ইতিহাসে ৰিঙিয়ালে
এপলক উভতি চাবা,
মাথো থমকি নৰবা
স্মৃতিবোৰত মামৰে ধৰিব .........

মই বাধ্য
কাৰোবাৰ সুখৰ স্বাৰ্থত,
মৌনতাৰ দলং খনৰ সিপাৰত
কিজানি মৃত সপোনৰ চিৎকাৰ........

সময়বোৰ যদি দু:সময় হয়
অনুভৱবোৰ কেনিনো হেৰায়.....??

-

অনুভৱৰ পৰিধিৰ বাহিৰত
হৃদয়ৰ একোটাই প্রশ্ন,
কিমান গভীৰতাত আধৰুৱা
হৈ পৰে.....
নিশাৰ একোটা গল্প ? ?

টেঙা আমজোপাৰ পৰা
কাউৰীজনী উৰি গলেই
চিতা সজা হয় নেকি ,
আপোনাৰ লগতেই
পৰিত্যক্ত হৃদয় খন
জ্বলাই দিবলৈ.......

-

এক তমসাবৃত নিশাৰ আঁত ধৰি
তেওঁৰ প্রশ্নবান...
জোনাক বিহীনতাত কিদৰে
অলেখ স্বপ্নৰ কাতৰতা ??
প্ৰত্যুত্তৰ মাথো এটি বাক্য
"আপোনাৰ দৰেই স্বপ্ন নতুবা
শব্দ নহয় স্বাৰ্থপৰ"
অন্ধকাৰ গলিটোত নীৰৱে
নাযায় আতৰি,
জী উঠে নতুন প্রতিশ্রুতিৰ জোৱাৰেৰে
এক ৰদ'মুখী সপোনৰ অপেক্ষাৰে
অন্ততঃ নিজক চিনিব পৰাকৈ.........

-

শৰতৰ একোটা ৰাতিত
কোনে চলায় জী উঠাৰ প্ৰস্তুতি ?
নহলে জানো ইমান সহজে
ফাগুনৰ ৰাগি পাহৰিব পাৰি...?

শেৱালী পাহ প্ৰিয় হৈয়ে ৰ'ল
কোনোবা জনে বুকুত
বিষাদৰ খৰিকাজাঁই গুজি গল ,
একো নাই
সকলো চলি যায়
জীৱন হে ভূল ও হৈ যায় ।
বাটে বাটে মানুহ হেৰাই
সময়ৰ সোঁতত জীৱনৰ
গতি সলনি হৈ যায় ,
নিজৰ প্ৰিয় সত্বা এটিক পাহৰি
ভাল লগা বোৰক
কোনে ৰাখে সামৰি ..!

-

আপোনাৰ দৰেই
শব্দবোৰকো বিৰতিৰ প্রয়োজন ,
বাৰে বাৰে ভূল হয়
উভতনি ইমানো সহজ নহয় ।
অনুভৱবোৰ সীমাহীন
আপোনাৰ সান্নিধ্যত জী উঠে
পাহৰিব খোজা দিনৰ ৰঙীন ছবি ,
এতিয়া আপোনাক বিদায় দি
শব্দবোৰক কিদৰে ৰাখিম ধৰি...?

-

আগুৱাব খোজিলেই
প্রাচীন সুৰ এটিয়ে মাত দিয়ে ,
নষ্টালজিক ঠিকনাৰ আত ধৰি
সময়ে লিখে জী উঠাৰ কাহিনী ।

উশাহক প্রশ্ন নকৰিবা
কিমান দীৰ্ঘজীৱী..?
উদযাপনৰ ৰাগিয়াল সুঁতিত
এই সময়বোৰ যে জীপাল ...।

কোনে জানে জীৱনৰ সঠিক খবৰ ..?
অথচ তাই সজাই তোলে
শূন্যৰ পৰা আৰম্ভ হোৱা জীৱন বৃত্তান্ত
সাগৰ গভীৰ আকুলতাৰ ভাঁজত..।।

-

প্রিয় জনহে আছিল
প্রয়োজন নহয় ,
বজাৰত অভাৱ নাই
সস্তীয়া প্রেমৰ....

আপোনাক কিমান ভালপাওঁ
সেয়া বুজা হলে ,
অভাৱে কঙাল নকৰিল হেতেন
এতিয়া.......
ৰঙা মানেই বিৰাগ...।।

-

সম্পৰ্কৰ দোলেৰে বান্ধিব খোজোতে
আপত্তি নাছিল ,
মাথো নিজস্বতা খিনি
হেৰুৱাৰ ভয় এটা ৰৈ গৈছিল...


অভিমানী বতাহ জাকে
বহুবাৰ কোবাইছে ,
তাকো ক্ষন্তেকীয়া ...

জীৱনক ভালপোৱা মানুহে
বন্দীত্ব সহিব নোৱাৰে.. ।।

-

বিশ্বাসৰ তুলাচনীত
প্রতাৰণাবোৰ কিমান
গভীৰতালৈ শিপালে
সম্পৰ্কবোৰ আধৰুৱা হৈ পৰে.. ?

জ্বলি আছো মানেই নাভাবিবা
শেষ হৈ গলো ,
কেতিয়াবা জী উঠিবলৈও
ছাই হব লাগে.. ।

-

জীয়াই আছো বুলি কোৱাৰ
প্রয়োজনেই বা কি....?

তুমি জানো নহয়
ছাই হৈ ৰোৱা এক জীৱন্ত মৰাশ ।

-