Mere do khayalon ke beech ki jo doori hai,
Uss doori mein bhi maujoodgi teri hai

-

Yeh shayar hona bhi kaisi musibat hai,
Shayad mann ki saari baatein hi,
Ban gayi ek aafat hai...

-

Sach aur Gham

-

Naa jaane kaunsi baat thi woh,
Jo aankhon mein hamesha rehna chahti thi,
Kyun ek aansu ne umr bhar yahan apna ghar bana liya...

-

Mann chup chup aahein bharta hai,
Jab teri aankhein padta hai,
Yun halke se jab iss dil mein,
Aahista prem ubharta hai
Aur phir tere hi naam ke,
Qaside hriday mein chalte hai
Yun sapne apni aankhon mein,
Phir qishton mein palte hai
Phir wahi kahaani aati hai,
Jahaan prem athaah hojata hai,
Samaya nahi jaa pata hai,
Aur phir thukraya jaata hai
Jab prem nahi apnaye woh,
Jispe prem lutaya jaata hai,
Tab uski yaadon mein rehkar hi,
Usey bhulaya jaata hai...

-

Jo dost ho tum ab bhi,
Phir kyun mujhse koi gila nahi karte,
Dost yun har waqt toh,
Muskura ke mila nahi karte...

-

Bewafai ki naa maang maafi,
Meri jaan tu doosri khata na kar,
Main banda hi theek hu, mujhe itna acha na bana,
Aisi baat karke tu mujhe khuda na kar...

-

Rehne do naa...

-

Tum ek pal ko aajao,
Bas aajao toh ruk jaana,
Ho sake toh tham jaana
Kehne ko bahot kuch hai,
Aaj zara der se ghar jaana?
Acha, jaldi jaana hai?
Toh theek hai, kal phir aana
Par dekho kal ruk jaana,
Aur ho sake toh tham jaana...
Kal phir tum se yeh kehna hai,
Ke dekho kal phir se aana
Aur ho sake toh tham jaana... — % &

-

Tab tum aaoge?

— % &

-