ତୁମେ ଦିଗନ୍ତ ସେପାରିର କୋଳାହଳ
ମୁଁ ଯେ ନୀଳରଙ୍ଗର ଢେଉ
ତୁମେ ନୀଳ ଆକାଶର ଉଡ଼ନ୍ତା ଖଗ
ମୁଁ କୋଇଲି ତାନର କୁହୁ ।
ତୁମେ ହୃଦୟ ତୃଷ୍ଣାର ଜୀବନ ଧାରା
ମୁଁ ତୁମ ତୃଷାର୍ଥ ଚାତକ
ତୁମେ ମନ ଉଦ୍ୟାନରେ ପ୍ରେମ ସୁମନ
ମୁଁ ସେଇ ପୁଷ୍ପର ମହକ ।
ତୁମେ ମୋର ଆଖିର ଅୟୁତ ଆକାଂକ୍ଷା
ମୁଁ ଯେ ଏକ ଅଧୁରା ଆଶା
ତୁମେ ଘନ ରଜନୀର ଅସଂଖ୍ୟ ସ୍ୱପ୍ନ
ମୁଁ ଯେ ଆବେଗହୀନ ନିଶା ।
ତୁମେ ମୋ ସୀମାହୀନ ଗୋପନ ରହସ୍ୟ
ମୁଁ ଯେ ଜୀବନର ଉଚ୍ଛ୍ଵାସ
ତୁମେ ନିଦାଘେ ମରୁଦ୍ୟାନ ମରୀଚିକା
ମୁଁ ଯେ ତୁମ ପ୍ରେମ ପୀୟୂଷ ।
ତୁମେ ମୋ ହୃଦୟେ ଶୀତଳ ତରୁଛାୟା
ମୁଁ ଏକ ଜଳନ୍ତା ପାବକ
ତୁମେ ସୃଷ୍ଟିର ଏକ ସୁନ୍ଦର ସର୍ଜନା
ମୁଁ ତୁମ ମନର ପ୍ରେମିକ ।

- ଜୀବନ ଜ୍ୟୋତି

-

ଯେତେ ଭାଷା ଶିଖୁଛ ଶିଖ
ନିଜ ମାତୃଭାଷାର ମହତ ରଖ,
ଯେତେ ଭାଷା କହୁଛ କୁହ
ନିଜ ମାତୃଭାଷାକୁ ସମ୍ମାନ ଦିଅ।

ଅନ୍ତର୍ଜାତୀୟ ମାତୃଭାଷା ଦିବସର ଅଭିନନ୍ଦନ

-

ତୁମେ ଦେଖେଇଥିବା ସ୍ୱପ୍ନ
ଆଜି ମଧ୍ୟ ଆଖି ପଲକରେ
ସତେଜ ହୋଇ ରହିଛି...
ସେ ସ୍ୱପ୍ନ ସବୁ ହୃଦୟ ଭିତରେ
ସ୍ମୃତି ପାଲଟିଗଲାଣି
ଭାବିବା ପାଇଁ ଫିକା ପଡ଼ିଯାଏ ରାତି,
କିନ୍ତୁ ତାକୁ ପୁରା କରିବା ପାଇଁ
ନା ତୁମେ ଅଛ ନା ତୁମ ପ୍ରତିଶ୍ରୁତି...

- ଜୀବନ ଜ୍ୟୋତି ✍️

-

ଦିନରେ ତ ବସିବାକୁ
ସମୟ ମିଳେନା
ସ୍ୱପ୍ନ ଦେଖିବା ଦୂର
ହଁ, ବେଳେବେଳେ
ଖାଲି ସମୟରେ
ପୁରୁଣା ସ୍ୱପ୍ନ ସବୁ
ମନେ ପଡ଼ିଯାଏ
ସେଇ ଏକାନ୍ତ
ମୁହୂର୍ତ୍ତ ଭିତରେ...
ହେଲେ ନୂଆ ନୂଆ ସ୍ୱପ୍ନ ସବୁ
ଅଧ ରାତିରେ ଆସେ..
ସ୍ୱପ୍ନ ଦେଖି ଦେଖି
ରାତି ସରିଯାଏ
ପୁଣି ବେଳେବେଳେ
ଏମିତି ବି ହୁଏ
ସ୍ୱପ୍ନ ନସରି
ରାତି ପାହିଯାଏ,
ନା ତାକୁ ଭାବି ହୁଏ,
ନା ପୁରା କରି ହୁଏ,
ଦେଖିଥିବା ସ୍ୱପ୍ନ ସବୁ
ଏମିତି ଅଧା ରହିଯାଏ।

- ଜୀବନ ଜ୍ୟୋତି ✍️

-

ଜୀବନ ରାସ୍ତାରେ ଚାଲୁ ଚାଲୁ
କେବେ ଯେ ପଥ ହରା ହୋଇଗଲି
ମୋହ ମାୟାର ସଂସାର ସୁଅରେ...
ସବୁ କିଛି ଲାଗୁଥିଲା ନୂଆ ନୂଆ,
ସତେ ଯେମିତି ପ୍ରଥମ ଥର।
ସମୟର ଅନ୍ତରାଳରେ
ସବୁ କିଛି ଯେମିତି ବଦଳିଗଲା...
ମାଡି ଆସିଲା ଅନ୍ଧକାର,
ଠିକ କଳା ମେଘ ପରି
ଅନୁଭବ ଆଉ ଅନୁଭୂତିରେ
ଏକ ନୂଆ ମୋଡ଼ ନିଏ ଜୀବନ...
ଅନୁଭୂତ ହୁଏ
ସୁଖ ଓ ଦୁଃଖ ମଧ୍ୟ ଏଠାରେ
ଭସା ମେଘ ପରି ଭ୍ରାମ୍ୟମାନ...

- ଜୀବନ ଜ୍ୟୋତି

-

ଜାଣେନା କଣ ଏଇ ସମ୍ପର୍କ...
କିନ୍ତୁ ତୁମ କଥା ଭାବୁଥାଏ ରାତି ଦିନ
ଦେଖିବା ପାଇଁ ଝୁରୁ ଥାଏ ମୋ ମନ।
ତୁମ ସ୍ପର୍ଶ ମାତ୍ରକେ ବନ୍ଦ ହେଇଯାଏ ଦୁନିଆ
ତୀବ୍ର ହୋଇ ଉଠେ ହୃଦୟ ସ୍ପନ୍ଦନ...
ଚିହ୍ନା ଚିହ୍ନା ଲାଗେ ସବୁ ଅଚିହ୍ନା ସହର
ତୁମେ ଥିଲେ ପାଖେ ମୋର
ତୁମ ବିନା ସବୁ ଫିକା ଲାଗେ
ରଙ୍ଗହୀନ ଲାଗେ ଏଇ ସଂସାର...
ତୁମ କଥା ଭାବି ମନେ ହସୁଥାଏ
ଗୁଣୁଗୁଣୋଉ ଥାଏ ତୁମ ପାଇଁ କବିତା
କେଜାଣି କାହିଁକି ତୁମକୁ ଦେଖିଲାଦିନୁ
ତୁମ ସହ ବଢିଚାଲିଲା ନିବିଡ଼ତା
କେଜାଣି ଲାଗିଲା ମୋତେ କୋଉ ବେମାରି
କଣ ଇଏ ପ୍ରେମ! ନା ଆଉ କିଛି?

- ଜୀବନ ଜ୍ୟୋତି✍️

-

ନିଶାସକ୍ତ ରଜନୀର
ଚନ୍ଦ୍ରମା ଆଗରେ
ଦୁହେଁ ମିଶି ଦେଖିଥିଲେ
କେତେ ଯେ ସ୍ୱପ୍ନ
ସେଇ ସ୍ୱପ୍ନ ପୂରଣ ପାଇଁ
କିଛି ସମ୍ଭାବନାକୁ
ସତ୍ୟ କରିବା ପାଇଁ
ତୁମେ ଦେଇଥିଲ
ତୁମର ପୂର୍ଣ୍ଣ ପ୍ରତିଶ୍ରୁତି...
ପ୍ରତିବଦ୍ଧତାର ଆଶା ରଖି
ସ୍ୱପ୍ନ ଦେଖୁ ଦେଖୁ
ସମୟର ସୁଅରେ
ସ୍ୱପ୍ନ ତ ରହିଗଲା
ହେଲେ ତାକୁ ପୂରଣ କରିବା ପାଇଁ
ନା ଅଛ ତୁମେ,
ନା ଅଛି ତୁମ ପ୍ରତିଶ୍ରୁତି
ଅଛି ଯଦି ତୁମେ ଦେଖେଇଥିବା
ସେଇ ଅବାସ୍ତବ ସ୍ୱପ୍ନ....
ଏବଂ ତୁମ ସହ ଅତୀତର
ସେଇ ଅଭୁଲା ସ୍ମୃତି...

- ଜୀବନ ଜ୍ୟୋତି✍️

-

ସକାଳର ସୁନେଲି କିରଣେ,
ନଈ ଉପବନେ ନିତି ହସୁଥାଏ
ଶାରଦୀୟ ପାର୍ବଣ ଆଗମନେ।

ଶୀତଳ ସମୀର ଝଙ୍କାରେ
ଖେଳି ଉଠୁଥାଏ ପାଖୁଡ଼ା ମେଲାଇ,
ସ୍ୱାଗତ ଅଭିବାଦନ ଜଣାଉଥାଏ
ଶୁଭ୍ର ତନୁକୁ ବିଛେଇ ଦେଇ।

- ଜୀବନ ଜ୍ୟୋତି✍️

-

ଜୀବନର ବହିରେ...
ଲେଖି ହେଇଯାଏ କେତେ ଯେ କଥା
ପୃଷ୍ଠା ପରେ ପୃଷ୍ଠା ଲେଉଟାଇ
ବିତି ଯାଇଥିବା ଅତୀତ ଓ ବିରହ ଗାଥା।
ବର୍ତ୍ତମାନର ପୃଷ୍ଠା ପରେ ଯୋଡ଼ି ହୁଏ ନୂତନ ଫର୍ଦ୍ଦ
ଭବିଷ୍ୟତର କାହାଣୀ ପାଇଁ...

- ଜୀବନ ଜ୍ୟୋତି✍️

-

ସମ୍ପର୍କର ଦୋଛକିରେ ଜୀବନ
କା କଥା ଶୁଣିବ ଆଜି ଅସ୍ଥିର ଏ ମନ।
ମନ ଆଉ ବିବେକର ଲଢେଇ ମଧ୍ୟରେ
ଗୋଟେ ପଟେ ଲୋକଙ୍କ କଥା
ତ ଅନ୍ୟ ପଟେ ବିଶ୍ୱାସ ଆଉ ଭରସା...
ତଥାପି ମନରେ ଦ୍ଵନ୍ଦ ଓ ଅବସାଦ
ଦୁଇ ସମ୍ପର୍କର ଦୁଇ ପାର୍ଶ୍ଵରେ
ଗୋଟେ ପଟେ ପ୍ରେମ ଓ ଅନ୍ୟଟି ବନ୍ଧୁତା
ପୁଣି ସ୍ମୃତି ଓ ଭାବନା ମଧ୍ୟରେ
ବଳି ପଡ଼ିଯାଏ ନିଜର ଖୁସି...
ମନ ଆଉ ବିବେକର ଲଢେଇ ମଧ୍ୟରେ
ବିଚରା ହୃଦୟ ଆଜି ଇତସ୍ତତ
କାରଣ ସମ୍ପର୍କର ଦୋଛକିରେ ଜୀବନ...

- ଜୀବନ ଜ୍ୟୋତି✍🏻

-