குழப்பம் ஒரு புறம்,
அச்சம் மறு புறம்,
இடையில் சிக்கியப்படி ஓடும்
நதியின் தேடலானது,
தெளிவென்னும் கடலை,
என்று தான் அடையுமோ?

-

நிலவுக்கு இரவின் மேல் காதல்,
இருளுக்கு ஒளியின் மேல் காதல்,
மழைக்கு மண்ணின் மேல் காதல்,
தேனிக்கு மலரின் மேல் காதல்,
அனைத்தும், அனைவரும் காதல் கொள்ள
நானோ, இன்னும் என் காதலை தேடி! 🚶

-

நாள் முழுதும் போராடியப்பின்
நிம்மதியான உறக்கத்தை தேடி கண்மூட,
நமக்கும், மனதிற்கும் எண்ணற்ற போராட்டம்
எண்ணங்கள் நில்லாது அலைப்பாய,
எப்போது வருவது இந்த உறக்கம்?

-

நதிவாழ் மீனொன்று
கடல் சேர நினைத்தது,
நீந்தி நீந்தி ஓய, மீனவனின் வலைக்குள்.
அச்சத்தில் அலறல்,
வெளிவரத் துடிப்பு.
கடலும் சேராமல், நதியும் சேராமல்
நிலத்தில் தவிப்பு.
பிழைத்தால் போதும் என்ற அம்மீனின் கூக்குரல் யாருடைய காதிற்கும் கேட்கவில்லை.
தன் கனவு வெறும் கனவாகவே போனது.
இப்போது அந்த மீன்,
உடல் இருந்தும், உயிர் இல்லாமல்
விற்பனைக்கு கடையில்.

-

எதில் இல்லை தடைகள்?
என்று இல்லை வலிகள்?
தயங்கி நின்றால் தாண்டுவது எப்படி?
வருந்தி நின்றால் வாழ்வது எப்படி?
மனமே துணிவுக்கோள்,
சற்று தடுமாறினாலும், தடம் மாறிடாதே.

-

உண்மையாய் இருக்கும் உள்ளங்களுக்கு கிடைக்கும் பரிசு - ஏமாற்றம்.
மனிதர்களின் ஒரு முகத்திற்கு
பல முகமுடிகள் தேவைப்படுகின்றன.
இடத்திற்கு ஏற்ப மாறும்
பச்சோந்தியை போல்
நேரத்திற்கு ஏற்ப மாறும் மனிதர்கள்.

-

எண்ணற்ற எண்ணங்கள்
நெஞ்சில் அலைமோதுகிறது.
எதை தேடி ஓடுவது?
எதன் பின் ஓடுவது?
அது கிடைத்திடதா?
இது நடந்திடதா ?
ஆயிரம் ஆசைகள் மனதில் நில்லாமல் மலர்ந்துக்கொண்டு தான் இருக்கிறது,
காலம் போடும் தடைகளை வெல்ல,
விடாமுயற்சி மட்டுமே ஆயுதம்.

-

தேவைக்கு மட்டும் தேடி வரும் உறவுகள்,
தேடி வந்த தேவை முடிந்தபின்,
மீண்டும் அவ்வுறவு தேவையற்றதாகிறது.

-

அன்புள்ள அப்பாவுக்கு,

அனுதினமும் காத்திருக்கிறேன்
உன் அன்பு மழையில் நனைய.
வருடங்கள் பின் செல்ல வேண்டும்.
உன் விரலை கடித்து மகிழ,
உன் முதுகில் ஏறி உலா செல்ல.
கடற்கரை ஓரம், மாலை நேரம்,
கதைபேசி நடைபோடுவோம் நாமும்.
இவ்வுலகில் - மீண்டும் பிறந்திடு.
என் மகனாய்.
நீ தந்த அன்பை - அப்படியே
உனக்கு திருப்பி தருகிறேன்.
இருவரும் இன்னொரு முறை
ஒன்றாக வாழ்ந்திடுவோம்!👨‍👦

-

போகும் பாதை
சரியாக இருந்தால்,
அடையும் இலக்கு தவறாது.

-