ದೇವಮಂದಿರ

ಎಂಥ ಸುಂದರ ನೋಡಬನ್ನಿರಿ
ಶಾಲೆಯೆಂಬ ದೇಗುಲ
ಹಚ್ಚ ಹಸುರಿಸ ಸೊಬಗಿನೈಸಿರಿ
ತೆರೆದು ನೋಡಿರಿ ಕಂಗಳ

ಜೀವವಿರುವ ದೇವರಿರುವ
ಇದುವೆ ದೇವ ಮಂದಿರ
ಮಕ್ಕಳೆಮಗೆ ದೇವರಂತೆ
ಮುಗ್ಧ ಮನಸಿನ ಚಂದಿರ

ಆಟ ಪಾಠವೆ ನಮ್ಮ ಮಕ್ಕಳ
ನಿತ್ಯ ದೈವಾರಾಧನೆ
ಹಾಡು ಕುಣಿತ ನೀತಿ ಕಥೆಗಳ
ಕೇಳಿ ಕಲಿವರು ಭೋದನೆ

ಆಡಿ ನಲಿಯುತ ಹಾಡಿ ಕುಣಿಯುತ
ಜ್ಞಾನವನ್ನು ಪಡೆದರು
ನೋಡಿ ಕಲಿಯುತ ಮಾಡಿ ತಿಳಿಯುತ
ವಿಜ್ಞಾನವನ್ನು ಅರಿತರು

ಮಕ್ಕಳಿಗೆ ಸರಿ ದಾರಿ ತೋರುವ
ಗುರುವೆ ದೇವರಾದರು
ತಿದ್ದಿ ತೀಡುತ ಬುದ್ಧಿ ಹೇಳುತ
ಮಗುವೆ ದೇವರೆಂದರು

ಕಲಿತ ಋಣವ ಕಲಿಸಿ ಕಳೆಯಿರಿ
ನಮಗೆ ದೊರೆತ ಪುಣ್ಯವು
ನೋಡಿ ಸಾಧನೆ ಹೆಮ್ಮೆ ಪಡುವಿರಿ
ಸಾರ್ಥಕವೀ ಜನ್ಮವು.

-

ಉತ್ತರದ ಕಾಶಿಯಲಿ ಕತ್ತೆ ಮಿಂದೈ ತರಲು
ದಕ್ಷಿಣದ ದೇಶಕದು ಕುದುರೆಯಹುದೆ ?
ತಾಯಿತ್ತ ಮೊಲೆಹಾಲೆ ನಿಮ್ಮ ಮೈಗಾಗದಿರೆ ?
ಹೊತ್ತ ಹೊರೆ ಬಲಕಾರಿ ನೆತ್ತರಹುದೆ ?.

- ಶ್ರೀ ಕುವೆಂಪು

-

ನರಕಕ್ ಇಳ್ಸಿ ನಾಲ್ಗೆ ಸೀಳ್ಸಿ
ಬಾಯಿ ಹೊಲ್ದಾಕಿದ್ರೂನುವೆ
ಮೂಗ್ನಲ್ ಕನ್ನಡ ಪದವಾಡ್ತೀನಿ
ನನ್ ಮನ್ಸನ್ ನೀ ಕಾಣೆ
-ಜಿ.ಪಿ.ರಾಜರತ್ನಂ.

-

ಗೌರಿ ಗಣೇಶ ಹಬ್ಬದ ಶುಭಾಶಯಗಳು.

ಗೌರಿ ತನಯ ವಿನಾಯಕ
ಗಣಗಳಿಗೆಲ್ಲ ಅಧಿನಾಯಕ
ಕಷ್ಟಕೋಟಲೆಯ ವಿನಾಶಕ
ಪ್ರಥಮ ವಂದ್ಯನೆ ಗಣನಾಯಕ

ವಕ್ರತುಂಡನೆ ಏಕದಂತನೆ
ಮೂಷಿಕ ವಾಹನ ಮೋದಕ ಪ್ರಿಯನೆ
ಮನದಿ ಭಜಿಸಲು ಭಕುತಿಗೊಲಿವನೆ
ಗರಿಕೆ ಅರ್ಪಿಸಲು ನಲಿವ ಗಣಪನೆ

ಗಜಮುಖ ಗಣಪನೆ ಬಾರಯ್ಯಾ
ಬಡವರ ಕಷ್ಟವ ನೋಡಯ್ಯಾ
ಕೊರೋನ ರೋಗವ ತಡೆಯಯ್ಯಾ
ಬದುಕಿಗೆ ನೆಮ್ಮದಿ ತಾರಯ್ಯಾ

ಗಣಪತಿಬಪ್ಪ ಮೋರೆಯಾ
ನಮ್ಮಯ ಮೊರೆಯಾ ಕೇಳಯ್ಯಾ
ನಿನ್ನಯ ಅಡಿಗೆ ಶರಣಯ್ಯಾ
ವರವನು ನೀಡಿ ಹರಸಯ್ಯಾ

-

ಮನೆ ಮೊದಲ ಪಾಠಶಾಲೆ
ಜನನಿ ತಾನೆ ಮೊದಲ ಗುರುವು
ಜನನಿಯಿಂದ ಪಾಠ ಕಲಿತ
ಜನರು ಧನ್ಯರು..!

ನನ್ನನ್ನು ತಿದ್ದಿ ತೀಡಿ
ಪ್ರೀತಿಯಿಂದ ನೋಡಿ
ಅಕ್ಕರೆಯಿಂದ ಮಾತಾಡಿ
ಸರಿದಾರಿಯ ತೋರಿ
ಹರಸಿ ಹಾರೈಸಿದ
ಗುರುವೃಂದಕೆ ಕೋಟಿ ಶರಣು!

-

ಜೀವನವೊಂದು ಸುಂದರ ಹೂದೋಟ!
ತಪ್ಪದು ಹುಳು ಹುಪ್ಪಟೆ ಕ್ರಿಮಿಕೀಟಗಳ ಕಾಟ!!
ಎದುರಿಸಬೇಕು ಕೆಲವೊಮ್ಮೆ ವಿಧಿಲೀಲೆಯ ಆಟ!
ಧೃತಿಗೆಡದೆ ಸಾಧಿಸು ಬಿಡದೆ ನಿನ್ನ ಹಠ!!

-

ನೆನ್ನೆಯೆಂಬುದು ''ಮಣ್ಣು''
ನಾಳೆಯೆಂಬುದು ''ಹುಣ್ಣು''
ಇಂದು ಸಿಗುವ ''ಹಣ್ಣು''
ತಿಂದು ಅನುಭವಿಸೋ ''ಜಾಣ''
ಅದೇ ಸ್ವರ್ಗ ''ಕಾಣ''!...

-

ಅಣ್ಣ ತಮ್ಮಂದಿರಿಗೆ ಕಟ್ಟುವರು
ಹೆಣ್ಣು ಮಕ್ಕಳು ರಾಕಿ !
ರಾಕಿ ಕಟ್ಟಲು ಕೊಡಬೇಕಂತೆ
ಐನೂರು ರೂ ಬಾಕಿ !
ಕೈಯಲ್ಲಿ ರಾಕಿ ಹಿಡಿದು
ಹೊಡೆಯುತ್ತಿದ್ದರು ಗಿರಕಿ !
ಅದರಿಂದಲೇ ಕಾಲ್ಕಿತ್ತ
ನೋಡಿ ಈ ಗಿರಾಕಿ !!

-

ಮದುವೆ ಆಗೋವರೆಗೂ
ಗಂಡು ಭೀಮರಾಯ !
ಮದುವೆ ನಂತರ
ಆಗುತ್ತಾನೆ ಧರ್ಮರಾಯ!!

-

ಬದುಕು ಬಂಗಾರ..!

ಬದುಕು ಭಾರವೆನಿಸದು
ಇತಿಮಿತಿಗಳ ಪರಿಮಿತಿಯಲಿ
ಅತಿಯಾಸೆಯಿಂ ಪರಿತಪಿಸದೆ
ಪಾಲಿಗೆ ಬಂದದ್ದು ಪಂಚಾಮೃತವೆಂದಡೆ !

ಬದುಕು ಬೇಸರವೆನಿಸದು
ಬರುವುದೆಲ್ಲವೂ ಬರಲೆಂದು
ಬಂದುದೆಲ್ಲವಾ ಧೈರ್ಯದಿಂ ಎದುರಿಸಿ
ಮನವನು ಸಮಚಿತ್ತದಿಂದಿಟ್ಟೊಡೆ !

ಬದುಕು ಸಾಕೆನಿಸದು
ಸಭ್ಯ ಸ್ನೇಹಿತರೊಡನಾಟ
ಸರಿ ತಪ್ಪುಗಳ ತಿದ್ದಿ ತೀಡುವ
ಶ್ರೇಯೋಭಿಲಾಷಿಗಳು ಜೊತೆಯಿದ್ದೊಡೆ !

ಬದುಕು ಬಂಗಾರವಹುದು
ಬಾಳ ನೌಕೆಯ ದಿಕ್ಕು
ಪ್ರತಿದಿನವೂ ಬೆಳಕ ಹೊಕ್ಕು
ಹುಣ್ಣಿಮೆ ಬೆಳದಿಂಗಳಂತಾದೊಡೆ !

-