமக்கா பிள்ளையிவன்
தோழரென அழைத்திடுவான்

தோற்றத்தில் முழுமதியழகன்
தோரணையில் அருணனிவன்

தோள்கொடுக்கும் பேரன்பன்
தோலுரிக்கும் போராளியிவன்

தோன்றாத்துணை பேராயன்
தோன்றிடும் பேரொளியிவன்

தோடமில்லாத இயக்கமிவன்
தோடிப்பண் இசையுமுமிவன்

தோலாட்டமதை வேரறுப்பான்
தோல்வியை தோற்கடிப்பான்

தோயமதின் வெண்முத்திவன்
தோயதரமதின் பனித்தலிவன்

தோய்ந்தாரின் முக்கியனிவன்
தோழமையின் தோன்றலிவன்

தோடகத்தின் செஞ்சுடரோனே
தோன்றுகயென்றும் புகழோடு!!

-