*ಗಜಲ್.*
********

ತಂಗಾಳಿ ಪಿಸು ನುಡಿಯುತಿದೆ ಹೇಗೆ ಹೇಳಲಿ ನೀನಿಲ್ಲವೆಂದು.
ಬಿರುಗಾಳಿಯು ಎದೆ ನುಸುಳಿದೆ ಹೇಗೆ ತಿಳಿಸಲಿ ನೀನಿಲ್ಲವೆಂದು.

ಪಯಣವಿದು ಸಾಗುತಿದೆ ತನ್ನಷ್ಟಕೆ ತಾನು ಸಾಗಿಹೋಗುತಿದೆ.
ಕಣ್ಣೀರಿಡುವ ಆ ಮೋಡಗಳಿಗೆ ಹೇಗೆ ನೆನಪಿಸಲಿ ನೀನಿಲ್ಲವೆಂದು.

ಬರಿದಾಗಿ ಹೋಗಿದೆ ಈ ಹೃದಯವು ನಿನ್ನದೊಂದೂ ಸಪ್ಪಳ ಕೇಳದೆ.
ಕಿವಿ ಬಳಿ ನೀನುಲಿದ ಆ ಮಾತನು ಹೇಗೆ ಕೇಳಿಸಲಿ ನೀನಿಲ್ಲವೆಂದು.

ಬಿರುಕು ಬಿಟ್ಟ ಜೋಪಡಿಯಿಂದ ಬೆಳಕಿನ ಗೆರೆಗಳು ನುಸುಳುತಿವೆ
ಜೀವವಿಲ್ಲದ ಕನಸಿನ ಗೂಡನು ಹೇಗೆ ನೋಡಲಿ ನೀನಿಲ್ಲವೆಂದು.

ನಿರಾಸೆಯ ಅನುಭವ ಎದೆತುಂಬಾ ಸುತ್ತಿಕೊಂಡು ಉಸಿರುಗಟ್ಟಿದೆ
ರೆಕ್ಕೆ ಕಿತ್ತಿದ ಹಕ್ಕಿಯಂತೆ ನಾನೀಗ ,ಹೇಗೆ ಸಹಿಸಲಿ ನೀನಿಲ್ಲವೆಂದು.

ಆದರೂ ಉಸಿರಾಡಲು ಬಯಸುತ್ತಿರುವೆ ರವಿಯ ಬೆಳಕ ನಂಬಿ
ನೀರಲಿ ಕಂಡ ನಿನ್ನ ಬಿಂಬವ ಹೇಗೆ ಮರೆಯಲಿ ನೀನಿಲ್ಲವೆಂದು.

*ರವಿ.ವಿಠ್ಠಲ. ಆಲಬಾಳ.*
(ಕನ್ನಡಿಗ ರವಿ)

-

ನಾನು ಕವಿತೆ ಬರೆಯುವುದು ಪುಸ್ತಕ ಪ್ರಕಟಿಸಲೆಂದಲ್ಲ, ನಾ ಸತ್ತ ಮೇಲೆ
ಒಬ್ಬರಾದರೂ ಓದಲೆಂದು.

-

ಕರಗುತಿರುವೆ ನನ್ನೊಳಗೇ ಮೌನ ಜೀವದಂತೆ
ಕಾಂಕ್ರೀಟ್ ಸಮಾಧಿಗಳ ನಡುವೆ...
...ಇಳೆ ಅಲ್ಲ ನಾನು,ಕೊಳೆಯಾಗಿ ಉಸಿರಾಡುತಿರುವೆ.

-

ಕಾಮ
ಮೋಹ
ಮದ
ಮತ್ಸರ
ಕ್ರೋಧ
ಲೋಭ
ಅಭವಮಾತ್ರ
ಅಹಂಕಾರ
ಸ್ವಾರ್ಥ
ಧುರ್ಮತಿ.
ಈ ದಶಮುಖಗಳ ಗೆದ್ದು ಬಂದವನೇ ವಿಜಯಶಾಲಿ.

-

ಹಾಯ್ಕು
*****

ನಕ್ಷತ್ರ ಹಾಸು
ಕಣ್ಣಿಗೆ ನಿದಿರೆಯು
ಸೂಜಿ ಸಪ್ಪಳ!

-

ಹಾಯ್ಕು.
******

ಸೂರ್ಯ ದಣಿದ
ಜನರ ಗೊರಕೆಗೆ
ಚಂದ್ರ ಓಡಿದ !

-

ಹಾಯ್ಕು.
******

ಭ್ರಮರ ಗಾನ
ಪುಷ್ಪಗಳ ಪುಳಕ
ಭಕ್ತಿ ನಮನ

-

ಹಾಯ್ಕು.
******

ಮುಂಜಾನೆಗೆದ್ದು
ಮೈ ಹಿಗ್ಗಿಸಿದೆ ಹಕ್ಕಿ
ಯೋಗಾಭ್ಯಾಸವು !

-

ಹಾಯ್ಕು.
******

ಆರಿದ ದೀಪ
ಹೊಗೆಯ ನರ್ತನಕೆ
ಗಾಳಿ ಚುಂಬನ

-

ಹಾಯ್ಕು.
******

ದೃಶ್ಯ ಖಜಾನೆ!
ರೆಪ್ಪೆಯಲಿ ಸುಭದ್ರ
ಕಣ್ತೆರೆಯೀಗ !

-