Gisikni ka•tongna kenani
Somoio gital ja•ku de•ani.
Ra•rikgimin ka•tongko jakgitelatna anga kenenga,
On•taiode chol mai ong•gen anga nikenga.
Bnekgimin ka•tongko anga an•tangan chimonge jorajok,
Sadikaniko cha•tote nikjok.
Jroana sitengtoan ku•rangko anga knamanjok,
Ka•tong amjae mikchi pake anga chebaasajok.
Anga amjabea saksanan dakrikjok,
Somoi ra•e ka•tongko chelchake an•tangko sasono donjok.
Da•alo nang jak snilako man•on bao ang ka•dongani,
Knakua chrika ku•rang ang saknaani.
Ka•dingani kusiniko nang jako nikjagringatoba,
Ong•jawaha altuade nang kamo ka•saan gapoba.
Man•janajok altue sasonogipa ka•tongko moatna,
Aganskia, gisik ra•atpiltaitaia kenjagoka jakgitelattaina.
Sa•diktaigen bnektaigen aro jakkale galangtaigen,
An•tangni nanga chu•ongahaode angko waten re•angtaigen.
Gisik dakgrika salantian belbela,
Ka•tong aro gisik agana golpoa.
Gital ja•ku ga•na ang ka•tongko ro•ong pilata,
Nike mikbokoba ka•tong cha•suoba,
Sadiktaijachina ang ka•tongko sasonon donata.-
An•tangni a•gilsakko rikchakatengo,
Ia namjabegipa a•gilsakko
Maikai mikkangchakgnok?
Chanchiao ang gisik dubienga.
Ang ka•tongko namatpilna chol on•bo Apa.
Ia be•gimin chil•engsani pari gilgaoengon,
Matengmitingo sa•dikani an•tesreng da•o ang gisikko jroata.
Badita mata tu•ahachim da•o chanchiato misilata.
Sitengtoe chakchikbajok nang•on samra sampiljok.
Da•o ran•anggimin parin' bisingkap gilgaoosa, gital be•en nagataiosa, matgimin dagiko nike ua salrangko gisik ra•enga mattaina kenenga.
Ang ka•tongko mangrakatbo Apa.
Bilakatbo ang ka•tongko rikchakatna gital ang a•gilsakko.-
Eyes irresistibly sparkling,
I shouldn't be saying this .
So enchanting, i lose my head over,
I am falling, undoubtedly I am gonna fall for it over and over again.
-
Angni mingnama kamrangni gimin ong•ja iarang indiba Uni angna inditan ka•saani giminsa.
-
Jripna man•jaenggipa gisikko mumuaniara seanian ong•a. Ku•antikon sebo kattaantikon jotbo. Knagipa dongjaesa tuna man•jaenga, molmegipa griesa mikgil sikjaenga. Seachi pakgalna on•bo roktokjoko jrip tubo.
-
Ang nikjagringatgipa bimang sepangengon,
Brangenggipa a•gisio,
Anga neng•goke nikjumangengasama?
Kakket ine chanani angko neng•gokatnasa,
A•gisio brangatna angni somoiko cha•ugipasa.
Chongmot ine chagalgimin bimangrang,
Ia changoba ang ka•donganiko apchonata.
Chel•ao nikjagringenggipa bimangna katchaan nambatgenkon?
A•gisio nikanirangna rikgramgimin bimangrang,
Ang gisikna dagi.
Ong•jawa ia nikengaba kakket,
Dikdiksa neng•ako gimaatna angna on•mikengasa.
Ang nikaode anga songrean matchotkujaenga,
Songrebaanio angni skie ra•ani chu•sokkujaenga.
Indiba iarang ong•ahaode nikba-nibagimin pilakni damosa nang•ko,
Dabigen anga an•tangoniko.
Nang•na angni nambatako,
Brangate a•gisio rugimin
Gamchatbata bimangkosa on•gen nang bi•anirangna.-
Nang mikkang jajong gita,
Nio chu•ongja rim•na dako man•ja,
Bimang ching•a ang mikronna miknapa.
Nang mikron walni askirang gita,
Andala ning•tuao ching•batroroa.
Jrimjrimgipa wal na.a,
Sikdikao chipila nang kattarangko.
Parakja ku•rangchi mesoka chinchi,
Cholko ra•ode u•ina,
Mamingan uanon
Chansok nisokgija salgi bangbango.
Donenga golporango nitoako nitogijako,
Knagipakosa nangenga golporimnasa ripeng dongjaenga.
Somoiantin re•pakenga sengenggipasa nikchangenga,
Oh! Walni salgi nang ning•tuao angasa brangenga.-
Gisiko matgimin parirang,
Ka•tongo bu•simgimin alrang kusiniko chatotna on•ja.
Chanchianirangko brangata,
Kenanirangko bariata.
Ning•tuao parakna man•gija, chaktogija su•ugipa saknaanirangchi mandeko nokkol ita.-
Salo gita uarang nikna chiksima ong•jaoba,
Sepangbatao nang•ni teng•a gimarorogenoba.
Andalao Rupa rongko nongan nitobata,
Chel•ao nang•ni teng•aniko nina katchabata.
Rim•na dako rim•sokja, mikronna okaja.
Mikbokana chapaoba man•na sike rikoba,
Hajal a•chang chel•aosa, silgasni badeaosa.
Walanti sengsomana mikkang nina nidomana,
Nigame teng•ronga, angna jamesokronga.
Darang ong•ja walo ang gisikko muni pigipasa,
Chel•beaoni ang ka•tongo donge bilake sason ka•gipasa.-