#বুজা নুবুজাৰ ভাষাৰে

~~ বাহিৰত ফাগুনৰ বৰষুণ
অথচ তোমাৰ কাণষাৰ নাই !
বলিয়া বতাহজাকে তোমাক
মাতাল কৰা নাই ?

~~ বুকুত আজি অত দিনে ধুমুহাৰ তাণ্ডৱ
তুমি লক্ষ্যই কৰা নাই ।

-

"হেঁপাহ"
উকা ৰাতিৰ স্মৰণত বহুযুগীয়া বাসনা
খিৰিকিৰে বৈ অহা শিহৰণৰ
চিনাকীও বহুদিনীয়া,
বাহিৰত উত্তাল মেঘৰ গুণগুননি
এজাক যেন উন্মাদ বৰষুণৰ আগজাননী,
থুনুকা শব্দৰ ঠেহ পাতি আজি
দুচকুত বিচাৰিম প্ৰেমৰ ৰাগী,
আঙুলিৰ পৰশ তুলি
আঁচলত খেপিয়াম শৰতৰ শেৱালী,
উশাহৰ কোমল ধ্বনিত
উথলিব অভিমানী হেঁপাহৰ নিয়ৰকলি,
বুকুত সাজিম তুমি আৰু মই
আমি হোৱাৰ কাহিনী ।

-

"দোমোজা"

অনুভূতিবোৰৰ অনুৰোধ জানো ৰাখিবা !!
অতীতক বৰ্তমানত‌ নামাতিবা
লাগিলে একোৱেই নক'বা
কিছুমান কথাই বৰকৈ‌ বিন্ধে মোক,
ঠিক আছে নালাগে
আমাৰ সম্পৰ্কক একো নাম দিব
আমি প্ৰেমিক প্ৰেমিকা নহয়
কিন্তু বুকুৰ হেঁপাহবোৰক
ভালপোৱা নহয় বুলিও নক'বা ।
তোমাক কি যন্ত্ৰণাই খুলি খুলি খায় ?
মোক সাৱটি ৰখাৰ সময়তো
জানো বিষ অনুভৱ হয় ??
ঠিক আছে নেদেখো বাৰু সপোন
যদিহে মোৰ অনুভৱৰ মৃত্যু মাতি
কাৰোবাক কৰি ল'ব পাৰা আপোন ।
নালাগে মোক প্ৰতিশ্ৰুতিৰ বহল বাক্য
উকা ৰাতি অভিমানী হোৱা মনটোৰ বাবে
কেৱল তোমাৰ মৰমসনা মাতটোৱে যথেষ্ট ।

-

অভিমানেৰে ভৰা
প্ৰতিটো উন্মাদ নিশা
তুমি বিচাৰিতো চোৱা
আকুলতাৰে মেৰিয়াই ৰাখিম
তোমাৰ সমস্ত হেঁপাহ,
এবাৰ ভালপাওঁ বুলি কৈ চোৱা
প্ৰতিশ্ৰুতি দিম তোমাৰ বুকুত
শেষ উশাহ লোৱাৰ ।

-

অব্যক্ত শব্দৰ ভোকটোৱে
হেঁপাহৰ উকমুকনি বঢ়ায়,
তুমি হয়তো নাজানা
চকুৰ ভাষা বুজাৰ চেষ্টা কৰোঁতেই
মোৰ আধা জান যায় ।

-

আৱেগৰ ৰাগিৰে আৱদ্ধ
এটি জয়াল নিশা,
ভালপোৱাৰ বাসনাত অভিমানী
হৈ ৰোৱা দুচকুৰ বাৰ্তা,
অলপ মৰমৰ তাড়নাত
জীৱন অৰ্পণৰ প্ৰতিজ্ঞা,
বিশ্বাসৰ আলিংগনত উচৰ্গা
ভৱিষ্যতৰ প্ৰত্যাশা,
তাতেই প্ৰাণ পায়
হেজাৰ হেঁপাহৰ অলীক কল্পনা !!

-

বিশ্বাসৰ দহনত আধামৰা তাই
আৱেগৰ তাড়নাত ধৰফৰাই সময়,
নিজক হেৰুৱাৰ আজি অত দিন হ'ল
দুচকু মোহাৰিলেও এতিয়া শূন্যতাই পায়,
চিনাকী চহৰৰ অচিনাকী গোন্ধটোৱে
তাইৰ উশাহ পি খায়,
তমসাৰ ৰাতিও তাইক অস্তিত্বই হাঁহি যায় ।

-

অকলশৰে কিমান কৰিম
সুখৰ সন্ধান,
তুমিতো কাষতে আছা
তাতকৈ দিয়ানা তোমাৰ বুকুতে
খেপিয়াই চাওঁ জীৱন !
তুমি যাঁচি চাবা অলপ মৰম,
মই তাতেই শান্তিৰ উশাহ ল'ম ।

-

কিবা এটা আছিল
ভবাতকৈ বহুত বেছি !!
এতিয়া একো নাই,
বহুত বুজিছিলো !!
এতিয়া অলপো নুবুজো,
হয়তো ভালকৈয়ে জানিছিলো‌ !!
এতিয়া নিচিনো 😊

-

আৱেগক বেচিলো
অহংকাৰীৰ হাতত
তাৰ পিছতো তুমি সুধিছা
মোৰ হাঁহিত ইমান কিয় কৃত্ৰিমতা !

-