ವಾಸ್ತವದಲ್ಲೂ ಬದುಕುತ್ತೇನೆ
ಭ್ರಮೆಯಲ್ಲಾದರೂ ಬದುಕುತ್ತೇನೆ
ನಾಜ್! ಯಾರಿಲ್ಲದಿದ್ದರೇನಂತೆ,
ನಾ ಬದುಕಬೇಕಾಗಿದೆ,
ಬದುಕೇ ಬದುಕುತ್ತೇನೆ!!

-

ಅವಳು ನನ್ನವಳಾಗಲಿಲ್ಲ ಎಂಬ
ನೋವೇನೂ ಇಲ್ಲ
ನಾಜ್!! ಸಾಕು,
ಅವಳು ನನ್ನವಳಾಗಿದ್ದಳು ಎಂಬ
ನಲಿವಾದರೂ ಇದೆಯಲ್ಲ!!!

-

ಅವನು ಇದ್ದುಹೋದ ನಲಿವೋ
ಅವನು ಬಿಟ್ಟು ಹೋದ ನಗುವೋ
ನಾಜ್!!! ತಿಳಿಯದು...
ಎನ್ನ ಮೊಗದಲ್ಲಿ ಮಾತ್ರ ಇಂದಿಗೂ
ಮೂಡಿಹುದು ಮುಗುಳ್ನಗು!!!!

-

ಪ್ರೀತಿಸಿದವರಿಗೆ ನೋಡಿ
ಸಿಗುವುದಾದರೆ ನೆಮ್ಮದಿ
ನಾಜ್!!! ಸ್ವಲ್ಪ,
ಅವನ ಮುಂದೆ ನನ್ನ
ಕೂತುಕೊಳ್ಳಲಾದರೂ ಬಿಡಿ!!!

-

ಬದುಕಿನ ಪಾಠಗಳನ್ನು
ನನ್ನ ಮುಂದೆ ಪಠಿಸದಿರಿ
ನಾಜ್!!!
ನಾನು ಪರಾಕಾಷ್ಠೆಗಿಂತ, ಬದುಕಿನ
ಪಾತಾಳ ನೋಡಿ ಬಂದಿರುವೆ!!!

-

ಗಾಜಿನ ಮನಸ್ಸು ನನ್ನದೆಂದಿದ್ದರೂ
ಕಲ್ಲು ಎಸೆಯುತ್ತೀರಲ್ಲಾ
ನಾಜ್!!
ಅದೇ ಚೂರಾದ ಗಾಜಿಂದ
ಚುಚ್ಚಿ ಚುಚ್ಚಿ ನಿಮ್ಮನ್ನೆಲ್ಲಾ
ಕೊಲ್ಲಬಹುದಲ್ಲಾ!!

-

ಯಾರಿಗೆ ಯಾವ ಶಿಕ್ಷೆ ನೀಡಿದರೇನು?
ನೆಮ್ಮದಿ ಸಿಗುವುದೇ!!
ನಾಜ್!!
ಇಚ್ಛೆಗಳ ವಿರುದ್ಧವೇ ಬದುಕುತ್ತಿರುವುದು
ಸಜೆಗಳಿಗಿಂತ ಕಡಿಮೆಯೇ!!???

-

ಸುಳ್ಳಿನ ಸ್ವರ್ಣ ಮಂದಿರವನ್ನೇ
ತೊರೆದಿದ್ದೇನೆ ,
ಆಸರೆಯಿಲ್ಲದಿದ್ದರೂ ಸರಿಯೇ
ನಾಜ್!!!
ಸತ್ಯದೊಂದಿಗೆ ಯಾವ ಸಂಧಿಯಲ್ಲಾದರೂ
ಬದುಕಿ ತೋರಿಸುತ್ತೇನೆ!!!

-

ತಮ್ಮ ತಮ್ಮ ದೇವರುಗಳಿಗೆ ನ್ಯಾಯ ದೊರಕಿಸಿಕೊಡಲು ಜನರು ಜಗಳವಾಡುತ್ತಿದ್ದಾರಂತೆ
ನಾಜ್!!
ಅಬ್ಬಾ!! ಆಧುನಿಕ ಮನುಜರು
ಬಲು ಬಲಶಾಲಿಯಾಗಿದ್ದಾರಂತೆ!!!

-

ಮೊದಲು, ದೇವರನ್ನು ಅರಸುತ್ತಾ
ಮನುಜ ಅಲೆದಾಡುತ್ತಿದ್ದನಂತೆ
ನಾಜ್!!!
ಈಗ ತನಗಿಚ್ಛೆ ಇರುವ ಸ್ಥಳಗಳಲ್ಲೇ
ಕರೆಸಿಕೊಳ್ಳುತ್ತಿದ್ದಾನಂತೆ!!

-